Siri Gwauraia Matamaia Namonamo

BAIBEL siridia be eda kongregesen heboudia ai ita dekenai idia hadibaia herevadia edia badina. Danu, Baibel siridia be haroro gaukara lalonai ita herevalaia gaudia edia badina. To, unai ese ita herevalaia gauna idia durua bada totona siri ita gwauraia matamaia namonamo danu be mai anina.

Siri oi gwauraia bena ma ta ida oi duahia hebou sibona be hegeregere lasi. Siri oi gwauraia neganai, tahua gaudia rua oi hagugurua toho: (1) Edia ura oi habadaia, bona (2) unai siri oi gaukaralaia ena badina oi hahedinaraia. Unai tahua gaudia be dala idauidau ai oi hagugurua diba.

Henanadai Oi Henia. Unai dala be namo herea bema kamonai taudia ese haere idia diba lasi. Henanadai oi henia dalana amo taunimanima edia lalona oi veria do idia laloa totona. Iesu be unai ia karaia. Farisea taudia be dubu lalonai ia idia hereva henia bona taunimanima vairanai ena lalo-parara Baibel dekenai idia tohoa neganai, Iesu ese idia ia nanadaia: “Umui ese Keriso be edena bamona umui laloa, ia be daika ena natuna?” Idia haere: “Davida ena natuna.” Bena Iesu ia henanadai: “Edena bamona Davida be Lauma ese ia abia neganai, ‘Lohiabada’ ia gwauraia”? Bena Salamo 110:1 ena hereva ia gwauraia. Farisea taudia idia hereva diba lasi. To, taunimanima be mai moale ida Iesu ena hereva idia kamonai.​—Mat. 22:​41-46.

Haroro gaukara lalonai, reana inai bamona henanadai oi gwauraia diba: “Oi bona lau be mai eda ladana. Dirava be mai ena ladana, a? Haere be Salamo 83:18 ai ita davaria diba.” “Nega ta gavamani tamona ese taunimanima ibounai do ia lohiaia, a? Daniela 2:44 ese unai ia haerelaia dalana mani oi itaia.” “Baibel ese iseda negai idia vara gaudia ia herevalaia, a? Timoteo Iharuana 3:​1-5 ena hereva be oi itaia gaudia ida mani oi hahegeregerea.” “Hisihisi bona mase be do idia ore, a? Baibel ena haere be Apokalupo 21:​4, 5 dekenai ita davaria.”

Pablik tok oi henia neganai, siri gwauraia totona henanadai oi gaukaralaia namonamo dainai, kamonai taudia oi hagoadaia unai siri, idia diba siridia danu, be dala ma ta ai idia laloa totona. To unai bamona do idia laloa, a? Do idia karaia diba bema oi gwauraia henanadai be mai anina bada idia dekenai. Ena be kamonai taudia ese oi herevalaia gauna idia ura henia, nega momo idia kamonai vadaeni siri oi duahia neganai reana gau ma haida idia laloa. Unai ia vara lasi totona, namona be oi herevalaia gauna oi laloa namonamo guna bona edia lalona veria dalanai oi gwauraia.

Hekwakwanai Oi Gwauraia. Hekwakwanai oi gwauraia, bena hanaia totona heduru ia henia sirina ta oi gwauraia. To namo lasi herevalaia dalana dainai kamonai taudia idia laloa haere badana do idia kamonai. Nega momo siri ese hanaia dalana ena kahana sibona ia hahedinaraia. To, kamonai taudia oi noia diba, siri oi duahia neganai, unai hekwakwanai hanaia totona dahaka heduru ia henia do idia laloa.

Unai hegeregerena, Dirava ia abia dae karana ta oi gwauraia bena Baibel ena sivarai amo oi hahedinaraia aonega dalana be unai ita badinaia. Bema siri lalonai gau rua (eiava haida) ese hereva henia tauna ia herevalaia gauna ia hahedinaraia, idia haida ese kamonai taudia idia hagoadaia unai idia tahua totona. Bema toana be kamonai taudia haida dekenai unai be auka, edia lalona oi veria totona dala haida oi gwauraia diba bena oi duahia siri bona ena anina ese haere do idia henia.

