Hereva Ia Maoro Momokani

REANA dahaka dainai Keristani tauna ese ia momokani lasi herevana ia gwauraia? Reana ia kamonai herevana ta ia gwauraia, to ia momokani eiava lasi be ia sekea lasi. Eiava reana gau ta ena anina ia habadaia kava badina ia diba lasi ia ese sivarai ia duahia kerere. Gau maragidia danu be ita gwauraia maoro totona ita tahua namonamo neganai, kamonai taudia idia diba momokani ita gwauraia hereva badadia idia maoro danu.

Haroro Gaukara Lalonai. Taunimanima momo idia itaia gau momo idia do diba lasi neganai, idia gari dainai haroro gaukara idia hamatamaia lasi. To, karaharaga do idia davaria haroro totona idia hegeregere, herevana hadibaia hereva badadia sibona idia diba. Edena bamona? Hegaegae karana be mai anina bada.

Haroro gaukara dekenai oi do lao lasi neganai, oi ura herevalaia gauna oi dibaia namonamo guna. Kamonai taudia ese reana do idia gwauraia henanadai oi laloa. Baibel amo haere namodia oi tahua. Unai ese oi do ia durua haere maorodia oi henia bona oi lalo-hekwarahi lasi. Baibel stadi do oi karaia, a? Do umui stadilaia gauna oi itaia namonamo. Namona be oi lalo-parara edena dala ai idia noho Baibel siri ese idia printaia henanadai edia haere idia hamomokania.

Bema ruma tauna eiava gaukara turana ese henanadai ta ia henia to haere oi diba lasi be edena bamona? Bema haere oi diba lasi, oi gwauraia kava lasi. “Kara maoromaoro taudia ese, haere idia henia neganai idia laloa namonamo guna.” (Aon. 15:28) Reana Buka Helaga Herevalaia bukana eiava Bible Ena Hereva Badadia buklet lalonai haere do oi davaria bema emu gado ai idia noho. Bema oi dekenai idia noho lasi, oi gwau diba do oi tahua bena oi giroa lou. Bema henanadai tauna be kudou maoro tauna, haere maorona abia totona do ia naria. Oibe, reana emu manau karana ia laloa bada danu.

Idia manada pablisa taudia ida oi haroro neganai, diba oi abia Dirava ena Hereva oi gaukaralaia namonamo totona. Idia gaukaralaia siridia bona idia herevalaia dalana oi itaia. Mai manau ida idia henia sisiba oi abia dae. Hahediba tauna goadana Apolo ese ma haida amo heduru namona ia abia. Luka ia gwau Apolo be “mai ena aonega” bona “ia diba momo,” “sivarai ia gwauraia mai siahu danu,” bona “iena hadibaia hereva be maoromaoro.” To, gau iboudiai ia lalo-pararalaia lasi. Prisikila bona Akwila ese unai idia itaia neganai, “edia ruma dekenai idia hakaua lao, bona idia ruaosi ese Dirava ena dala ibounai idia hadibaia maoromaoro.”​—Kara 18:​24-28.

‘Hereva Momokani Badinaia.’ Namona be kongregesen dekenai ita henia hereva ese idia hahedinaraia ita abia dae momokani kongregesen be “hereva momokani ena du, bona hereva momokani ia gimaia maguna.” (1 Tim. 3:15) Hereva momokani ita abia isi totona, ita gaukaralaia siri edia anina ita lalo-pararalaia maoro be gau badana. Edia badina siridia bona edia anina oi laloa.

Kongregesen hebou dekenai oi gwauraia gauna be reana ma ta ese do ia gwauraia lou. Momokani, “ita ibounai ese nega momo kerere ita karaia.” (Iam. 3:2) To bema hereva maorodia gwauraia totona durua daladia oi manadalaia, namo bada do oi davaria. Tiokratik Haroro Sikuli lalonai idia vareai tadikaka momo be gabeai elda taudia ai do idia lao. Unai maduna idia abia taudia “dekena amo gau momo do idia tahua.” (Luka 12:48) Bema elda ta ia laloa namonamo lasi dainai ena sisiba ia maoro lasi bena kongregesen taudia ese hekwakwanai badadia idia davaria, Dirava ese unai elda tauna be reana do ia lalo-namo henia lasi. (Mat. 12:​36, 37) Unai dainai, namona be elda ai ia lao tadikaka ese “hereva momokani, ita abidadama henia bona ita hadibaia gauna, do ia badinaia momokani.”​—Tito 1:9.

