Karoa 2
Dirava Momokani Tamona Iehova Hanamoa
1. Dirava momokani tamona be daika?
BAIBEL ia gwau, ena be dirava idauidau be momo, “to ita be mai iseda Dirava tamona, ia be Tamana.” (1 Korinto 8:5, 6) Unai “Dirava tamona” be Iehova, gau iboudiai ia Havaraia Tauna. (Deuteronomi 6:4; Apokalupo 4:11) Iesu ese ia gwauraia “egu Dirava bona emui Dirava.” (Ioane 20:17) Ena hereva be Mose ena hereva bamona, ia be guna ia gwau: “Lohiabada . . . sibona be Dirava, dirava ma ta be lasi.” (Deuteronomi 4:35) Taunimanima ese idia tomadiho henia gaudia, hegeregere kaivakuku, dirava ai idia halaoa taudia, bona Iehova ena inai tauna Satani Diabolo—“inai tanobada ena dirava”—be Iehova ese ia hereaia. (2 Korinto 4:3, 4) Unai iboudiai amo Iehova be idau, Iesu ia gwau bamona Iehova be “Dirava momokani tamona.”—Ioane 17:3.
2. Dirava ita dibaia neganai, edena dala ai iseda mauri do ia idau?
2 Dirava ena kara namodia, bona ita totona ia karaia vadaeni bona do ia karaia gaudia, idia dibaia bona idia laloa bada taudia idia ura ia kahirakahira idia lao. Edia lalokau Iehova dekenai ia bada ia lao neganai, idia ura ia idia hanamoa. Edena dala ai? Dala ta be, ma haida dekenai ena sivarai idia harorolaia. Roma 10:10 ia gwau: “Abidadama be iseda uduna dekenai ita gwauraia hedinarai.” Dala ma ta be, iseda hereva bona kara amo ia ita tohotohoa. Efeso 5:1 ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” Unai ita karaia namonamo diba totona, Iehova ena kara korikorina ita diba be namo.
3. Dirava ena kara badadia be dahaka dahaka?
3 Baibel lalonai hereva momo ese Dirava ena kara badadia idia hahedinaraia. Iena kara badadia foa be aonega, kota maorona, siahu, bona lalokau. ‘Aonega be Dirava dekenai ia noho.’ (Iobu 12:13) “Kota maorona ia ura henia noho.” (Salamo 33:5) “Iena siahu be bada herea.” (Isaia 40:26) “Dirava be lalokau.” (1 Ioane 4:8) To, Dirava ena kara badadia foa amo, Dirava ena lalohadai badana ia hahedinaraia goevagoeva kara hereadaena be dahaka?
“Dirava be Lalokau”
4. Dahaka kara dainai Dirava ese unives bona mauri gaudia ibounai ia havaraia?
4 Mani oi laloa, dahaka kara dainai Iehova ese unives bona lauma bona taunimanima mai edia aonega ia havaraia. Iena aonega eiava siahu dainai, a? Lasi, ena be Dirava ese unai kara ia gaukaralaidia, to idia dainai lasi. Bona iena kota maorona dainai mauri ena harihari gauna be ma haida dekenai ia henia lasi. To, Dirava ena lalokau badana dainai ia ura lauma bona taunimanima mai edia aonega ese mauri do idia moalelaia danu. Lalokau dainai ia ura ia idia kamonai henia taudia be Paradaiso lalonai do idia mauri noho ela bona hanaihanai. (Genese 1:28; 2:15) Lalokau dainai dala ia kehoa, Adamu ena kara dika ese taunimanima dekenai ia havaraia dika ia kokia totona.
5. Baibel ena hereva hegeregerena, Iehova be edena kara ia hahedinaraia tauna korikorina, bona dahaka dainai?
5 Unai dainai, Dirava ena kara iboudiai amo, lalokau be hereadae. Lalokau be ia hahedinaraia karana badana. Iena aonega, kota maorona, bona siahu be mai anina bada, to Baibel ia gwau lasi Iehova be unai karadia ta. To ia gwau ia be lalokau. Oibe, Iehova ese lalokau ena anina korikorina ia hahedinaraia. Hemami lasi, to hakaua herevadia ese unai lalokau idia biagua. Hereva momokani bona kara maoromaoro hakaua herevadia ese Dirava ena lalokau idia biagua. Unai be lalokau hereadaena, Iehova Dirava ese ia hahedinaraia lalokauna unai. Ta ese ena ura ia dadaraia sibona neganai unai lalokau ia hahedinaraia diba, bona hanaihanai ena kara amo ena lalokau ia hamomokania.
