Daika Ese Tanobada Ia Lohiaia?

Taunimanima momo edia haere be, Dirava ese. To, Baibel ia gwau lasi Iesu Keriso eiava ena Tamana be inai tanobada ena lohia korikoridia. Iesu ia gwau: “Tanobada ena lohia do ia lulua murimuri dekenai.” Ma ia gwau: “Tanobada ena lohia ia mai noho. Ia be lau dekenai mai ena siahu lasi.”​—⁠Ioane 12:31; 14:30; 16:⁠11.

Anina be, inai tanobada ena lohia ese Iesu ia inai henia. Ia be daika?

Tanobada ai Idia Vara Gaudia amo Diba Ita Abia

Ena be ura namo taudia idauidau idia hekwarahi tanobada hanamoa totona, to idaunega amo ema bona hari dika ia davaria. Unai dainai haida idia laloa, niuspepa torea tauna ta, David Lawrence ia laloa bamona; ia gwau: “ ‘Maino, tanobada ai’​—⁠taunimanima kahirakahira iboudiai ese idia ura henia. ‘Taunimanima lalonamo henidia’​—⁠taunimanima kahirakahira iboudiai idia lalonamo heheni. Vadaeni, kerere be edeseni? Ena be taunimanima edia ura be unai, to dahaka dainai tuari idia vara?”

Taunimanima edia ura korikori be maino ai do idia noho, to idia inai heheni bona idia ala-ala heheni mai edia dagedage ida. Taunimanima hahisidia bona hamasedia totona inai gau idia gaukaralaidia: Gasi daiutudia, hahehisi dibura rumadia, lahi halasia gaudia, lahi bomudia, bona gau dika rohorohodia ma haida.

Mani oi laloa, maino bona moale idia ura henia taudia sibodia ese unai bamona kara dika rohorohodia idia karaia diba, a? Dahaka siahu ese taunimanima ia doridia eiava ia hakaudia, unai kara dika rohorohodia idia karaia totona? Nega ta inai bamona oi laloa a: Reana ita itaia diba lasi siahuna dikana ta ese taunimanima edia lalodia ia veridia dainai unai bamona idia karaia a?

Tanobada Lohiadia Ia Gwauraidia Hedinarai

Baibel ese ia hahedinaraia goevagoeva, ita itaia diba lasi aneruna ta mai ena diba ese taunimanima bona gavamani ia biagudia. Ia gwau: “Satani ese tanobada taudia ibounai ia gunalaia noho.” Ma ia gwau: “Satani . . . be tanobada taudia ibounai ia koia noho.”​—⁠1 Ioane 5:19; Apokalupo 12:⁠9.

Nega ta ai, ‘Satani ese Iesu ia dibagania’ neganai, Iesu ese Satani ena dagi, tanobada lohiana dagina, ia gorea lasi. Baibel ia gwau: “Satani ese ororo bada herea ta ena atai dekenai ia hakaua daekau, tanobada edia basileia ibounai mai edia hairaina danu ia itaia, ia gwau, ‘Bema . . . lau dekenai oi tomadiho, vadaeni inai ibounai be oi dekenai do lau henia.’ Iesu ma ia haere henia, ia gwau, ‘Satani e, idau gabu dekenai oi lao.’ ”​—⁠Mataio 4:​1, 8-10.

Mani inai oi laloa: Satani ese Iesu ia dibagania dalana be “tanobada edia basileia ibounai” ia henia gwauraia. To, bema Satani be unai basileia edia lohia lasi, iena hereva amo Iesu ia dibagania momokani diba a? Lasi. Ma danu, Iesu ia gwau lasi unai tanobada gavamanidia be Satani ena lasi, to bema Satani ese ia biagudia lasi, Iesu be unai bamona ia hereva. Momokani, Satani Diabolo be inai tanobada ena lohia! Baibel ese ia gwauraia, “inai tanobada ena dirava.” (2 Korinto 4:⁠4) Unai kara dika rohoroho tauna ese unai dagi mai siahuna be edena bamona ia abia?

Satani ai ia lao tauna be Dirava ese ia karaia aneruna ta, to ia ese Dirava ena dagi ia maumauraia bena ena lohia siahuna ia maumauraia danu. Ia ese gaigai ta ena uduna amo ia hereva, hahine ginigunana, Heva, ia koia, unai amo hahine mai ena adavana ida ia veridia, ia do idia kamonai henia bona Dirava do idia gwau-edeede henia totona. (Genese 3:​1-6; 2 Korinto 11:⁠3) Ma ia gwau ia ese Adamu bona Heva edia bese be Dirava ena amo do ia veridia oho diba. Unai dainai Dirava ese nega ia henia iena hereva do ia hamomokania toho, to ia do kwalimu lasi.​—⁠Iobu 1:​6-12; 2:​1-10.

