Dahaka Idia Abia Dae?

IEHOVA ENA WITNES TAUDIA ese Siahu Ibounai Diravana, Iehova, guba bona tanobada ia Havaraia Tauna idia abidadama henia. Guba bona tanobada ai ita itaia hoa gaudia ese idia hahedinaraia aonega bona siahu bada Havaraia Tauna ese unai ibounai ia karaia. Tatau bona hahine edia gaukara ese edia kara idia hahedinaraia hegeregerena, Iehova Dirava ese ia karaia gaudia ese iena kara idia hahedinaraia. Baibel ese ita ia hamaoroa taunimanima be “Dirava ese ia karaia gaudia ibounai idia itaia vadaeni. Inai gaudia idia itaia dainai, idia be Dirava ena hunia gaudia idia kamonai diba danu.” Danu, ena be gado regena eiava hereva be lasi, to “guba ese Dirava ena hairaina ia hedinaraia.”​—Roma 1:20; Salamo 19:​1-4.

Taunimanima ese uro, televisen, eiava kompiuta idia karaia kava lasi. Tanobada ena tubutubu gaudia bona animal ese unai gaudia idia hereaia. Taunimanima edia tauanina mai ena sel trilioni momo ita lalo-pararalaia be auka​—laloa karana totona ita gaukaralaia harana danu be hoa gauna badana! Bema taunimanima ese idia karaia gaudia idia karaia kava lasi, ita laloa diba Iehova Dirava ese iena hoa gaudia ia havaraia kava lasi! Aonega Herevadia 16:4 ia gwau: “Iehova ese gau iboudiai ia karaia, ta ta be mai edia badina.”​—Buka Helağa.

Iehova ese mai badina dainai tanobada ia havaraia, tau bona hahine ginigunadia dekenai ia hahedinaraia hegeregerena, ia gwau: “Emui bese do umui havaraia, do umui momo herea. Tanobada ena gabu ibounai dekenai do umui noho,  . . . Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” (Genese 1:28) Unai tau bona hahine ginigunadia idia gwau-edeede dainai, lalokau dalanai tanobada bona iena tubutubu gaudia bona animal idia naria kara maoromaoro ruma besedia ese tanobada idia hahonua lasi. To edia kara dainai Iehova ena palani ia moru lasi. Unai ibounai idia vara bena lagani tausen momo murinai, idia torea: “[Dirava] ese tanobada ia karaia,  . . do ia noho kava totona ia karaia lasi.” Ia ese “taunimanima idia noholaia diba gabuna, ia karaia.” Do idia hadikaia ore lasi, to “tanobada be ia noho hanaihanai.” (Isaia 45:18; Hadibaia Tauna 1:​4, Buka Helağa) Iehova ena ura tanobada totona be do ia guguru: “Lauegu ura, lauegu palani, be do ia gini noho, do ia moru lasi. Lau ura karaia gaudia ibounai be do lau karaia.”​—Isaia 46:10.

Unai dainai, Iehova ena Witnes taudia idia abia dae tanobada be do ia noho hanaihanai bona taunimanima, idia mauri noho bona idia mase vadaeni taudia, Iehova ena ura tanobada hahairaia bona noholaia totona idia hegeregere taudia, be ia latanai do idia noho ela bona hanaihanai. Taunimanima ibounai ese Adamu bona Heva amo kara dika idia abia hanai, bona unai dainai idia be kara dika taudia. (Roma 5:12) Baibel ese ita ia hadibaia: “Kara dika ena davana be mase.” “Mauri taudia idia diba do idia mase, to mase taudia be gau ta idia diba lasi.” “Kara dika ia karaia tauna, ia sibona do ia mase.” (Roma 6:23; Hadibaia Tauna 9:5; Esekiela 18:​4, 20) Unai dainai, tanobada ai hahenamo idia moalelaia bona idia mauri lou dalana be dahaka? Keriso Iesu ena mauri davalaia boubouna sibona amo, badina ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” “Mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi.”​—Ioane 5:​28, 29; 11:25; Mataio 20:28.

Edena bamona unai do ia vara? Iesu be tanobada ai ia noho neganai ia harorolaia matamaia “Basileia ena Sivarai Namona” ese unai ia gwauraia hedinarai. (Mataio 4:​17-23) Hari inai negai Iehova ena Witnes taudia ese dala badana ai sivarai namona idia harorolaia.

[Chart on page 13]

IEHOVA ENA WITNES TAUDIA ESE IDIA ABIA DAE GAUDIA

Hadibaia Hereva Baibel Ena Hereva

Mauri dalana be tamona sibona Mat. 7:​13, 14; Ef. 4:​4, 5

[Picture on page 12]

TANOBADA . . . Iehova ese ia havaraia . . . taunimanima ese idia naria . . . bona do idia noholaia ela bona hanaihanai