Karoa 18
“Idia be Tanobada Ena Lasi”
1. (a) Iesu ia do mase lasi neganai, iena hahediba taudia totona dahaka ia gurigurilaia? (b) Dahaka dainai ita be “tanobada ena lasi” be gau badana?
IESU idia do hamasea lasi ena hanuaboi ginigabena ai, ia ese iena hahediba taudia totona ia guriguri. Iesu ia diba Satani ese idia do ia tohodia bada dainai, ena Tamana dekenai ia gwau: “Lau noinoi lasi tanobada dekena amo idia oi kokia totona, to lau noinoi Tau Dikana dekena amo idia do oi hamauria. Idia be tanobada ena lasi, lau hegeregerena, lau be tanobada ena lasi.” (Ioane 17:15, 16) Dahaka dainai tanobada amo ita idau be gau badana? Badina Satani be inai tanobada ena lohia tauna. Keristani taudia idia ura lasi Satani ena siahu henunai ia noho tanobadana ena kahana ai idia lao.—Luka 4:5-8; Ioane 14:30; 1 Ioane 5:19.
2. Edena dala ai Iesu be tanobada ena lasi?
2 Ena be Iesu be tanobada ena lasi, to ia ese taunimanima ia lalokau henidia. Ia ese gorere taudia ia hanamodia, mase taudia ia hatoredia isi bona taunimanima dekenai Dirava ena Basileia ia hadibaia. Taunimanima totona ena mauri ia henia danu. To, ia ese Satani ena tanobada ena lalohadai bona kara dikadia idia hahedinaraia taudia edia kara, ia lalokau henia lasi. Unai dainai, ita ia sisiba henia ita ese matabodaga uradia, kohu momo tahua maurina bona dagi bada tahua goadagoada karadia do ita dadaraia. (Mataio 5:27, 28; 6:19-21; Luka 20:46, 47) Unai dainai, Iesu ese tanobada ena politikol karadia lalonai ia vareai lasi danu be ita hoalaia lasi. Ena be ia be Iuda tauna, to Iuda bona Roma taudia huanai ia vara politikol hepapahuahuna lalonai ia vareai lasi.
“Lauegu Basileia be Inai Tanobada Gauna Lasi”
3. (a) Iuda ena tomadiho gunalaia taudia ese Pilato dekenai edena dala ai Iesu idia samania koikoi, bona dahaka dainai? (b) Dahaka ese ia hahedinaraia Iesu ia ura lasi tanobada ena king ai do ia lao?
3 Iuda ena tomadiho gunalaia taudia ese Iesu idia dogoatao bona Roma ena gavana Pontio Pilato dekenai idia hakaua lao neganai, ia vara gauna mani ita laloa. Momokani, unai gunalaia taudia be idia badu badina Iesu ese edia kara koikoi ia hahedinaraia. Idia ura gavana ese Iesu ia kota henia, unai dainai ia idia samania, idia gwau: “Inai tau ai davaria, aiemai bese taudia dekenai ia hereva henia mai goada danu, Kaisara ena takisi moni henia totona ia gwauatao, bona sibona ia gwauraia ia be Keriso, king ta.” (Luka 23:2) Ia hedinarai goevagoeva, tomadiho gunalaia taudia idia koikoi badina lagani ta gunanai taunimanima idia ura Iesu be king ai idia halaoa gwauraia neganai edia ura ia dadaraia. (Ioane 6:15) Ia diba ia be vaira negana ai guba Pavapavana ai do ia lao. (Luka 19:11, 12) Danu, Iehova ese king ai do ia halaoa, taunimanima lasi.
4. Iesu ena lalohadai be dahaka takisi moni henia karana dekenai?
4 Dina toi sibona idia noho bena Iesu do idia dogoatao neganai, Farisea taudia idia ura Iesu ese takisi moni henia karana do ia gwauraia dika. To ia gwau: “Moni ta umui mailaia, lau itaia. Daika ena laulau bona daika ena revareva be inai?” Idia gwau, “Kaisara ena.” Vadaeni Iesu ia gwau, “Kaisara ena, Kaisara dekenai do umui henia, to Dirava ena, Dirava dekenai do umui henia.”—Luka 20:20-25.
