Inai Mamina be Vaia Taunimanima Edia, A?

ENA lalona dekenai ia tai tauna ta ia toretore, ia gwau: “England dekenai, lau maragi neganai, lau idia hadibaia taunimanima vairanai egu mamina lau hahedinaraia lasi totona. Lau laloatao hisihisi lau mamia neganai, egu tamana,guna ia be ami tauna ta, be mai vairana auka ida lau ia hadibaia, ‘Oi tai lasi!’ Lau laloatao diba lasi egu sinana be nega ta ai natudia (ai iboudiai be hani) ia kisi henia eiava ia rosia. Egu tamana ia mase neganai, egu lagani be 56. Egu hemami be gau badana ta lau haboioa. To, unai neganai, lau tai diba lasi.”

Taunimanima haida edia bese karana dekenai, edia mamina be ma haida vairanai idia hahedinaraia. Idia moale neganai eiava idia lalohisihisi neganai, ma haida idia diba edia mamina be dahaka. To, tanobada ena gabu ma haida dekenai, idia hadibadia edia mamina idia hunia, edia mamina idia koua, idia haheauka sibona; unai kara be bada Europe ena not kahanai bona Britain dekenai, bona tatau momo be unai bamona idia karaia. To emu lalokau tauna ta ia mase neganai, oi tai be ia kerere, a? Baibel be dahaka ia gwau?

Baibel Lalonai Idia Tai Taudia

Meditereinien ena ist gabunai idia noho Heberu taudia ese Baibel idia torea, bona unai taudia be edia mamina idia hahedinaraia. Baibel ese taunimanima vairanai idia tai taudia edia sivarai momo ia gwauraidia. King Davida ena natuna Aminona idia alaia mase neganai, Davida ia tai. Momokani, ia “tai bada herea.” (2 Samuela 13:28-39) Davida ena dagedage koikoi natuna Abesaloma be king dagina ia abia toho, to ia mase neganai danu, Davida ia tai. Baibel ena sivarai ia gwau: “King Davida be ia lalohisihisi bada herea. Ia be ikoukou ena ataiai daiutu ta dekenai ia daekau, unuseni ia tai. Bona ia daekau lao neganai danu ia tai noho, ia gwau, ‘Natugu Abesaloma o! Natugu Abesaloma o! Bema oiemu gabuna dekenai lau mase be namo! Abesaloma o, natugu, Abesaloma o!’ ” (2 Samuela 18:33) Tamana iboudiai hegeregerena Davida ia tai. Bona nega momo tama sina taudia be edia natuna ia mase neganai, idia laloa natuna ena gabu ai idia mase be namo! Tamana eiava sinana ia do mase lasi neganai natuna ia mase be maoro lasi bamona.

Iena turana Lasaro ia mase neganai Iesu be dahaka ia karaia? Ia be guria gabuna kahirakahira ai ia mai neganai ia tai. (Ioane 11:30-38) Gabeai, Maria Magadala be Iesu ena guria gabuna kahirakahira ai ia mai neganai ia tai. (Ioane 20:11-16) Momokani, Baibel ena toreisi lou helaro herevana ia diba Keristani tauna be do ia taitai bada lasi badina ia be mai ena heduru, haida be idia taitai bada badina Baibel lalonai helaro herevana mase taudia totona idia lalo-pararalaia lasi. Ena be toreisi lou helarona ia abia, to Keristani momokani tauna be taunimanima iboudiai bamona mamina ia abia dainai, iena lalokau tauna ta ia mase neganai, ia tai bona ia lalohisihisi danu.—1 Tesalonika 4:13, 14.