6. Dahaka dainai Dirava ita tohotohoa diba, herevana ia ese ita ia hereaia momokani?
6 Unai lalokau hereadaena dainai, ita ese unai bamona Dirava ita tohotohoa diba. Reana ita laloa unai dekenai ita kwalimu diba lasi badina ita be anina lasi, goevadae lasi, bona kerere momo ita karaia taudia. To Iehova ena lalokau badana ia hahedinaraia gauna ma ta be inai: Iseda manoka ia diba bona ia lalo-parara kara goevadaedia ita karaia diba lasi. Ia diba hari ita be mauri goevadaena amo ita daudau. (Salamo 51:5) Unai dainai Salamo 130:3, 4 ia gwau: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba? To oi ese aiemai dika oi gwauatao noho.” Oibe, Iehova be ‘hebogahisi bona hariharibada Diravana, badu dekenai ia haraga lasi, to hebogahisi bona lalokau dekenai ia haraga.’ (Esodo 34:6) “Lohiabada e, oi be mai oiemu bogahisihisi, bona kara dika oi gwauatao noho.” (Salamo 86:5) Unai ese iseda lalona ia hagoadaia! Ita ese unai Dirava namo hereana ita hesiai henia bona ia ese mai lalokau bona hebogahisi ida ita ia naria be lalo-maino ia havaraia gauna!
7. Edena dala ai Iehova ena lalokau be ia havaraia gaudia ese idia hahedinaraia?
7 Iehova ena lalokau be ia havaraia gaudia ese idia hahedinaraia danu. Iehova ese iseda moale totona ia havaraia gaudia momo, hegeregere ororo, uda, gohu, bona davara mai edia hairai, mani oi laloa. Edia mamina ita moalelaia bona eda tauanina idia durua totona aniani idauidau momo herea ia henia. Danu, Iehova ese mai hairai bona bonana namona flaoaflaoa bona iseda lalona idia hamoalea animal idauidau ia havaraia. Ia ese taunimanima idia hamoalea gaudia ia karaia, herevana ta ese ia doria lasi. Momokani, ita be goevadae lasi bona inai tanobada dikana lalonai ita noho dainai, ia havaraia gaudia ita moalelaia momokani diba lasi. (Roma 8:22) To Iehova ese Paradaiso lalonai ita totona do ia karaia gaudia mani oi laloa! Salamo torea tauna ese ita ia hamaoroa: “Oi be emu imana oi kehoa noho bena mauri gaudia ibounai edia ura [maorodia] oi hagugurua noho.”—Salamo 145:16, NW.
8. Iehova ese ita dekenai ena lalokau ia hahedinaraia karana badana be dahaka?
8 Iehova ese taunimanima dekenai ena lalokau ia hahedinaraia karana badana be dahaka? Baibel ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Taunimanima edia namo dainai Iehova ese unai ia karaia, a? Roma 5:8 ese haere ia henia, ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” Oibe, Dirava ese ena Natuna goevadaena be tanobada dekenai ia siaia, mauri davalaia boubouna ia henia bona unai dala ai kara dika bona mase amo ita ia ruhaia totona. (Mataio 20:28) Unai ese Dirava idia lalokau henia taudia dekenai dala ia kehoa, mauri hanaihanai idia abia totona. Dirava ita tanikiu henia, badina iena ura idia ura karaia taudia ibounai dekenai lalokau ia hahedinaraia, Baibel ese ita ia hadibaia bamona, ia gwau: “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”—Kara 10:34, 35.
9. Iehova ese iseda mauri davana karaia totona iena Natuna ia henia dainai, edena bamona iseda mauri ita gaukaralaia be namo?
9 Iehova ese iseda mauri davana karaia totona iena Natuna ia henia bona unai amo mauri hanaihanai dalana ia kehoa dainai, edena bamona iseda mauri ita gaukaralaia be namo? Namona be unai kara ese iseda lalokau Dirava momokanina Iehova dekenai ia hagoadaia. Bona namona be ita ia veria Iesu, Dirava ia hahedinaraia tauna, ita kamonai henia totona. “Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Korinto 5:15) Iesu ena aena gabudia dekenai ita raka be moale gauna, badina ia ese Iehova ena lalokau bona hebogahisi tohotohoa karana dekenai haheitalai namona ia hahedinaraia! Unai be Iesu ese manau taudia dekenai ia hamaoroa herevana amo ia hedinarai, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.”—Mataio 11:28-30.
