Kahana 16

Emu Lalona Oi Hadaia Dirava Ena Hesiai Do Oi Lao Henia

Dirava ena turana ai oi lao totona, namona be dahaka oi karaia? (1,2)

Edena dala ai Dirava dekenai do oi gwauhamata? (1)

Edena negai do oi bapatiso be namo? (2)

Dirava oi badinaia noho totona goada be edena bamona oi abia diba? (3)

1. Dirava ena turana ai oi lao totona, namona be Baibel ena hereva momokani oi dibaia namonamo (1 Timoteo 2:​3, 4), oi dibaia gaudia oi abia dae momokani (Heberu 11:⁠6), emu kara dika amo oi helalo-kerehai (Kara 17:​30, 31), bona emu mauri dalana oi haidaua. (Kara 3:19) Bena emu lalokau Dirava dekenai ese oi ia veria, ia dekenai emu mauri do oi gwauhamatalaia totona. Unai ena anina be oi sibona ese Dirava oi guriguri henia negana ta ai ia oi hamaoroa oiemu mauri be ia oi henia, iena ura karaia totona.​—⁠Mataio 16:24; 22:37.

2. Dirava oi gwauhamata henia murinai, namona be oi bapatiso. (Mataio 28:​19, 20) Bapatiso ese ma haida ia hadibaia oiemu mauri be Iehova dekenai oi gwauhamatalaia. Unai dainai, edia lagani be ia hegeregere Dirava ena hesiai lao henia totona edia lalona idia hadaia diba taudia sibodia be hegeregere bapatiso do idia abia. Ta ia bapatiso neganai, namona be ena tauanina ibounai be ranu lalonai ia diho.a​—⁠Mareko 1:​9, 10; Kara 8:⁠36.

3. Oi gwauhamata murinai, Iehova do ia ura emu mauri lalonai emu gwauhamata oi badinaia. (Salamo 50:14; Hadibaia Tauna 5:​4, 5) Diabolo be oi do ia koua toho Dirava ena hesiai oi lao henia lasi totona. (1 Petero 5:⁠8) To guriguri amo Dirava kahirakahira dekenai oi lao. (Filipi 4:​6, 7) Dina ta ta ibounai iena Hereva oi stadilaia. (Salamo 1:​1-3) Kongregesen oi badinaia momokani. (Heberu 13:17) Unai ibounai oi karaia neganai, goada do oi abia, Dirava oi abidadama henia noho totona. Momokani, Dirava ena ura karadia be do oi karaia diba ela bona hanaihanai!

[Footnote]