Taitai Eiava Taitai Lasi

Hari inai negai edena bamona do ita karaia? Emu mamina oi hahedinaraia be ia auka eiava oi hemarai, a? Sisiba idia henia taudia idia gwau dahaka oi karaia be namo? Hari inai negai edia lalohadai be Baibel ena idaunegai aonega hereva bamona. Idia gwau, namona be iseda lalohisihisi ita hahedinaraia, namo lasi ita koua. Unai dainai ita be idaunegai abidadama taudia, hegeregere Iobu, Davida, bona Ieremia ita lalodia; Baibel lalonai edia tai herevadia ita davaria diba. Edia mamina idia hunia lasi. Unai dainai, ma taunimanima haida amo oi siri be aonega dalana lasi. (Aonega Herevadia 18:1) Momokani, taitai daladia be idauidau taunimanima edia bese karadia idauidau dekenai, bona gabu idauidau ai edia tomadiho lalohadai idauidau hegeregeredia.a

To edena bamona bema emu mamina be oi ura oi tai? Tai be vaia taunimanima edia kara. Namona be oi laloatao, Lasaro ia mase neganai, Iesu “[ena] lalona ia hisihisi bada, mamina ia abia momokani. . . . Iesu ia tai.” (Ioane 11:33, 35) Unai dainai, ia hahedinaraia, lalokau tauna ta ia mase neganai, tai be vaia taunimanima edia kara.

Grieving people — Lalokau tauna ta ia mase neganai, lalohisihisi bona taitai be vaia taunimanima edia kara

Sinana ta, Anne, be unai bamona ia hereva danu, iena beibi Rachel be SIDS (Sudden Infant Death Syndrome) dainai ia mase. Iena adavana ia gwau: “Ai hoa badina ai guria neganai Anne bona lau ai tai lasi. Ma iboudiai idia tai.” Anne ia gwau: “Io, to murinai ai ruaosi totona lau tai bada. Lau laloatao, dina ta lau sibona be ruma lalonai lau noho, unai be wiki haida egu beibi ia mase negana murinai. Unai dina ibounai lalonai lau tai. To lau laloa unai ese lau ia durua. Gabeai egu mamina ia namo. Egu beibi ia mase lau taitailaia be namo. Lau laloa, edia lalona dekenai idia tai taudia idia taitai momokani be namo. Ena be ma haida idia gwau, ‘Oi tai lasi,’ to unai be heduru lasi.”

Haida Edia Kara, Ta Ia Mase Neganai

Edia lalokau tauna ta ia mase neganai, haida be dahaka idia karaia? Namona be Juanita ena sivarai ita laloa. Beibi be mase dekenai ia haboioa ena mamina ia diba. Ia be nega ima bogana lalonai ia abia natuna ia negea. Ia rogorogo lou. To motuka aksiden dainai hospital ai ia lao neganai, ia lalo-hekwarahi bada. Wiki rua murinai mara hisihisina ia abia to unai be nega korikori lasi. Nega sisina murinai beibi Vanessa ia vara—ena metau be kilogram tamona bamona. “Lau moale bada herea,” Juanita ia gwau. “Lau be sinana ta ai lau lao unai!”

To iena moale be ia noho daudau lasi. Dina hani murinai Vanessa ia mase. Juanita ia laloatao, ia gwau: “Egu mamina be lau dabu bada herea bamona. Egu sinana dagina idia kokia. Egu mamina be gau ta lau haboioa. Lau lalohisihisi bada badina ruma dekenai ai giroa bona Vanessa totona ai hegaegaelaia daiutuna lalonai lau hoidia dabua lau itaia dainai. Ia mase murinai hua haida lalodiai iena vara dinana dekenai idia vara gaudia lau lalodia tao. Lau ura lasi ta lau bamoa.”

Unai be idau momokani karana, a? Reana ma haida ese idia lalo-pararalaia haraga diba lasi, to Juanita bamona unai kara idia mamia taudia idia gwau, edia beibi totona idia taitai, nega daudau lalonai ia mauri tauna ia mase neganai idia taitailaia bamona. Natuna ia do vara lasi neganai, taunimanima idia gwau ena tama sina ese idia lalokau henia. Sinana ese ia lalokau henia bada. Unai beibi ia mase neganai, unai be taunimanima momokanina ta ia boio. Bona ma haida ese unai idia lalo-pararalaia be namo.