Ma Haida Ita Lalokau Henia
10. Edena dala haida ai ita hahedinaraia diba iseda Keristani tadikaka ita lalokau henidia?
10 Edena dala ai ita hahedinaraia diba iseda Keristani tadikaka ita lalokau henidia, Iehova bona Iesu ese ita idia lalokau henia hegeregerena? Unai ita karaia diba daladia momo mani oi laloa: “Lalokau be ia dekenai ia kara dika tauna davana ia laloa lasi. Lalokau be mai ena bogahisihisi, haida durua totona. Lalokau be kohu momo tauna ia mama henia lasi. Lalokau be ia heagi lasi, bona ia hekokoroku lasi. Lalokau be haida hadikaia ia ura lasi. Lalokau be sibona ena gau ia tahua lasi, ia badu haraga lasi. Haida ese idia kara dika henia, to lalokau ese edia dika ia laloatao noho lasi. Lalokau be taunimanima edia kara gagevagageva ia moalelaia lasi. To Dirava ena kara bona iena hereva momokani ia moalelaia. Lalokau be taunimanima durua kara dekenai ia hesiku lasi. Nega ibounai iena abidadama ia goada noho. Nega ibounai Dirava ena gwauhamata ia naria noho mai moale danu. Bona metau ibounai lalonai ia gini goada noho. Lalokau be do ia noho hanaihanai doko lasi.”—1 Korinto 13:4-8; 1 Ioane 3:14-18; 4:7-12.
11. Daidia danu ita lalokau henia be namo, bona edena dala ai?
11 Daidia danu ita lalokau henia be namo, bona edena dala ai? Iesu ia gwau: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Anina be Dirava ena tanobada paradaisona matamatana ena sivarai namona be Keristani tadikaka ai idia do lao lasi taudia dekenai ita harorolaia. Iesu ia hahedinaraia goevagoeva, namo lasi iseda Keristani tadikaka sibona ita lalokau henia, to ia gwau: “Bema umui idia lalokau henia taudia sibona dekenai do umui lalokau henia, dahaka dainai umui laloa Dirava be umui do ia hanamoa? Kara dika taudia ese danu unai bamona idia karaia noho. Bema emui turana sibona do umui hanamoa, emui namo be edena bamona do ia bada? Dika taudia danu unai bamona idia karaia noho.”—Mataio 5:46, 47; 24:14; Galatia 6:10.
“Iehova Ena Ladana ai Do Ita Raka”
12. Dahaka dainai Dirava ena ladana be ia sibona ese ia abia be maoro?
12 Dirava momokani hanamoa dalana ma ta be iena ladana Iehova ita diba, gaukaralaia, bona ma haida dekenai ita hadibaia. Salamo torea tauna ese ena ura badana ia hahedinaraia, ia gwau: “Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” (Salamo 83:18) Inai ladana Iehova ena anina be “Ia ese Ia Halaoa.” Ia be Palani Karaia Diravana Badana, hanaihanai ena ura ia hagugurua. Dirava momokani sibona ese unai ladana ia abia be maoro, badina taunimanima idia diba lasi edia hekwarahi ese anina ia havaraia eiava lasi. (Iamesi 4:13, 14) Iehova sibona ia gwau diba, iena hereva ena anina be “do ia karaia momokani.” (Isaia 55:11) Taunimanima momo be nega ginigunana edia Baibel lalonai Dirava ena ladana idia itaia bona ena anina idia dibaia neganai, idia moale bada. (Esodo 6:3) To unai diba amo namo do idia davaria dalana tamona be ‘Iehova ena ladana ai do idia raka, ela bona hanaihanai.’—Mika 4:5, NW.
