Idia Ura Inai Sivarai Namona Oi Kamonai

IESU be tanobada dekenai ia noho neganai, iena hahediba taudia be ia dekenai idia mai bona idia nanadaia: “Do oi giroa mai, bona tanobada dokona danu, ena toana be dahaka?” Ia haere, tano momo taudia do idia tuari, hitolo bada, daihanai goreredia, tano mareremarere, bona taravatu utua karadia momo do idia vara, tomadiho hadibaia koikoi taudia ese momo do idia hakaua kerere, ia murinai idia raka taudia korikoridia do idia inai henia bona dagedage henia, bona taunimanima momo ese kara maoromaoro do idia ura henia lasi. Unai gaudia idia vara matamaia neganai, do idia diba ena be Keriso idia itaia lasi to ia noho vadaeni bona guba Basileiana be kahirakahira. Unai be sivarai matamatana​—ia be sivarai namona! Unai dainai Iesu ese inai hereva ia gwauraia bona ia be unai toa ena kahana ta, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.”​—Mataio 24:​3-14.

Hari tanobada ai idia vara gaudia be dika, to gau namona idia hahedinaraia, Keriso ia noho vadaeni. Ataiai ai gwauraia gaudia be guna idia harorolaia laganina 1914 ai idia vara matamaia! Ia hahedinaraia Bese Idauidau edia nega ia ore bona taunimanima edia lohia negana amo Keriso ena Lagani 1000 (Milenium) Lohia Negana dekenai ia hanaia lao negana ia matamaia.

Salamo karoa 110 siri 1 bona 2 (Buka Helağa), bona Apokalupo 12:​7-​12 ese unai hanaia lao negana idia gwauraia hedinarai. Unai siri ese idia hahedinaraia Keriso be guba ai Dirava ena idiba kahana dekenai do ia helai ela bona King ai do ia lao. Unai murinai guba dekenai ia vara tuarina ai, Satani be tanobada dekenai idia negea, tanobada dekenai dika ia vara, bona Keriso be iena inai taudia huanai ia lohia. Dika ibounai ena dokona be “hisihisi bada herea” amo do ia mai, ena dokonai be Aramagedono ena tuari do ia vara bena Keriso ena Lagani 1000 Lohia Negana bona maino do ia matamaia.​—Mataio 24:​21, 33, 34; Apokalupo 16:​14-16.

Baibel ia gwau: “To namona be oi diba, nega ena dokona dekenai, metau dikadia momo do idia vara. Badina taunimanima ese idia edia ura sibona do idia tahua, moni do idia mataganigani henia, do idia hekokoroku bona heagi. Do idia hereva dika, edia tamana bona sinana do idia kamonai henia lasi, tanikiu henia kara do idia diba lasi, bona helaga karadia do idia negea. Idia be lalokau do idia diba lasi, do idia bogahisihisi lasi, haida edia ladana do idia hadikaia kava, do idia lebulebu, do idia dagedage, kara namodia do idia ura henia lasi. Edia turana do idia samania henia, do idia kara kava. Do idia gwau idia be tau badadia momokani, vadaeni lebulebu karadia idauidau do idia ura henia bada, to Dirava do idia ura henia maragi. Dirava badinaia kara be toana sibona do idia hedinaraia, to iena anina momokani do idia negea. Inai bamona taudia ibounai dekena amo do oi raka siri.”​—2 Timoteo 3:​1-5.

Reana haida idia gwau taunimanima edia histori ibounai lalonai unai bamona gaudia idia vara, to guna idia be hari bamona idia bada herea lasi. Histori torea taudia bona hereva halasia taudia idia gwau bamona, lagani 1914 murina negana bamona ta be guna tanobada ai ia vara lasi. (Rau 7 itaia.) Unai dika ibounai idia bada momokani, guna bamona lasi. Danu, Keriso ia gwauraia dina gabedia edia toana ita laloa neganai, namona be inai ita laloa: Hari Keriso ena noho bona Basileia edia sivarai idia harorolaia badabada, guna bamona lasi. Haroro gaukara dainai idia vara dagedage iboudiai amo Iehova ena Witnes taudia idia davaria gauna be dika herea momokani. Idia handred momo be Nazi taudia edia dibura kamepadia lalonai idia hamasea. Hari danu, gabu haida dekenai Iehova ena Witnes taudia edia gaukara idia taravatua, bona gabu ma haida ai pulisi ese idia abidia, dibura dekenai idia negedia, idia hahisidia, bona idia hamasedia. Unai ibounai be Iesu ese ia henia toana ena kahana ta.