Badu Bona Oi Laloa Oi Kerere Mamina ese Emu Kara Ia Haidaua Diba Dalana

Sinana ta idia hamaoroa, ena lagani 6 natuna merona be ia vara neganai ia be mai ena gorere ena kudouna lalonai dainai ia mase haraga; unai sinana ese ena mamina ia gwauraia. “Lau daradoko bona lau ura lasi lau abia dae ia mase vadaeni. Gabeai lau laloa lauegu kerere dainai ia mase, bena lau ese egu adavana bona doketa taudia lau badu henidia badina be idia lalo-parara haraga lasi David ena kudouna ia manoka momokani.”

Badu be lalohisihisi bada ena toana ma ta. Reana taunimanima be doketa bona sista taudia dekenai idia badu, badina idia laloa mase tauna idia durua totona ma gau haida idia karaia be namo. Eiava turadia bona varavara dekenai idia badu, badina idia hereva kerere eiava gau ta idia karaia kerere dainai. Haida be mase tauna dekenai idia badu, badina iena tauanina ena goada ia naria namonamo lasi dainai. Stella ia gwau: “Lau laloatao egu adavana dekenai lau badu, badina lau diba iena mase ia koua diba. Ia gorere bada, to ia ese doketa ena sisiba iboudiai ia kamonai lasi.” Bona nega haida mase tauna dekenai idia badu, badina ia mase murinai ia mauri noho tauna be metau bada herea ia abia.

Haida idia laloa idia badu be kerere—anina be idia badu dainai sibodia idia samania. Ma haida idia laloa edia lalokau tauna ia mase be edia kerere dainai. Hegeregere idia gwau, “Bema lau doria ia lao haraga doketa dekenai” eiava “ma doketa ta dekenai lau abia lao” eiava “lau hamaoroa iena tauanina ena goada ia naria, reana ia mase lasi.”

A mother remembers holding her child — Natuna ia mase be lalona hahekwarahia bada gauna—tama sina durudia gaudia be oi hebogahisi momokani bona edia mamina oi lalo-pararalaia

Ma haida idia laloa edia kerere ma haida dainai unai tauna ia mase, unai be momokani bema edia lalokau tauna be ia mase haraga. Idia laloatao, guna mase tauna dekenai idia badu eiava ia danu idia hepapahuahu. Eiava idia laloa, guna mase tauna dekenai ma gau haida idia karaia durua totona be namo.

Sinadia momo be nega daudau lalonai edia lalona dekenai idia tai dainai, unai ese diba taudia momo edia hereva ia hamomokania, idia gwau, natuna ta ia mase neganai, ma ta ese ena gabu ia abia diba lasi tamana sinana edia mauri lalonai, to sinana ese ena natuna ia boio mamina ia abia bada herea.

Emu Adavana Ia Mase Neganai

Adavana ia mase neganai be hekwarahi idauna ta, unai be momokani bema idia ruaosi be guna kara momo idia karaia hebou. Anina be idia moalelaia hebou mauri dalana ia doko, guna idia loaloa hebou, idia gaukara hebou, moale karadia idia karaia hebou, bona guna idia heduru heheni.

Ena tau be kudou gorere dainai ia mase haraga neganai, Eunice ese dahaka ia vara ia gwauraia. “Ia mase murinai pura tamona lalonai, gau iboudiai edia mamina idia ore bamona, hegeregere egu tauanina ia gaukara lasi bamona. Lau be gau ta lau mamia eiava lau bonaia diba lasi. To, egu darana ia gaukara noho, unai be ma ta ena darana ia gaukara hegeregerena. Egu tau ena kudouna idia hamarerea toho totona idia botaia neganai, lau be taunimanima momo bamona lau karaia lasi, lau abia dae ia mase vadaeni. To egu mamina be hegeregere lau ura gau ta lau koua to dala be lasi, motuka be ororo ena isena dekena amo ia moru bona lau koua diba lasi hegeregerena.”

Ia taitai, a? “Io, lau tai, bona hebogahisi kadi handred momo lau duahidia neganai, unai be momokani. Idia ta ta lau duahidia neganai lau tai. Unai ese lau ia durua unai dina ena hora oredia ai lau hegeregere totona. To hanaihanai lau idia nanadaia lau be edena bamona neganai, gau ta ese lau ia durua lasi. Ia hedinarai goevagoeva lau lalohisihisi bada.”

