Karoa 16
‘Do Umui Lalokau Heheni, mai Emui Lalona Ibounai Ida’
1. Nega momo Iehova ena Witnes taudia edia hebou dekenai idia mai taudia ese dahaka idia hoalaia?
TAUNIMANIMA be nega ginigunana Iehova ena Witnes taudia edia hebou dekenai idia mai neganai, nega momo unuseniai idia itaia lalokauna dainai idia hoa. Tadikaka ese idia abia dae bona tadikaka huanai ia noho lalokauna idia itaia. Iseda hebouhebou badadia dekenai idia mai taudia danu ese unai lalokau idia itaia. Niuspepa ena toretore tauna ta ese unai bamona hebouhebou ta ena sivarai ia torea, ia gwau: ‘Taunimanima ta ia kekero lasi eiava drag ia ania lasi. Ta ia boiboi badabada lasi. Ta ese ma ta ia doria siri lasi eiava ia hereva dika henia lasi. Hevaseha herevadia dikadia bona hereva mirodia idia gwauraia lasi. Kuku ena kwalahu be lasi. Henaohenao be lasi. Tini be rei dekenai idia negea kava lasi. Edia kara be idau vaitani.’ Unai kara ibounai ese lalokau ia hahedinaraia, unai bamona lalokau be ‘haida hadikaia ia ura lasi bona sibona ena gau ia tahua lasi.’—1 Korinto 13:4-8.
2. (a) Nega ia hanaia lalonai, iseda lalokau karana amo dahaka ia hedinarai be namo? (b) Keriso ita tohotohoa dainai, edena bamona lalokau ita hahedinaraia be namo?
2 Tadikaka lalokau henia karana be Keristani taudia momokanidia edia toana badana. (Ioane 13:35) Lauma dalanai ita goada ita lao neganai, lalokau ita hahedinaraia badabada karana ita dibaia. Aposetolo Paulo ia guriguri ena tadikaka edia lalokau be “do ia bada lao noho.” (Filipi 1:9) Aposetolo Ioane ia hahedinaraia, namona be iseda lalokau dainai sibona eda ura ita dadaraia. Ia gwau: “Lalokau ena toana, be inai kara dekena amo do ita diba: Keriso ese ita dainai iena mauri ia atoa diho. Unai dainai ita ese iseda tadikakana dainai, iseda mauri ita atoa diho danu be namo.” (1 Ioane 3:16; Ioane 15:12, 13) Iseda tadikaka dainai do ita mase, a? Ena be nega momo unai bamona do ia vara lasi, to hari edia noho dalana ia hegeregere lasi neganai, dahaka ita karaia idia ita durua totona, ena be ita dekenai ia auka danu?
3. (a) Edena dala ai iseda lalokau ita hahedinaraia badabada diba? (b) Dahaka dainai hari ta ta ita lalokau heheni be gau badana?
3 Namona be iseda kara amo ita hahedinaraia sibona eda ura ita dadaraia, bona iseda tadikaka ita lalokau henidia momokani. Dirava ena Hereva ese ita ia hagoadaia, ia gwau: “Do umui lalokau henia, tadikaka edia lalokau ta ta dekenai bamona.” (Roma 12:10) Ita ibounai ese taunimanima haida be unai bamona ita lalokau henidia. To, ma haida danu be unai bamona do ita lalokau henidia diba, a? Inai tanobada dikana ena dokona ia mai kahirakahira lalonai, iseda Keristani tadikaka ita tura henidia momokani be gau badana. Baibel ia gwau: “Gau ibounai edia dokona ena nega be kahirakahira. . . . To gau badana momokani be inai: Do umui lalokau heheni, mai emui lalona ibounai. Badina be lalokau tauna be Dirava ese iena kara dika momo do ia gwauatao.”—1 Petero 4:7, 8.
Hekwakwanai Idia Vara Neganai
4. (a) Dahaka dainai kongregesen taudia huanai hekwakwanai ia vara diba? (b) Ena be nega haida ita ura lasi Baibel ena sisiba ita badinaia, to bema ita badinaia, dahaka namo do ia havaraia diba?
4 Momokani, ita do goevadae lasi dainai, nega ta ta ai iseda kara amo ma haida do ita habadua. Iseda tadikaka danu be reana dala idauidau amo ita do idia kara dika henia. (1 Ioane 1:8) Bema unai bamona hekwakwanai ta oi davaria, dahaka oi karaia be namo? Baibel ese hamaoromaoroa dalana ia hahedinaraia. To, reana Baibel ena sisiba be ita goevadae lasi taudia eda ura ida ia hegeregere lasi. (Roma 7:21-23) To, bema Baibel lalonai ia noho sisiba be mai momokani ida ita badinaia, ita hahedinaraia ita ura momokani Iehova ita hamoalea. Danu, unai amo iseda lalokau karana ta ta dekenai do ia hanamoa bada.