13. Iehova ena ladana ita diba bona iena ladana ai ita raka ena anina be dahaka?
13 Salamo 9:10 ese Dirava ena ladana ia herevalaia, ia gwau: “Oiemu ladana idia diba taudia ese, oi do idia abidadama henia.” Inai ladana Iehova ita diba sibona be hegeregere lasi, badina reana unai diba ese abidadama ia havaraia lasi. Dirava ena ladana ita diba ena anina be Iehova ena kara korikorina ita lalo-pararalaia bona ita laloa bada, ena lohia siahuna ita matauraia, ena hahegani ita kamonai henia, bona gau iboudiai lalonai ia ita abidadama henia. (Aonega Herevadia 3:5, 6) Unai hegeregerena, Iehova ena ladana ai ita raka ena anina be ia ita gwauhamata henia, ia tomadiho henia taudia ai ita lao bena ena hesiai gaukara ita karaia, bona Dirava ena ura hegeregerena iseda mauri ita gaukaralaia. (Luka 10:27) Unai oi karaia noho, a?
14. Bema ita ura Iehova ita hesiai henia ela bona hanaihanai, maduna dainai sibona ita karaia lasi to dahaka dainai ita karaia danu be gau badana?
14 Bema ita ura Iehova ita hesiai henia ela bona hanaihanai, maduna sibona dainai unai ita karaia be hegeregere lasi. Aposetolo Paulo ese Timoteo, lagani momo lalonai Iehova ia hesiai henia vadaeni tauna, ia hagoadaia: “Dirava ena ura kara do oi tahua, bona do oi badinaia noho.” (1 Timoteo 4:7) Ita ura ita badinaia tauna be mai eda kudouna ibounai ida ita laloa bada neganai, ia do ita badinaia momokani. ‘Dirava ita badinaia’ karana ese ia hahedinaraia Iehova ita matauraia bada. Ia hahedinaraia mai lalokau ida ia dekenai ita tabekau, badina ia bona ena dala ita laloa bada momokani. Unai dainai ita ura bada, iboudiai ese ena ladana do idia matauraia. Bema ita ura Iehova, Dirava momokanina tamona, ena ladana ai do ita raka ela bona hanaihanai, iseda mauri lalonai Dirava badinaia karana ita habadaia be gau badana.—Salamo 37:4; 2 Petero 3:11.
15. Edena dala ai Dirava sibona do ita badinaia diba?
15 Dirava ese iseda hesiai gaukara ia abia dae totona, ia sibona ita tomadiho henia be mai anina bada, badina ‘ia ura ita be ia sibona ena.’ (Esodo 20:5) Dirava ita lalokau henia bona nega tamona inai tanobada dikana, ena dirava be Satani, ita ura henia be hegeregere lasi. (Iamesi 4:4; 1 Ioane 2:15-17) Iehova ia diba goevagoeva, ita ta ta ita ura dahaka ita karaia. (Ieremia 17:10) Bema kara maoromaoro ita ura henia momokani, unai ia itaia bona ita do ia durua, dina ta ta ai ita davaria hahetoho lalodiai ita haheauka totona. Iena lauma helaga goadana amo ita ia durua bena ita hegeregere, inai tanobada lalonai idia vara kara dikadia huanai do ita kwalimu. (2 Korinto 4:7) Ita do ia durua danu, mauri hanaihanai tanobada paradaisona lalonai ena helaro ita dogoatao goadagoada totona. Unai be helaro namo hereana! Namona be unai helaro ita laloa bada bona mai eda ura ida unai ibounai do ia karaia Dirava momokanina Iehova do ita hesiai henia.
16. Namona be taunimanima milioni momo ida dahaka oi ura karaia?
16 Tanobada ibounai lalonai taunimanima milioni momo ese salamo torea tauna ia torea boiboi herevana idia abia dae, ia gwau: ‘Lau danu Iehova do ita hanamoa. Iena ladana do ita hanamoa hebou!’ (Salamo 34:3) Iehova ese oi ia boiria, bese iboudiai lalonai unai idia karaia taudia edia hutuma bada ida unai do oi karaia totona.
Riviu Henanadai
• Iehova be edena bamona Dirava? Iena kara ita lalo-pararalaia namonamo neganai, dahaka namo ita abia?
• Edena dala ai ita hahedinaraia diba ma haida ita lalokau henia?
• Iehova ena ladana ita diba bona ena ladana ai ita raka ena anina be dahaka?
[Pictures on page 14]
Iehova ena lalokau bada dainai ‘iena imana ia kehoa bena mauri gaudia ibounai edia ura ia hagugurua’