Dahaka ese Eunice ia durua iena lalohisihisi bada dekenai ia goada noho totona? Ia gwau: ‘Ena be lau diba lasi, to egu lalona lau hadaia egu mauri dalana do lau haheaukalaia noho. To, lau lalohisihisilaia noho gauna be egu adavana be mauri ia ura henia bada, to hari ia noho lasi ia moalelaia totona.’

“Namo Lasi Ma Haida ese Oi Idia Doria . . .”

Leavetaking—When and How to Say Goodbye bukana idia torea taudia edia sisiba be inai: “Namo lasi ma haida ese oi idia doria inai bamona oi karaia eiava unai bamona mamina oi abia totona. Ta ta iboudiai be edia lalona dekenai idia tai karana be idauidau. Reana ma haida idia laloa oi tai momo eiava oi tai momo lasi—bona oi dekenai edia lalohadai do idia hadibaia. Edia kara oi gwauatao bona oi laloaboio be namo. Ma haida edia ura hegeregerena oi karaia eiava taunimanima ese idia gwauraia dalana oi badinaia neganai, oiemu dala do ia hadikaia emu lalona ia goada lou totona.”

Momokani, taunimanima idauidau be dala idauidau ai edia lalona dekenai idia tai karana idia haheaukalaia. Ai ura lasi ai gwau taunimanima iboudiai totona dala tamona sibona ia namo momokani. To, bema iena kara ia ura lasi ia haidaua, eiava ia ura lasi ia vara gauna ia abia dae, dika ia vara diba. Unai neganai hebogahisi turadia ese idia durua be namo. Baibel ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” Unai dainai oi gari lasi heduru oi noia totona, oi hereva totona, bona oi taitai totona.—Aonega Herevadia 17:17.

Taitai be vaia taunimanima edia kara, ta ia mase neganai, bona ma haida ese emu lalohisihisi idia itaia be kerere lasi. To henanadai ma haida edia haere ita abia be namo: ‘Edena bamona egu lalona dekenai lau tai karana lau haheaukalaia diba? Lau laloa lau kerere bona lau badu be vaia taunimanima momo ese idia mamia, a? Unai bamona mamina lau abia neganai, dahaka lau karaia diba? Dahaka ese lau do ia durua diba egu lalohisihisi bona metau lau haheaukalaia totona?’ Murina sivarai ese unai henanadai bona ma henanadai haida do ia haerelaidia.

a Haheitalai be inai: Nigeria ena Yoruba taudia edia sene taudia edia lalohadai ta be mase neganai souli be tauanina matamata ta ai ia vara. Unai dainai sinana ta ena natuna ta be mase dekenai ia haboioa neganai, nega sisina sibona lalonai idia taitai bada; badina Yoruba anena ta ia gwau: “Ranu ia bubua. Ranu urona ia makohi lasi.” Yoruba taudia idia laloa, anina be ranu urona, sinana, be natuna ma ta ia havaraia diba—reana guna ia mase natuna be unai natuna matamatana lalonai do ia mauri lou. Iehova ena Witnes taudia be sene taudia edia gari lalohadaidia idia badinadia lasi, unai lalohadai koikoi be souli ia mase diba lasi bona mase tauna be mauri tauanina matamata ta ai ia vara, to Baibel lalonai unai hereva idia davaria diba lasi.—Hadibaia Tauna 9:5, 10; Esekiela 18:4, 20.

Taitai Dalana

Taunimanima ta ta ena kara hegeregerena, lalona dekenai tai karadia be nega ta ta idia vara diba bona edia nega ena lata be idauidau. Taitai taudia be henuai lista dekenai ai torea karadia reana idia hahedinaraia.

Mase sivaraina idia kamonai neganai: Idia hoa; hereva idia abia dae lasi, hereva idia dadaraia; lalona ai gau ta idia mamia diba lasi; idia laloa idia kerere; badu mamina.

Reana inai do ia vara: Gau haida idia laloaboio bona idia mahuta namonamo diba lasi; idia hesiku bada; edia mamina be haraga ia idau diba; gau haida idia laloa namonamo lasi bona edia lalohadai ia kerere; idia tai bena idia hadokoa bena idia tai lou; aniani dalana ia idau, bona edia kopina idia maragi idia lao eiava idia bada idia lao; tauanina ia manoka toadia be idauidau; tauanina idia gaukara metairametaira; gaukara momo ia karaia diba lasi; nihi bamona lalohadai gagevadia; natuna ta ia mase neganai, edia adavana idia badu henidia kava.