Oi Hahedinaraia Baibel be mai Ena Siahu. Bema kamonai taudia edia lalona oi veria vadaeni bona oi herevalaia gauna idia laloa bona ena kahana ta dekenai lalohadai ta eiava haida oi hahedinaraia vadaeni, reana siri oi gwauraia totona oi gwau: “Dirava ena Hereva ese ia gwauraia lalohadai unai gauna dekenai mani oi itaia.” Unai ese ia hahedinaraia dahaka dainai do oi duahia sirina be mai ena siahu.

Iehova ese Ioane, Luka, Paulo, bona Petero bamona taudia ia gaukaralaia Baibel ena kahana idauidau idia torea totona. To idia be toretore taudia sibona; Iehova be Baibel ia Havaraia Tauna. Buka Helaga idia stadilaia lasi taudia oi hereva henia neganai bema siri ta oi gwauraia oi gwau “Petero ia torea” eiava “Paulo ia gwau,” reana unai ena siahu be maragi, to bema oi hahedinaraia unai siri be Dirava ena hereva, ena siahu do ia bada. Namona be ita laloatao, nega haida Iehova ese Ieremia ia hadibaia Iena hereva ia gwauraia neganai inai bamona do ia gwau: “Lohiabada ena hereva do umui kamonai.” (Ier. 7:2; 17:20; 19:3; 22:2) Herevana siri ita gwauraia neganai Iehova ena ladana ita gaukaralaia eiava lasi, to namona be hereva ita do haorea lasi neganai, ita hahedinaraia goevagoeva Baibel be iena hereva.

Badina Siridia Oi Laloa. Siri oi gwauraia dalana oi abia hidi neganai badina siridia oi laloa be namo. Nega haida badina siridia edia hereva oi gwauraia; to, badina siridia be dala ma haida ai mai edia anina emu hereva dekenai. Hegeregere, Dirava ia gari henia tauna Iobu ena hereva bona ena turadia koikoidia edia hereva oi gwauraia daladia be tamona, a? Luka ese Kara bukana ia torea, to ia be ma haida edia hereva ia gwauraia, idia haida be Iamesi, Petero, Paulo, Filipo, Stefano, bona aneru, bona Gamaliela bona Keristani lasi Iuda taudia ma haida edia hereva danu. Oi duahia sirina be daika ena hereva oi gwauraia? Hegeregere, namona be oi laloatao Davida ese salamo iboudiai ia torea lasi bona Solomona ese Aonega Herevadia bukana ibounai ia torea lasi. Danu, namona be oi diba Baibel torea tauna be daika ia hereva henia bona dahaka ia herevalaia.

Diba Ma Haida Gaukaralaia. Unai be namo herea bema oi hahedinaraia diba, oi herevalaia Baibel sivaraina lalonai taunimanima edia noho be oi herevalaia gauna bamona. Nega ma haida, diba ma haida be mai anina bada, siri ena anina lalo-pararalaia totona. Hegeregere, bema mauri davalaia boubouna oi herevalaia neganai Heberu 9:​12, 24 oi gaukaralaia, reana siri oi do duahia lasi neganai palai dubu ena lalona momokani daiutuna oi herevalaia sisina, badina unai siri ia hahedinaraia Iesu be guba dekenai ia daekau neganai unai daiutu ese ia laulaulaia gabuna ai ia vareai. To namo lasi unai hereva be momo herea dainai oi gwauraia siri ia hunia bamona.

Siri oi gwauraia karana oi hanamoa totona idia manada hereva henia taudia edia kara oi itaia. Idia gaukaralaia dala idauidau oi laloa. Unai dala edia namo oi laloa namonamo. Emu hereva oi hegaegaelaia neganai, siri badadia oi itaia, bona oi laloa idia ta ta ese dahaka do idia havaraia be namo. Idia ta ta oi gwauraia dalana oi palanilaia namonamo, anina bada idia havaraia totona. Gabeai, oi gaukaralaia siri iboudiai be unai bamona oi gwauraia. Hereva oi henia lalonai unai kahana ia namo ia lao neganai, Dirava ena Hereva do oi hahedinaraia badabada.