5. Bema ta ese ita ia kara dika henia, dahaka dainai davana ita henia lasi be namo?
5 Nega haida taunimanima ese dala idia tahua, idia dekenai ia kara dika henia tauna ena davana idia henia totona. To unai ese hekwakwanai do ia habadaia momokani. Bema dika davana ia abia be maoro, Dirava dekenai ita rakatania be namo. (Aonega Herevadia 24:29; Roma 12:17-21) Ma haida ese idia dekenai ia kara dika tauna idia dadaraia toho. To, namo lasi iseda tomadiho tamona taudia dekenai unai bamona ita karaia, badina bema ita ura Dirava ese iseda tomadiho ia abia dae, iseda tadikaka ita lalokau henia be gau badana. (1 Ioane 4:20) Unai dainai, Paulo ia gwau: “Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu.” (Kolose 3:13) Unai bamona oi karaia diba, a?
6. (a) Nega hida iseda tadikaka ena kara dika ita gwauatao be namo? (b) Dahaka ita lalo-pararalaia ese ita do ia durua, ita dekenai ia kara dika tauna ena dika ita gwauatao totona?
6 Vadaeni, bema ta be ita dekenai ia kara dika lou lou, to kara dika badana ia karaia lasi dainai kongregesen amo idia atoa siri lasi, be edena bamona? Unai bamona kara dika maragidia totona aposetolo Petero ia gwau, ta ena kara dika be “nega 7” do ita gwauatao. To Iesu ia gwau: “Nega 7 sibona lasi, to nega 70 x 7.” Ia hahedinaraia iseda abitorehai Dirava dekenai be bada herea, to taunimanima edia abitorehai ita dekenai be maragi sibona. (Mataio 18:21-35) Dina ta ta lalonai, dala idauidau ai Dirava dekenai ita kara dika, hegeregere, nega haida sibona eda ura tahua karana ta amo, iseda hereva eiava lalohadai amo, eiava kara ta ita karaia lasi dainai, bona ita lalo-parara lasi unai gaudia dainai ita kara dika. (Roma 3:23) To, Dirava ese ita ia hebogahisi henia noho. (Salamo 103:10-14; 130:3, 4) Ia ura ita ese ta ta dekenai unai bamona kara ita hahedinaraia danu. (Mataio 6:14, 15; Efeso 4:1-3) Bena unai amo ita ese “haida . . . edia dika ia laloatao noho lasi” lalokauna do ita hahedinaraia.—1 Korinto 13:4, 5; 1 Petero 3:8, 9.
7. Bema iseda tadikaka ta be ita dekenai ia badu, dahaka ita karaia be namo?
7 Nega haida, iseda tadikaka ta ita badu henia lasi to ita mamia ia be ita dekenai ia badu. Namona be 1 Petero 4:8 (NW ) ena hereva hegeregerena, ‘lalokau amo ena kara dika ita koua’ diba. Eiava dala ita tahua ia ita hereva henia bona iseda hetura karana lalonai maino ita karaia lou.—Mataio 5:23, 24.
8. Bema tadikaka ta ese gau ta ia karaia bona ita ia habadua, dahaka ita karaia diba?
8 Reana emu tadikaka ese kara ta ia karaia noho bona unai ese oi sibona lasi to ma haida ia habadua danu. Ia oi hereva henia be namo, a? Reana. Bema umui ruaosi sibona bona hebogahisi dalanai ia dekenai unai hekwakwanai oi gwauraia hedinarai, reana unai ese anina namona ia havaraia diba. To namona be oi sibona oi nanadaia guna: ‘Momokani ia be Baibel ese ia taravatua karana ta ia karaia noho, a? Eiava, reana ena kara lau badulaia badina lauegu mauri dalana bona lau idia hadibaia dalana be iena amo ia idau dainai, a?’ Namona be oi naria namonamo, namo lasi sibona emu taravatu oi haginia bena unai taravatu hegeregerena tau ta oi hahemaoro henia. (Iamesi 4:11, 12) Iehova ese mauri daladia idauidau taudia ibounai ia abidia dae bona ia haheauka henidia badina idia be lauma dalanai idia do tubu noho.
9. (a) Kongregesen lalonai kara dika badadia idia vara neganai, daidia ese unai idia hamaoromaoroa? (b) Lalohisihisi tauna be edena negai kerere ia havaraia tauna ia hereva henia guna, bona unai ia karaia ena badina be dahaka?
9 Bema kongregesen lalonai ta ese kara dika badana ta ia karaia, hegeregere matabodaga karana, idia hamaoromaoroa haraga be namo. Daidia ese? Elda taudia. (Iamesi 5:14, 15) To, bema bisinesi karadia lalonai kerere ia vara, eiava ta ese ma ta ia gwauraia dika, vadaeni namona be ia lalohisihisi tauna ese kerere ia havaraia tauna ia hereva henia guna. Namona be idia ruaosi sibona idia herevahereva. (Mataio 18:15) To bema unai dala ai hekwakwanai idia hamaoromaoroa lasi, Mataio 18:16, 17 ia hahedinaraia dalana ia badinaia diba. Ia kerere tadikakana ita lalokau henia bona ia ita “hamaoromaoroa” lou urana ese ita do ia durua, iena kudouna ia hamarerea dalanai ia do ita hereva henia.—Aonega Herevadia 16:23.