Mase negana ia lao ore sisina murinai: Guna idia vara gaudia idia laloatao neganai idia lalo-metau sisina; mase tauna idia laloatao neganai, gau namodia idia laloatao, bona idia kiri sisina danu.

Bogana Lalonai Natuna Ia Negea Bona Ia Mara Neganai Natuna Ia Mase Vadaeni—Sinadia be Lalona Dekenai Idia Tai

Ena be iena natudia ma haida idia noho, to hahine ta, ladana Monna, be mai moale ida ena natuna matamatana ena vara negana ia naria noho. Ia gwau bogana ai ia do noho neganai, unai beibi dekenai ‘lau gadara, lau hereva henia, bona lau nihilaia.’

Bogana ai ia noho natuna bona ena sinana edia lalokau dalana be mai ena siahu. Monna be ma ia gwau: “Rachel Anne be egu bogana ai ia do noho neganai, bema buka ta be egu bogana latanai ia noho, ena aena amo ia botaia oho. Ia dainai hanuaboi ai lau mahuta namonamo lasi. Lauegu bogana be ena aena amo ia botaia nega ginigunadia lau do laloa noho. Lau ia botaia auka lasi. Ia marere negadia iboudiai, lauegu lalokau ia dekenai ia bada. Ia lau diba namonamo, unai dainai hisihisi ia ania neganai o ia gorere neganai lau diba.”

Monna be ma ia gwau: “Doketa ese egu hereva ia abia dae lasi ela bona beibi ia mase. Lau ia hamaoroa, namona be lau laloa momo lasi. To beibi ia mase neganai mamina lau abia. Lauegu bogana ai ia giroa haraga, bena murina dinana ai ia mase.”

Monna sibona lasi to hahine ma haida ese unai bamona gau idia davaria. Buka ta, ladana Surviving Pregnancy Loss lalonai, ena sivarai torea taudia, Friedman bona Gradstein idia gwau, lagani ta ta iboudiai United States lalonai, hahine milioni ta bamona idia mara dika. Momokani, tanobada hegegemadai, unai namba ia daekau milioni momo dekenai.

Taunimanima momo idia diba lasi, to bema hahine ena bogana lalonai beibi ia negea eiava ia mara neganai natuna ia mase vadaeni, unai be lalohisihisi gauna bada hereana ta hahine dekenai, bona reana ena lalohisihisi do ia negea diba lasi. Hegeregere, Veronica be hari ia buruka ia lao, bona bogana lalonai beibi idia negea negadia ia do lalodia tao. Ia laloatao, nega ta beibi be ena bogana ai ia mauri noho ela bona hua 9 bena ia vara neganai ena metau be 6 kilogram. Pura rua lalodiai unai mase beibi be ena bogana lalonai ia noho. Ia gwau: “Hahine ta ese ia mase natuna ia havaraia neganai, unai be lalohisihisi gauna bada hereana ta ia dekenai.”

Nega haida taunimanima, hahine danu, ese unai bamona hahine edia lalohisihisi mamina idia lalo-pararalaia lasi. Hahine ta ena bogana lalonai natuna ia dika neganai, ia toretore, ia gwau: “Lau dekenai unai ia do vara lasi neganai, lauegu turadia dekenai unai ia vara neganai lau ese edia lalohisihisi mamina lau lalo-pararalaia lasi, to hari lau diba vadaeni. Guna lau ese edia mamina lau diba lasi, lau hebogahisi lasi bona hari lau laloa taunimanima ese lauegu mamina idia diba lasi, lau idia hebogahisi henia lasi.”