5. (a) Iesu idia dogoatao negana ai, iena hahediba taudia dekenai dahaka ia hadibaia? (b) Edena dala ai Iesu ese ena kara ena badina ia gwauraia hedinarai? (c) Unai kota ese dahaka ia hahedinaraia?
5 Iesu ese taunimanima ia hadibaia lasi gavamani idia gwau-edeede henia totona. Roma ena tuari taudia bona tatau ma haida be Iesu dogoatao totona idia mai neganai, Petero ese ena tuari kaia ia veria bona tau ta ena taiana ia utua oho. To Iesu ia gwau: “Emu tuari kaia be ena gabu dekenai oi atoa lou, badina be tuari kaia idia iusilaia taudia ibounai, be tuari kaia dekenai do idia mase.” (Mataio 26:51, 52) Unai dina murinai, Iesu ese ena kara ena badina be Pilato dekenai ia gwauraia hedinarai, ia gwau: “Lauegu Basileia be inai tanobada gauna lasi. Bema lauegu Basileia be inai tanobada gauna, egu hesiai taudia be do idia tuari, Iuda taudia edia imana dekena amo lau do idia hamauria.” (Ioane 18:36) Pilato ia gwau Iesu ena ‘kerere ta ia davaria lasi.’ To hutuma edia hereva dainai, Pilato ese Iesu ia hasatauroa.—Luka 23:13-15; Ioane 19:12-16.
Hahediba Taudia ese Iesu Idia Tohotohoa
6. Edena dala ai Keristani taudia ginigunadia idia hahedinaraia, tanobada ena kara bona lalohadai idia dadaraia, to taunimanima idia lalokau henidia?
6 Iesu ena hahediba taudia idia diba dahaka idia karaia be namo, unai amo idia be tanobada ena lasi. Anina be idia ese tanobada ena lalohadai bona kara, hegeregere Roma taudia edia gadara helulu mai edia dagedage bona edia drama rumadia ai idia karaia matabodaga moale karadia do idia dadaraia. Unai dainai, taunimanima ese hahediba taudia idia gwauraia dika, idia gwau idia be taunimanima inai henia taudia. To, idia ese edia dekena taudia idia inai henia lasi, idia gaukara goada ma haida idia durua Iehova ena hahemauri dalana amo namo idia davaria totona.
7. (a) Hahediba taudia ginigunadia be tanobada ena lasi dainai, dahaka idia davaria? (b) Edia lalohadai gavamani taudia dekenai bona takisi moni henia karana dekenai be dahaka, bona dahaka dainai?
7 Nega momo gavamani taudia ese hereva kereredia idia kamonai dainai, idia ese Iesu murinai idia raka taudia idia dagedage henia, Iesu dekenai ia vara hegeregerena. To, lagani 56 C.E. bamona ai, aposetolo Paulo ese Roma Keristani taudia ia tore henidia, idia ia hamaoroa “gavamani do idia kamonai henia. Badina be gavamani ta ia noho diba lasi bema Dirava ia ura lasi neganai.” Iehova ese tanobada ena gavamani ia haginidia lasi, to gwau maoro ia henidia do idia noho ela bona ena Basileia sibona ese tanobada ibounai do ia lohiaia. Unai dainai Paulo ese Keristani taudia ia sisiba henidia, gavamani ena gaukara taudia do idia matauraia bona takisi monina do idia henia.—Roma 13:1-7; Tito 3:1, 2.
8. (a) Keristani taudia ese gavamani taudia idia kamonai henia karana be mai ena hetoana, a? (b) Keristani taudia ginigunadia ese edena dala ai Iesu ena haheitalai idia tohotohoa?