Apokalupo 11:18 ese ia perovetalaia hegeregerena, Iehova ena Witnes taudia dekenai idia “badu dikadika,” bona unai ese ia hahedinaraia Iehova ena “badu” be unai taudia dekenai do ia ginidae. Unai siri ia gwau danu, Dirava ese ‘tanobada idia hadikaia taudia do ia alaia ore.’ Taunimanima edia histori lalonai, guna tanobada ese mauri gaudia ia durua noho dalana idia hadikaia bada lasi. To, hari be idau! Saiens taudia momo idia gwau, bema taunimanima ese tanobada idia hamiroa noho, mauri gaudia do idia noho diba lasi. To Iehova ese ia karaia “taunimanima idia noholaia” totona, bona unai hamiroa taudia ese tanobada idia do hadikaia vaitani lasi neganai, idia do ia hadikaia ore.​—Isaia 45:18.

BASILEIA HENUNAI TANOBADA AI DO ITA ABIA DIBA HAHENAMO

Baibel idia abia dae taudia momo idia laloa hahemauri idia abia taudia ibounai be guba dekenai do idia noho, unai dainai Dirava ena Basileia henunai taunimanima be tanobada dekenai do idia noho lalohadaina idia hoalaia. Baibel ese ia hahedinaraia taunimanima haida sibona be guba dekenai idia lao, bona tanobada dekenai mauri hanaihanai idia abia taudia be edia namba ita diba lasi hutuma bada. (Salamo 37:​11, 29; Apokalupo 7:9; 14:​1-5) Baibel buka Daniela ena peroveta herevana hegeregerena, Dirava ena Basileia Keriso henunai ese tanobada do ia hahonua bona biagua.

Unuseniai nadi ta, Iehova ena ororo bamona lohia siahuna amo ia makohi, ese Keriso ena Basileia ia laulaulaia. Ia ese tanobada ena bese badadia ia laulaulaia kaivakuku ia botaia bona hadikaia, bona “unai kaivakuku ia botaia nadina be ororo badana ai ia lao, tanobada ibounai ia hahonua.” Bona unai peroveta herevana be ma ia gwau: “Unai king edia nega ai guba Diravana ese basileia ta do ia haginia, nega ta ai do idia hadikaia diba lasi gauna; bena ena lohia siahuna be bese idauna ta do ia abia lasi. Ia ese unai basileia iboudiai do ia hamakohia maragimaragi bona do ia hadokoa, bena do ia gini hanaihanai.”​—Daniela 2:​34, 35, 44, Buka Helağa.

Iehova ena Witnes taudia ese unai Basileia bona Baibel ese ia hahedinaraia helarona, mauri hanaihanai ia goeva bona hairai lou tanobadana lalonai, idia ura oi dekenai idia herevalaia. Hari idia mauri noho taudia milioni momo, bona guri dekenai hari idia noho milioni momo herea ese unai tanobada ai do idia mauri noho diba ela bona hanaihanai. Bena, Keriso Iesu ena Lagani 1000 Lohia Negana lalonai, Iehova ena ura ginigunana, tanobada ia havaraia bona tau bona hahine ginigunadia be ia dekenai ia atoa, be do ia guguru. Unai tanobada Paradaisona be do ita hesikulaia lasi. Adamu ese Eden umana dekenai gaukara ia abia hegeregerena, taunimanima ese gaukara namodia do idia abia tanobada, tubutubu gaudia, bona animal idia naria totona. Idia ese “edia imana gaukara dekenai idia karaia gaudia do idia moalelaia.”​​—Isaia 65:​22; Genese 2:15.

Siri momo amo inai guriguri, Iesu ese ita dekenai ia hadibaia gurigurina, ia guguru negana ita hahedinaraia diba: “Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.” (Mataio 6:10) To, reana inai tamona be hari ia hegeregere: “Gado ta lau kamonai, helai gabuna badana dekena amo ia mai, ia hereva badabada, ia gwau, ‘Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.’ Vadaeni helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ ”​—Apokalupo 21:​3-5.

[Blurb on page 15]

“Nega ena dokona dekenai, metau dikadia momo do idia vara”

TO “dokona be do ia ginidae”

[Picture on page 18]

Netherlands

[Picture on page 18]

Nigeria