Natuna be bogana dekenai ia mase neganai ena lalona dekenai ia tai hahinena ena hekwakwanai ma ta be ia laloa ena adavana ia lalohisihisi bada lasi, sibona ia lalohisihisi bada hegeregerena. Headava hahine ta be inai bamona ia hereva: “Unai neganai lauegu tau ena kara lau lalohisihisilaia bada. Iena lalohadai be hegeregere lau rogorogo lasi. Egu lalona dekenai lau tai karana ia lalo-pararalaia diba lasi. Ia hebogahisi bada lau gari henidia gaudia lau gwauraia neganai, to egu lalona dekenai lau tai mamina lau gwauraia neganai, ia hebogahisi lasi.”

Reana unai be vaia tau ena kara—ena tauanina bona beibi ena tauanina idia tamona lasi bona ena lalokau beibi dekenai be rogorogo hahinena ena lalokau hegeregerena lasi. To, iena beibi ia boio danu. Namona be tau bona hahine idia diba, ena be dala idauidau ai hisihisi idia ania, to idia ania hebou. Bema tau ese ena lalohisihisi ia hunia, reana ena hahine do ia laloa ia vara gauna dainai ia lalohisihisi lasi. Unai dainai namona be tau mai adavana do idia taitai hebou. Ta ta ena lalohadai ena lalohadai umui gwauraia heheni, bona ta ta umui hebogahisi heheni. Guna umui karaia lasi, to hari umui hahedinaraia umui heduru heheni bada. Umui headava tatau e, umui hahedinaraia emui hahine edia hemami umui lalo-pararalaia.

Beibi Ia Mase Haraga—Lalona Dekenai Tai Karana Haheaukalaia

Beibi ia mase haraga be daradoko ia havaraia gau dikana. Ena toana ia namo bona ia goada beibi be dina ta dekenai ia noga lasi. Unai dekenai idia hoa, badina daika ia laloa beibi ta do ia mase guna, iena tama sina idia do mase lasi neganai? Sinana ese beibi ia lalokau henia bada momokani, bema ia mase haraga herea unai ese sinana ena lalohisihisi bada ia havaraia.

Edia mamina be kerere ta idia karaia. Tama sina be reana idia laloa beibi ia mase be idia edia kerere ta dainai, hegeregere gau ta idia karaia lasi dainai. Sibodia idia henanadai, ‘Dahaka lau karaia diba ena mase lau koua totona?’b Nega haida, tau be ena lalona dekenai iena adavana ia samania kava. Ia lao gaukara neganai, beibi be ia mauri noho bona ia goada. Ruma ai ia giroa neganai, ena mahuta bedi dekenai ia mase! Ena adavana be dahaka ia karaia? Beibi ia mase neganai adavana be edeseniai? Namona be unai lalohisihisi havaraia henanadai edia haere idia abia; bema lasi, headava do ia hametaua diba.

Idia vara kava bona idia diba guna lasi karadia dainai natuna ia mase. Baibel ia gwau: “Nega dika idia davaria noho, bona inai dika ia vara kava noho.”—Hadibaia Tauna 9:11.

Ruma bese ta dekenai beibi ia mase neganai, ma haida be edena bamona idia durua diba? Ena lalona dekenai ia tai sinana ta ia haere, ia gwau: “Egu turana ta ia hereva lasi, to ia mai bona egu ruma ia hagoevaia. Ma haida be aiemai aniani idia nadua. Haida edia heduru dalana be lau idia rosia sibona—hereva lasi, to rosia sibona. Lau ura lasi lau herevalaia. Lau ura lasi ia vara gauna lau gwauraia lou gwauraia lou. Lau ura lasi ena badina idia tahua henanadai idia henia, hegeregere lau be gau ta lau karaia lasi dainai ia vara. Lau be sinana; bema dala ia noho egu beibi ena mase lau koua.”

b Sudden Infant Death Syndrome (SIDS), be nega momo ia vara beibi be hua tamona ia lao hua 6 neganai; ena badina idia diba lasi to beibi goadana ta ia mase haraga neganai, unai gorere ladana idia henia. Nega haida, idia laloa reana unai do ia vara lasi bema beibi be ena doruna dekenai eiava ena kahana ta dekenai ia mahuta, to namo lasi ena bogana dekenai ia mahuta. To, ita gwau lasi inai bamona eiava unai bamona ia mahuta neganai SIDS do ia vara lasi.