8 To, gavamani taudia ita kamonai henia karana be mai ena hetoana. Bema taunimanima ena taravatu be Iehova ena taravatu ida ia hegeregere lasi neganai, Iehova idia hesiai henia taudia ese Iena taravatu idia badinaia be namo. Buka ta (On the Road to Civilization—A World History) ese Keristani taudia ginigunadia ia herevalaia neganai, ia gwau: “Keristani taudia idia ura lasi Roma taudia ese idia karaia gaukara haida idia karaia. Keristani taudia . . . idia laloa tuari oreana lalonai idia vareai karana ese edia abidadama do ia hadikaia diba. Idia ura lasi politikol dagina idia abia. King idia tomadiho henia lasi.” Iuda edia kota badana ese hahediba taudia dekenai ‘taravatu idia atoa’ do idia haroro lasi neganai, idia gwau: “Dirava ai kamonai henia be namo, taunimanima ai kamonai henia be dika.”—Kara 5:27-29.
9. (a) Dahaka dainai Keristani taudia ese lagani 66 C.E. ai Ierusalema amo idia heau? (b) Edena dala ai edia haheitalai be mai anina bada?
9 Hahediba taudia be politikol hepapahuahu bona tuari lalodiai idia vareai lasi. Lagani 66 C.E. ai, Iudea dekenai idia noho Iuda taudia ese Kaisara idia gwau-edeede henia. Roma ena tuari oreana ese karaharaga Ierusalema ia hagegea. Unai hanua lalonai idia noho Keristani taudia be dahaka idia karaia? Iesu ese ia sisiba henidia hanua amo do idia heau siri, unai sisiba idia laloatao. Roma ena tuari taudia be nega sisina lalonai hanua idia rakatania neganai, Keristani taudia be Ioridane Sinavaina idia hanaia bena idia heau ela bona Pela ena ororo gabuna dekenai. (Luka 21:20-24) Edia Keristani gini siri karana dainai, idia ese kamonai Keristani taudia gabedia totona haheitalai namona idia hahedinaraia.
Inai Nega Dokona ai Keristani Gini Siri Karana Idia Hahedinaraia Keristani Taudia
10. (a) Iehova ena Witnes taudia be edena gaukara lalonai idia bisi bada, bona dahaka dainai? (b) Dahaka amo idia gini siri?
10 Idaunegai sivaraidia ese idia hahedinaraia inai nega dokona lalonai, Keristani taudia ginigunadia edia Keristani gini siri karana idia tohotohoa taudia edia orea ta ia noho, a? Oibe, Iehova ena Witnes taudia ese unai bamona idia karaia. Inai nega dokona lalonai, Dirava ena Basileia idia harorolaia noho, idia gwau unai Basileia sibona ese maino, noho namo bona moale be kara maoromaoro idia ura henia taudia dekenai do ia mailaia. (Mataio 24:14) To bese idauidau huanai idia vara hepapahuahu amo idia gini siri momokani.
11. (a) Edena dala ai Witnes taudia edia Keristani gini siri karana be dubu gunalaia taudia edia kara amo idia idau? (b) Iehova ena Witnes taudia ese politikol karadia lalonai idia vareai taudia dekenai dahaka idia laloa?
11 To Kerisendom ena dubu gunalaia taudia be idau, idia be tanobada ena politikol karadia lalonai idia vareai momokani. Tano haida dekenai, idia ese eleksen totona idia gini taudia haida idia durua bona ma haida edia dala idia koua. Dubu gunalaia taudia haida be politikol dagi idia abia. Idia ma haida ese politikol taudia idia doridia idia ese idia abia dae program idia durua totona. To, Iehova ena Witnes taudia be politikol karadia lalonai idia vareai lasi. Witnes taudia ese ma haida idia koua lasi politikol pati ta lalonai idia vareai totona, eiava eleksen neganai idia gini o idia vouti totona. Iesu ia gwau iena hahediba taudia be inai tanobada ena lasi, unai dainai Iehova ena Witnes taudia be politikol karadia lalonai idia vareai lasi.
12. Inai tanobada ena tomadiho oreadia ese Keristani gini siri karana idia hahedinaraia lasi dainai, dahaka ia vara?
12 Iesu ia peroveta bamona, bese idauidau be idia tuari loulou. Bona bese haida lalonai orea idauidau be sibodia idia tuari heheni. (Mataio 24:3, 6, 7) Tomadiho gunalaia taudia be hanaihanai bese eiava orea ta idia durua kahana ma ta idia tuari henia totona, edia murinai idia raka taudia danu idia veridia unai idia karaia totona. Dahaka ia vara? Tomadiho tamona taudia be tuari lalonai ta ta idia alaia mase, badina idia be bese idauna eiava iduhu idauna taudia dainai. Unai be Dirava ena ura hegeregerena lasi.—1 Ioane 3:10-12; 4:8, 20.
