Siri Duahia Lalonai Anina Hahedinaraia

HEREVANA tau ta dekenai eiava platfom amo Dirava ena ura oi herevalaia, namona be Dirava ena Hereva oi herevalaia bada. Unai totona Baibel amo siri oi duahia, bona oi duahia namonamo be namo.

Anina Hahedinaraia Neganai Hemami Oi Hahedinaraia. Namona be Baibel siridia oi duahia neganai emu hemami ia hedinarai. Haheitalai haida mani oi laloa. Salamo 37:11 oi duahia badabada neganai, namona be unai siri ese ia gwauhamatalaia mainona dainai emu gado regena amo moale oi hahedinaraia. Apokalupo 21:4 ai hisihisi bona mase be do idia ore herevana oi duahia neganai, namona be emu gado regena ese ia hahedinaraia unai gwauhamata namona oi laloa bada. Apokalupo 18:​2, 4, 5, lalonai ia noho noinoi herevana, kara dika “Babulonia badana” rakatania totona, oi duahia neganai, karaharaga mamina ia hedinarai be namo. Emu kudouna amo unai hemami oi hahedinaraia, to unai hemami oi habadaia kava lasi. Hemami oi hahedinaraia dalana maorona be unai siri bona do oi gaukaralaia dalana amo oi laloa.

Hereva Maorodia Oi Hahedinaraia. Bema siri ta ena kahana sibona do oi herevalaia, oi duahia neganai unai kahana oi hahedinaraia be namo. Hegeregere, Mataio 6:33 oi duahia neganai, inai hereva “iena kara maoromaoro” eiava “unai gau ibounai” oi hahedinaraia lasi bema oi ura ‘Basileia tahua guna’ karana ena anina oi herevalaia.

Hesiai Hebou ena hereva ta lalonai, reana oi ura Mataio 28:19 oi duahia. Edena hereva oi hahedinaraia? Bema oi ura Baibel stadi hamatamaia totona kamonai taudia oi hagoadaia, inai hereva “diba tahua taudia do umui halaoa” oi hahedinaraia. To, bema oi ura hahedinaraia Keristani taudia edia maduna be edia tano ai idia noho idau tano taudia dekenai hereva momokani do idia harorolaia eiava oi ura pablisa haida oi hagoadaia haroro taudia be momo lasi gabuna dekenai do idia lao, reana inai hereva “bese ibounai” oi hahedinaraia.

Nega momo siri idia duahia, henanadai haerelaia totona eiava haida ese idia daradaralaia herevana hamomokania totona. Bema dala tamona ai siri ena hereva iboudiai oi hahedinaraia, reana kamonai taudia ese oi duahia ena badina idia itaia lasi. Reana oi be unai oi diba namonamo to idia diba lasi.

Hegeregere, Dirava ena ladana idia torea Baibel ta amo Salamo 83:18 oi duahia neganai, bema inai hereva “Ataiai Momokani Diravana” oi hahedinaraia, reana ruma tauna ia itaia lasi Dirava be mai ena ladana. Namona be unai ladana “Iehova” oi hahedinaraia. To, Iehova ena lohia siahuna oi herevalaia lalonai unai siri tamona oi gaukaralaia neganai, inai hereva “Ataiai Momokani Diravana” oi hahedinaraia. Unai hegeregerena, abidadama dekenai kara hakapua be mai anina oi hahedinaraia totona Iamesi 2:24 oi duahia neganai, bema “idia maoromaoro” oi hahedinaraia to “kara” oi hahedinaraia bada lasi, kamonai taudia haida ese oi herevalaia gauna do idia lalo-pararalaia maoro lasi.

Ita ia durua haheitalai ma ta be Roma 15:​7-13 ai ita itaia diba. Unai be aposetolo Paulo ese Iuda lasi taudia bona Iuda taudia idia noho kongregesen dekenai ia siaia revarevana ena hereva ta. Unai siri ai aposetolo tauna ia gwau Keriso ena hesiai gaukara ese kopina utua Iuda taudia sibona lasi, to idau bese taudia ia durua danu, “Iuda lasi bese idauidau taudia ese danu Dirava idia hanamoa diba” totona. Bena Paulo ese siri foa edia hereva ia gwauraia, idau bese taudia dekenai unai dala ia kehoa ia hahedinaraia totona. Edena dala ai Paulo ia gwauraia herevadia oi duahia, ia laloa gauna oi hahedinaraia totona? Bema do oi hahedinaraia herevadia oi makaia, reana siri 9 ai inai hereva “Iuda lasi taudia,” siri 10 ai “Iuda lasi taudia e,” siri 11 ai “Iuda lasi taudia ibounai e” bona “taunimanima ibounai e,” bona siri 12 ai “bese idauidau” oi makaia. Roma 15:​7-13 oi duahia bona unai hereva idauidau oi hahedinaraia. Unai oi karaia neganai, Paulo ia herevalaia gauna ia hedinarai goevagoeva bona lalo-pararalaia be auka lasi.

Hahedinaraia Daladia. Anina bada herevadia be dala idauidau ai oi hahedinaraia diba. Namona be oi gaukaralaia dalana be unai siri bona hereva oi henia dalana hegeregerena. Dala haida be henunai idia hedinarai.

Gado Regena. Anina be sentens ena mai anina herevadia idia hedinarai totona emu gado regena oi haidaua daladia ibounai. Reana unai ia vara bema gado regena oi habadaia eiava hamaragia. Gado momo ai, hereva ena tiuni haidaua karana ese mai anina herevadia ia hahedinaraia. To, gado haida ai unai ese anina ia haidaua danu. Bema mai anina herevadia be oi duahia metaira, edia anina oi hagoadaia. Hereva haida hahedinaraia totona gado regena idia haidaua diba lasi gadodia ai, idia karaia diba gaudia do idia karaia mai anina herevadia hahedinaraia totona.

Laga-Ani. Siri lalonai mai anina kahana vairanai eiava murinai​—eiava unai nega ruaosi ai​—unai oi karaia diba. Lalohadai badana ena vairanai oi laga-ani dainai, do idia ura kamonai; ena murinai oi laga-ani karana amo lalohadai ena siahu oi habadaia. To, bema oi laga-ani momo, gau ta ia hedinarai lasi.

Gwauraia Lou. Hereva badana ta oi hahedinaraia diba bema duahiduahi oi hadokoa bona hereva ta eiava hereva haida oi duahia lou. Nega momo dala namona be siri ibounai oi duahia haorea bona murinai mai anina herevadia oi gwauraia lou.

Imana Gaukaralaia. Nega momo imana oi gaukaralaia eiava vairana ena toana amo hereva ta eiava hereva haida edia mamina oi hahedinaraia diba.

Gado Regena Ena Tiuni. Gado haida ai, tiuni idauna amo hereva haida idia duahia bona edia anina idia hahedinaraia. Unai neganai danu, dala maorona ai oi karaia be namo, bona hahemaraia hevaseha dalanai oi duahia neganai oi naria namonamo.

Ma Haida ese Siri Idia Duahia Neganai. Ruma tauna ese siri ia duahia neganai, reana hereva kereredia ia hahedinaraia eiava hereva ta ia hahedinaraia lasi. Dahaka oi karaia diba? Namona be unai siri oi herevalaia bona ena anina oi hahedinaraia goevagoeva. Anina oi hahedinaraia murinai, reana mai anina herevadia Baibel lalonai be ia dekenai oi hahedinaraia.