STADI 29

Gado Regena Namona

TA ENA hereva bona hereva dalana be mai anina bada. Bema oi ia hereva henia tauna ena gado regena ese lalo-namo, lalokau, bona hebogahisi ia hahedinaraia, ena hereva oi ura kamonai, to bema ia auka bona namo lasi neganai oi ura lasi kamonai, ani?

Gado regena namona be hereva dalana sibona amo ia vara lasi. Ta ena kara be mai anina danu. Ta ese Baibel ena hereva momokani ia dibaia bona badinaia noho neganai, ena hereva dalana ia idau. Ena gado regena ese lalokau, moale, bona hebogahisi ia hahedinaraia. (Gal. 5:22, 23) Ma haida edia namo ia laloa momokani neganai, ena gado regena ese unai ia hahedinaraia. Maumau karana ia rakatania bona tanikiu karana ia dibaia neganai, unai be ia gwauraia herevadia bona ena gado regena ai ia hedinarai. (Lal. 3:39-42; 1 Tim. 1:12; Iuda 16) Ena be tatau rua be oi diba lasi gadona ai idia hereva, to bema ta ena gado regena ese hekokoroku, kara auka, bona maumau karana ia hahedinaraia bona ma ta ena gado regena ese manau, haheauka, hebogahisi, bona lalokau ia hahedinaraia, unai ena idau oi kamonai.

Nega haida ta ena gado regena ia namo lasi, badina gorere ta ese ena gadona nadina ia hadikaia eiava ia vara negana amo gadona be mai ena dika ta. Reana unai dika ia bada dainai hari inai nega lalonai do ia namo lasi. To nega momo, hereva idia havaraia kahadia gaukaralaia namonamo dalana idia dibaia karana ese gado regena ia hanamoa diba.

Namona be ita laloaboio lasi taunimanima ta ta edia gado regena ena toana be idau. Namo lasi oi ura ma ta ena gado regena oi tohotohoa. To, namona be sibona emu gado regena, bona ena toana idauidau, oi hanamoa toho. Dahaka ese oi ia durua diba? Dala badadia be rua.

Emu Hahodi Biagua Namonamo. Emu gado regena oi gaukaralaia namonamo totona hodahoda bada oi abia bona emu hahodi oi biagua namonamo be namo. Bema lasi, emu gado regena ia goada lasi, bona oi hereva neganai hereva oi hadokoa hanaihanai.

Baragi idia bada kahana be kemena kahana dekenai lasi; unuseniai iseda pagana turiadia dainai unai kahana ena toana be ia bada. To, baragi idia bada kahana be daiafram ataiai. Unai daiafram be eda ruduna edia henuna turiadia dekenai ia kamokau, ia be kemena bona bogana huanai.

Bema hahodi neganai emu baragi edia ataiai kahana sibona oi hahonua, karaharaga do oi laga-tuna. Emu gado regena do ia goada lasi, bona do oi hesiku haraga. Oi hahodi namonamo totona oi helai eiava oi gini maoro bona emu pagana be murina dekenai oi halasia lao. Oi hereva totona oi hahodi neganai, emu kemena ena ataiai kahana sibona oi habadaia lasi. Emu baragi edia henuna kahana oi hahonua guna. Unai kahana oi hahonua neganai, emu ruduna ena henuna kahadia idia habadaia. Nega tamona ai daiafram ia diho, bena bogana bona bogarau be edia gabu amo ia doria diho, bena emu beleta eiava dabua ese emu gabana ia gigia be do oi mamia. To emu baragi be unuseniai lasi; idia be ruduna lalonai. Emu hahodi dalana oi tohoa totona, emu imana amo emu ruduna edia henuna kahadia oi dogoatao. Oi hahodi namonamo. Bema dala maorona ai oi hahodi, emu bogana be do ia vareai lasi bona emu pagana do oi abia isi lasi. To, oi mamia emu rudu turiadia do idia daekau bona idia bada sisina.