13. Dahaka ese idia hamomokania Iehova ena Witnes taudia be tanobada amo idia gini siri?
13 To, Iehova ena Witnes taudia be tuari ibounai amo idia gini siri momokani. The Watchtower, November 1, 1939, ia gwau: “Lohiabada ena kahana ai idia gini taudia iboudiai be bese idauidau edia tuari amo do idia gini siri.” Iehova ena Witnes taudia bese iboudiai amo bona noho daladia idauidau amo ese unai idia badinaia. Idia ura lasi tanobada ena bese ia hapararaia politikol karadia bona tuari ese edia tanobada hegegemadai tadikaka oreana ena lalo-tamona karana ia hadikaia. Idia ese edia “tuari kaia be hama dekenai do idia makohia, bona unai makohia auri dekena amo, tano geia auri do idia karaia. Bona idia edia io ena auri danu do idia botaia palaka, au rigi utua kaia do idia halaoa.” Keristani gini siri karana idia badinaia dainai, tuari idia dibaia lou lasi.—Isaia 2:3, 4; 2 Korinto 10:3, 4.
14. Iehova ena Witnes taudia be tanobada amo idia gini siri dainai, dahaka idia davaria?
14 Witnes taudia edia Keristani gini siri karana dainai dahaka ia vara? Iesu ia gwau: “Umui be tanobada ena lasi . . . unai dainai tanobada ese umui do ia badu henia.” (Ioane 15:19) Iehova ena Witnes taudia momo idia hadiburaia, badina Dirava idia hesiai henia. Haida idia hahisidia bada bona idia hamasedia danu, Keristani taudia ginigunadia dekenai ia vara bamona. Unai ia vara badina Satani, “inai tanobada ena dirava,” ese Iehova ena hesiai taudia ia inai henia, badina idia be tanobada ena lasi.—2 Korinto 4:4; Apokalupo 12:12.
15. (a) Bese ibounai dekenai dahaka do ia vara, bona Iehova ena Witnes taudia ese dahaka do idia davaria lasi? (b) Dahaka dainai tanobada amo ita gini siri be gau badana?
15 Iehova ena hesiai taudia be inai tanobada ena lasi dainai idia moale, badina inai tanobada ena bese ibounai be Aramagedono dekenai do idia mase ore. (Daniela 2:44; Apokalupo 16:14, 16; 19:11-21) Unai dika bada do ita davaria lasi badina ita be inai tanobada amo ita gini siri. Tanobada hegegemadai mai lalo-tamona ida ita noho dainai, ita ese Dirava ena guba Basileiana ita badinaia. Momokani, ita be tanobada ena lasi dainai, tanobada ese ita ia hevasehalaia bona dagedage henia. To kahirakahira momokani unai do ia doko, badina hari Satani ena siahu henunai ia noho tanobada dikana be do ia ore vaitani. To, Iehova ena hesiai gaukara idia karaia taudia be ena Basileia henunai, kara maoromaoro tanobada dekenai do idia noho ela bona hanaihanai.—2 Petero 3:10-13; 1 Ioane 2:15-17.
Riviu Henanadai
• Iesu ese ta be “tanobada ena lasi” ena anina be edena bamona ia hahedinaraia?
• Keristani taudia ginigunadia edia lalohadai be dahaka: (a) tanobada ena lalohadai bona kara idauidau dekenai, (b) tanobada ena lohia taudia dekenai, bona (c) takisi henia karana dekenai?
• Hari inai negai, Iehova ena Witnes taudia ese edena dala ai edia Keristani gini siri karana idia hahedinaraia?
[Picture on page 165]
Iesu ia hahedinaraia ia bona ena murinai idia raka taudia be “tanobada ena lasi”