10. Hekwakwanai ta ia vara neganai, dahaka ese ita do ia durua unai hekwakwanai ita laloa maoromaoro totona?
10 Hekwakwanai ta ia vara neganai, herevana ia be bada eiava maragi, to bema Iehova ena lalohadai unai gauna dekenai ita tahua, namo do ita davaria. Ia ese kara dikana ta ia moalelaia lasi, bona ena nega korikori ai, kara dika badadia idia karaia loulou helalo-kerehai lasi taudia be ena orea amo do ia kokidia. To, ita laloaboio lasi, ita ibounai be dala maragidia ai ita kara dika, unai dainai Iena haheauka bona hebogahisi ita abia be namo. Ma haida ese ita idia kara dika henia neganai, namona be Iehova ese ia hahedinaraia karana ita tohotohoa. Hebogahisi ita hahedinaraia neganai, iena lalokau ita hahedinaraia unai.—Efeso 5:1, 2.
Dala Ita Tahua Iseda Lalokau Ita “Habadaia” Totona
11. Dahaka dainai Paulo ese Korinto taudia ia hagoadaia edia lalokau idia “habadaia” totona?
11 Paulo be hua momo lalodiai Greece tanona dekenai ia noho Korinto kongregesen ia hagoadaia. Ia hekwarahi bada unai tadikaka ia durudia totona, bona ia lalokau henidia. To idia haida ese ia idia lalokau henia lasi. Idia maumau momo. Idia ia hagoadaia edia lalokau idia “habadaia” totona. (2 Korinto 6:11-13; 12:15) Namona be ita ibounai ese ma haida dekenai ita hahedinaraia lalokauna ena bada ita laloa bona dala ita tahua unai lalokau ita “habadaia” totona.—1 Ioane 3:14.
12. Kongregesen taudia ibounai dekenai iseda lalokau be edena bamona ita habadaia diba?
12 Ita davaria kongregesen lalonai haida ita tura henia be ia auka, a? Bema edia kara idauidau ita laloaboio—badina ita ura idia ese ita dekenai unai bamona idia karaia danu—iseda hetura karana do ia hanamoa diba. Iseda hemami idia dekenai do ia namo danu, bema edia kara namodia ita tahua bona unai kara namodia ita lalodia bada. Unai ese iseda lalokau idia dekenai do ia habadaia.—Luka 6:32, 33, 36.
13. Edena dala ai kongregesen lalonai idia noho taudia dekenai iseda lalokau ita habadaia diba?
13 Momokani, ma haida dekenai ita karaia karadia be mai ena hetoana. Reana hebou ta ta dekenai taunimanima ibounai do ita hedavari henidia lasi. Ita aniani hebou totona iseda turadia ita boiridia neganai, reana ita hegeregere lasi taunimanima ibounai ita boiria totona. To, miniti haida sibona ita gaukaralaia diba kongregesen lalonai ia noho tauna ta ida ita herevahereva amo ia ita diba namonamo totona, a? Reana nega ta ta ai, ita diba namonamo lasi tadikaka o taihu ta ita boiria haroro gaukara ai ita gaukara hebou totona, a?
14. Ita hedavari henia lasi Keristani taudia huanai ita noho neganai, edena dala ai iseda lalokau bada ita hahedinaraia diba?
14 Keristani hebouhebou badadia be nega namodia iseda lalokau ita “habadaia” totona. Reana, taunimanima tausen haida do idia mai. Idia ibounai ita hedavari henia diba lasi, to iseda kara amo ita hahedinaraia edia namo ita tahua guna, sibona eda namo be gabeai. Hebouhebou ena laga-ani negadiai, ita badinai idia helai taudia ita hereva henia karana amo ita hahedinaraia idia ita laloa bada. Nega ta ai, inai tanobada dekenai do idia noho taudia iboudiai be tadikaka bona taihu, mai edia lalo-tamona ida Dirava momokani bona idia ibounai edia Tamana do idia tomadiho henia. Idia ta ta ibounai do ita dibaia be moale gauna! Lalokau bada ese ita do ia doria unai bamona ita karaia totona. Hari, unai ita karaia be namo, ani?
Riviu Henanadai
• Keristani taudia huanai hekwakwanai idia vara neganai, edena bamona idia hamaoromaoroa be namo, bona dahaka dainai?
• Lauma dalanai ita goada ita lao lalonai, edena dala ai iseda lalokau ita habadaia be namo?
• Edena dala ai iseda turana korikoridia sibodia lasi to ma haida dekenai lalokau ita hahedinaraia diba?
[Picture on page 148]
Keristani lalokau be dala idauidau ai ita hahedinaraia diba, hegeregere kongregesen heboudia dekenai