Murinai, hodahoda halasia dalana oi tohoa. Hodahoda ibounai oi halasia haraga be namo lasi. Metairametaira oi halasia be namo. Emu gadona ha-aukaia karana amo unai oi biagua toho lasi. Bema unai bamona oi karaia, daudau lasi murinai gado regena ia dika bona ena tiuni ia daekau momokani. Bogana ena masolo bona rudu turiadia ta ta huanai idia noho masolo ese hodahoda idia halasia, bona daiafram ese halasia ena haraga ia biagua.

Tau ta be heau helulu totona ia treinini hegeregerena, hereva henia tauna ese hahodi biagua dalana ia dibaia diba. Oi gini maoro bona emu pagana be murinai oi halasia lao, baragi edia henuna kahana hahonua dalanai oi hahodi, bona hodahoda oi halasia metairametaira lalonai namba oi duahia, oi duahia namba oi habadaia toho. Bena unai bamona oi hahodi lalonai hereva ta oi duahia badabada.

Masolo Aukadia Oi Hamanokaia. Gado regena hanamoa dalana badana ma ta be inai—masolo oi hamanokaia! Oi hereva lalonai masolo oi hamanokaia dalana oi diba neganai, emu gado regena do oi hanamoa bada. Namona be emu lalona ia maino danu, badina lalo-hekwarahi ese masolo ia ha-aukaia.

Lalo-hekwarahi hamaragia totona kamonai taudia dekenai lalohadai maorona oi abia. Bema idia be haroro gaukara lalonai oi davaria taudia, namona be oi laloatao, ena be hua haida sibona lalonai Baibel oi stadilaia, to Iehova ena ura dekenai diba namona oi abia vadaeni bona idia dekenai oi hahedinaraia diba. Bona idia oi vadivadi henia ena badina be heduru idia abia be namo, herevana unai idia diba eiava lasi. To, bema Kingdom Hall dekenai oi hereva, kamonai taudia momo be Iehova ena taunimanima. Idia be emu turadia, bona idia ura do oi kwalimu. Hereva idia henia taudia ibounai amo, ita sibona be unai bamona hebou taudia mai edia lalo-moale bona lalokau ita hereva henia hanaihanai.

Gadona ena masolo oi laloa noho bona idia oi hamanokaia. Oi laloatao, gadona varodia edia huana amo hodahoda oi halasia neganai, idia mareremarere. Unai masolo idia auka bona idia manoka neganai gado regena ena tiuni ia idau, gita eiava vaiolin edia varo idia ha-aukaia bona hamanokaia neganai edia tiuni ia idau bamona. Gadona varodia oi hamanokaia neganai, gado regena ia diho. Danu, gadona ena masolo oi hamanokaia neganai udu baubau kohua idia kehoa, bona unai ese emu gado regena ia hanamoa bada.

Emu tauanina ibounai—emu tuina, emu imana, emu pagana, emu aiona—ia auka lasi be namo. Unai ia namo badina emu gado regena ese emu tauanina ena kahana idauidau ia hamarerea neganai, ia bada ia lao bona daudau dekenai idia kamonai diba. Unai bamona ia vara bema tauanina ibounai be rege habadaia gauna bamona, to ia vara lasi bema tauanina ia auka. Gadona nadina lalonai ia vara gado regena be udu baubau kohuadia sibona lasi to kemena ena turia, isena, udu guhina, bona baguna kohuadia ia botaia danu. Unai iboudiai ese gado regena idia habadaia. Bema metau gauna ta be gita ena tauanina latanai oi atoa, gita ena rege do ia maragi; gita ena rege ia bada totona ena tauanina ia mareremarere be gau badana. Iseda tauanina lalonai masolo ese idia hakapua turiadia be unai bamona danu. Tauanina be unai bamona ia mareremarere dainai, emu gado regena oi haidaua diba bona hemami idauidau oi hahedinaraia diba. Taunimanima hutuma oi hereva henia neganai danu emu gado regena oi hadikaia lasi.

GADO REGENA IA VARA DALANA

Baragi amo hodahoda oi halasia karana be gado regena ia vara ena badina. Baragi ese gado baubau amo hodahoda be emu gadona nadina lalonai ia doria vareai. Unai gadona nadina lalonai, ena kahana rua ai, be gadona varodia eiava idia lokua masolo maragimaragidia rua idia noho. Unai be gado regena havaraia gaudia badadia. Unai lokua masolo idia kehoa bona koua, gadona nadina ena matu lalona amo hodahoda ia heau totona bona momoru be baragi lalonai ia vareai lasi totona. Ta ia hahodi neganai hodahoda be gadona varodia huana amo ia heau neganai rege ia havaraia lasi. To bema ia ura hereva, masolo ese gadona varodia idia ha-aukaia, bona baragi amo ia mai hodahoda be idia huana amo ia heau neganai unai varo idia mareremarere. Unai ese gado regena ia havaraia.