Namona be oi gwauraia lalohadai be Baibel ena “hereva momokani” ida idia hegeregere. (2 Tim. 1:13) To namo lasi unai dainai oi gari. Reana Baibel ibounai oi do duahia ore lasi. Unai oi karaia noho. To unai oi karaia noho lalonai, emu hadibaia gaukara ai oi ura gaukaralaia gaudia oi laloa neganai, henunai idia noho hereva ese oi idia durua daladia oi itaia.

Guna, oi sibona oi nanadaia: ‘Inai hereva be Baibel amo lau dibaia vadaeni gaudia ida ia hegeregere, a? Ia ese Iehova kahirakahira kamonai taudia ia veria, eiava tanobada ena aonega ia abia isi, bona taunimanima ia hagoadaia unai aonega idia badinaia totona, a?’ Iesu ia gwau: “Oiemu hereva be hereva momokani.” (Ioa. 17:17; Deu. 13:​1-5; 1 Kor. 1:​19-21) Murinai, hesiai tauna oreana ese ia karaia stadi gaudia oi gaukaralaia namonamo. Unai ese oi ia durua dainai, siri do oi lalo-pararalaia maoro bona mai laloa maoromaoro ida edia anina do oi hahedinaraia diba. Bema emu hereva be “hereva momokani” ida ia hegeregere bona Iehova ese ita ia hadibaia gaudia amo siri edia anina bona badinaia daladia oi hahedinaraia, emu hereva be do ia maoro.

Oi Abia Herevadia Hamomokania Daladia. Gau ta oi haheitalaia bona ena anina oi hahedinaraia neganai, niusi herevadia, magasin eiava buka edia hereva, bona ekspiriens be oi idia durua diba. To edena bamona oi hamomokania diba unai gaudia idia maoro? Dala ta be oi abidadama henia diba gabudia amo idia oi abia. Namona be oi hamomokania hari danu idia maoro. Namba be reana idia gunana vadaeni; saiens taudia ese gau matamatadia idia davaria; bona taunimanima ese histori ena sivarai bona idaunegai gado dekenai edia diba idia habadaia dainai edia lalohadai gunadia idia tahua namonamo lou. Oi naria namonamo bema niuspepa, televisen, reidio, eiava kompiuta amo sivarai oi abia gwauraia. Aonega Herevadia 14:15 ia gwau: “Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.” Oi sibona oi nanadaia: ‘Hanaihanai inai hereva idia halasia taudia edia hereva be maoro, a? Dala ma ta ai inai hereva ena maoro lau hamomokania diba, a?’ Bema oi laloa hereva ta be reana ia maoro lasi, oi gaukaralaia lasi be namo.

Hereva idia halasia taudia oi abidadama henia diba eiava lasi oi laloa sibona lasi, to unai hereva oi ura gaukaralaia dalana oi laloa danu. Namona be hereva ta eiava namba haida oi gaukaralaia dalana be idia halasia dalana ida ia hegeregere. Namo lasi hereva ta oi ura hagoadaia dainai “taunimanima haida” oi gwauraia “taunimanima momo,” “taunimanima momo” oi gwauraia “iboudiai,” bona “nega haida” oi gwauraia “hanaihanai.” Bema lalohadai ta eiava sivarai ta ena namba, bada, eiava anina oi habadaia kava, emu hereva idia hamomokania karana do idia daradaralaia.

Bema oi hekwarahi emu hereva ia maoro totona, do idia abia dae oi be hereva momokani matauraia tauna. Unai dainai Iehova ena Witnes taudia do idia hanamoa. Bona gau badana be, unai kara ese Iehova, “kara momokani ena Dirava,” ia hanamoa.​—Sal. 31:5.