Satani sibona ese tanobada ia lohiaia lasi. Ia ese aneru ma haida ia veridia ia ida Dirava do idia gwau-edeede henia totona. Idia be demoni, iena bamodia unai. Baibel ia gwau: “Do umui goada, Satani ena koikoi karadia do umui koua. Badina be iseda tuari be . . . lauma dikadia danu, guba dekenai idia noho. Ma danu inai tanobada ia gunalaia lauma dika badana, mai ena siahu taudia, bona tanobada ena dibura lohiadia, be ita ese ita tuari henidia noho.”​—⁠Efeso 6:​11, 12.

Lauma Dikadia Oi Koudia

Unai tanobada lohia dikadia, ita itaia diba lasi anerudia, idia ura taunimanima iboudiai be Dirava tomadiho henia karana amo do idia veridia oho. Unai dainai, ena be Baibel ese ia hahedinaraia goevagoeva mase taudia be gau ta idia diba lasi, to idia gwau taunimanima idia mase neganai edia lauma idia mauri noho. (Genese 2:17; 3:19; Esekiela 18:4; Salamo 146:​3, 4; Hadibaia Tauna 9:​5, 10) Reana lauma dikana ta ese mase tauna ena gadona ia tohotohoa, meamea tauna amo eiava sibona ena “gadona” amo mase tauna ena varavara o ena turadia ida ia herevahereva. Unai “gado” ia koikoi, ia gwau ia be mase tauna ena, to unai be lauma dikana ta ena!

Unai dainai, bema “gado” ta oi kamonai, oi laloa kerere lasi. Ena hereva oi dadaraia, bona Iesu ia hereva bamona oi hereva, oi gwau: “Satani e, idau gabu dekenai oi lao.” (Mataio 4:10; Iamesi 4:⁠7) Lauma dikadia edia kara oi dibadia toho lasi, meamea karadia ai do oi vareai garina. Baibel ese inai bamona taudia ia gwauraidia dika: “Meamea kara do umui karaia lasi, . . . bona mase taudia edia laumadia dekenai do umui nanadaia lasi, bona idia danu do umui herevahereva lasi.”​—⁠Deuteronomi 18:​10-12; Galatia 5:​19-21; Apokalupo 21:⁠8.

Meamea ese unai kara ia karaia tauna be lauma dikadia edia siahu henunai ia atoa, unai dainai ena be oi laloa unai kara haida be gadara sibona o idia amo moale oi davaria diba, to namona be meamea karadia iboudiai oi dadaraia. Unai kara haida be imana veria, huina veria, eiava mase tauna ena kwarana koukouna o turiana gaukaralaia, toa tahua totona. Lauma dikadia be ruma haida lalodiai regerege bona hoa karadia ma haida idia karaia.

Lauma dikadia ese danu taunimanima edia laloa dikadia idia veria, buka, muvini piksa, bona televisen program ai lebulebu karadia bona matabodaga karadia idia hahedinaraia totona. Lauma dikadia idia diba, bema taunimanima ese edia lalohadai dikadia idia negedia lasi, unai ese do idia veria do idia lebulebu totona​—⁠lauma dikadia idia karaia bamona.​—⁠Genese 6:​1, 2; 1 Tesalonika 4:​3-8; Iuda 6.

Inai hereva, lauma dikadia ese inai tanobada idia lohiaia herevana, be taunimanima momo ese idia abia dae lasi. To unai oi hoalaia lasi, badina be Baibel ia gwau: “Satani sibona ese iena kara ia senisia diba, bona ia ese diari aneruna ena kopina ia atoa diba.” (2 Korinto 11:14) Ia ese taunimanima momo edia lalona ia hadiburaia, unai dainai idia gwau Satani mai ena aneru dikadia be lasi. To oi laloa kerere lasi! Diabolo mai ena lauma dikadia idia noho, bona oi koudia noho be namo.​—⁠1 Petero 5:​8, 9.

Sivarai namona be inai: Satani mai ena lauma dikadia ida be kahirakahira do idia ore! “Tanobada [bona idia lohiaia anerudia dikadia danu] . . . be kahirakahira do idia ore. To Dirava ena ura ia karaia noho tauna be do ia noho ela bona hanaihanai.” (1 Ioane 2:17) Namona be Dirava ena ura ita karaia, bena iena tanobada matamatana lalonai mauri hanaihanai do ita abia diba.​—⁠Salamo 37:​9-11, 29; 2 Petero 3:13; Apokalupo 21:​3, 4.

[Picture on page 4]

Bema inai gavamani be Satani ena lasi, ia ese Iesu ia gwauhamatalaia henia diba, a?