Gadona varodia idia auka neganai, idia mareremarere haraga bona gado regena ia daekau. To, gadona varodia idia manoka neganai, gado regena ia diho. Gado regena be gadona nadina amo gadona ena ataiai kahana dekenai ia hanaia. Unai murinai, uduna bona udu baubau kohua lalonai ia vareai. Unai kahadia ese gado regena ena tiuni idia haidaua bona habadaia. Udu guhina bona malana, isena, udu bibinadia, bona aukina ese gado regena idia hapararaia, bena ita lalo-pararalaia diba herevadia idia vara.

Taunimanima edia gado regena be hoa gauna badana, taunimanima idia karaia miusiki gaudia ibounai ia hereaia. Ia ese hemami idauidau, gado regena namona mai lalokauna amo ela bona badu dikadika ena regena aukana, ia hahedinaraia diba. Gado regena ita hanamoa namonamo neganai, ia daekau bona diho badabada diba bona ia ese miusiki hairai sibona lasi to kudouna hamarerea herevadia ia halasia diba danu.

HEKWAKWANAI HAIDA HANAIA DALADIA

Gado regena ia manoka. Reana ta ena gado regena be ia manada, to unai be manoka lasi. Bema ena tiuni ia namo, ma haida ese idia kamonai mai moale ida. To hereva ese anina ia havaraia totona, ena bada ia hegeregere be namo.

Emu gado regena ia lao daudau totona, namona be gado regena habadaia dalana oi hanamoa. Unai totona emu tauanina ibounai ia auka lasi dalana oi dibaia be namo, inai kahana ai ita herevalaia bamona. Heduru abia totona, tauanina ibounai oi hamanokaia be namo bona uduna bona malana oi gaukaralaia lasi dalanai uduna lalonai ane ta ena regena oi havaraia. Udu bibinadia idia kamokau sisina sibona, oi koua auka lasi. Unai dala ai ane ena regena oi havaraia neganai, emu kwarana bona kemena lalonai marere mamina oi abia.

Nega haida emu gado regena ia manoka eiava ena toana ia namo lasi, badina oi gorere eiava oi mahuta namonamo lasi. Bema unai gaudia idia namo neganai, emu gado regena do ia namo lou.

Gado regena ia daekau momokani. Gadona varodia idia auka neganai, gado regena ia daekau. Lalo-hekwarahi ia hahedinaraia gado regena dainai, kamonai taudia edia lalona ia namo lasi. Gadona masolo oi hamanokaia neganai gadona varodia oi hamanokaia, bona gado regena ia diho. Dina ta ta ai oi herevahereva neganai, unai oi karaia toho. Oi hahodi namonamo karana ese ia durua danu.

Udu baubauna amo ia mai gado regena. Nega haida inai hekwakwanai be udu baubauna ia koua dainai ia vara, to nega momo be unai bamona lasi. Nega haida ta ese ena gadona bona uduna masolo ia ha-aukaia dainai, udu baubau ena matu ia koudia bona hodahoda ia heau namonamo lasi. Unai dainai gado regena ia idau. Unai ia vara lasi totona unai masolo ia hamanokaia be namo.

Gado regena ia auka. Unai bamona gado regena ese mai lalo-moale ida herevahereva dalana ia hadikaia. Reana ma haida idia laloa hereva henia tauna ia badu.

Nega haida, ta ese ena kara ia haidaua toho be heduru gauna badana. (Kol. 3:8, 12) Bema unai ia karaia vadaeni, reana hereva hanamoa daladia ia badinaia amo heduru ia abia diba. Gadona bona aukina ia hamanokaia. Unai ese gado regena ia hanamoa bona uduna kehoa namonamo lasi karana amo ena gado regena ia hadikaia lasi.