Tanikiu Herevana Oi Gwauraia, A?

HARI dina oi aniani, a?— Unai aniani ia hegaegaelaia tauna oi diba, a?— Reana emu sinana eiava ma ta ese, to dahaka dainai Dirava ita tanikiu henia be namo?— Badina Dirava ese aniani ia hatubua. To, aniani ia hegaegaelaia tauna eiava ita dekenai ia henia tauna ita tanikiu henia danu be namo.

Nega haida ma haida ese ita idia kara namo henia neganai, idia ita tanikiu henia lasi, ani? Hadibaia Tauna Badana be tanobada dekenai ia noho neganai, lepera taudia haida be tanikiu herevana idia gwauraia lasi.

Lepera gorerena oi diba, a?— Unai gorere ese ta ena tauanina ia ania ore diba. Iesu be tanobada dekenai ia noho neganai, lepera taudia be ma haida danu idia noho lasi. Bona bema lepera tauna ese tau ta ia itaia, namona be ia boiboi bona unai tauna ia hadibaia ia kahirakahira do ia mai lasi. Unai bamona idia karaia badina unai amo ma haida ese lepera gorerena do idia abia lasi.

Iesu be lepera taudia ia hebogahisi henidia. Dina ta Ierusalema ia lao henia noho lalonai, taoni maragina ta ia raka hanaia. Unai taoni kahirakahira dekenai, lepera taudia 10 idia mai ia idia hedavari henia totona. Idia kamonai Iesu be Dirava amo siahu ia abia gorere idauidau ia hanamodia totona.

Lepera taudia be Iesu kahirakahira idia lao lasi. To daudau dekenai idia gini. To idia abia dae Iesu ese edia lepera gorerena ia hanamoa diba. Unai dainai, Hadibaia Tauna Badana idia itaia neganai, idia boiboi: ‘Iesu, Hadibaia Tauna, ai oi durua.’

Idia gorere taudia oi hebogahisi henidia, a?— Iesu ese ia hebogahisi henidia. Ia diba idia abia lepera gorerena dainai idia lalohisihisi bada. Unai dainai idia dekenai ia gwau: “Dubu ena hahelagaia taudia dekenai umui lao, do idia itaia umui.”​—Luka 17:​11-​14.

Dahaka dainai Iesu ese idia ia hamaoroa unai bamona idia karaia totona? Badina ia ese Iehova be Ena taunimanima dekenai lepera taudia totona ia henia taravatuna ia laloa. Unai taravatu ia gwau Dirava ena hahelaga tauna ese lepera tauna ta ena tauanina do ia itaia. Hahelaga tauna ese lepera tauna do ia hadibaia bema ena gorere ia namo. Unai neganai, gorere lasi taudia ida ia noho diba.​—Levitiko 13:​16, 17.

To unai lepera taudia 10 edia kopina dekenai unai gorere ia do noho. Unai dainai Iesu ese ia hamaorodia hegeregerena hahelaga tauna dekenai idia lao, a?— Oibe, maoromaoro idia lao. Reana unai tatau idia abia dae momokani Iesu ese edia gorere do ia hanamoa. Dahaka ia vara?

Hahelaga tauna dekenai idia lao noho lalonai, edia gorere ia ore. Edia tauanina ia namo lou. Ia hanamodia! Iesu ena siahu idia abidadama henia dainai ahuna namona idia abia. Idia moale bada! To edia tanikiu karana hahedinaraia totona dahaka idia karaia be namo? Bema unai be oi, dahaka do oi karaia?—

Ia namo lou tauna ta be Iesu dekenai ia giroa. Iehova ia hanamoa matamaia. Ia karaia karana be maoro badina Iesu ese ia hanamoa totona ia gaukaralaia siahuna be Dirava amo. Unai tauna be Hadibaia Tauna Badana ena aena badinai ia igo diho bona ia tanikiu henia danu. Iesu ese ia karaia karana dainai ia tanikiu bada.

To tatau 9 be edena bamona? Iesu ia gwau: ‘Lepera taudia 10 lau hanamodia, ani? Taudia 9 be edeseni? Dirava hanamoa totona, inai tau sibona ia giroa lou, a?’

Oibe, unai be momokani. Idia 10 amo tamona sibona ese Dirava ia hanamoa bona ia giroa lou Iesu ia tanikiu henia totona. Bona unai tauna be Samaria tauna, ia be tano idauna amo. Tatau 9 be Dirava bona Iesu idia tanikiu henia lasi.​—Luka 17:​15-​19.

Oiemu kara amo daika ena kara oi tohotohoa? Ita ura Samaria tauna ena kara ita tohotohoa, ani?— Unai dainai ta ese ita ia kara namo henia neganai, dahaka ita laloaboio lasi be namo?— Namona be tanikiu herevana ita gwauraia. Nega momo taunimanima idia laloaboio tanikiu herevana idia gwauraia totona. To tanikiu herevana ita gwauraia be namo. Unai bamona ita karaia neganai, Iehova Dirava bona ena Natuna, Iesu, idia moale.

Bema unai oi laloa, do oi laloatao taunimanima ese oi totona gau momo idia karaia vadaeni. Hegeregere, nega ta oi gorere, a?— Reana emu gorere be unai lepera taudia 10 edia bamona lasi, to reana udu kurukuru gorerena oi abia eiava emu bogana ia hisihisi. Ta ese oi ia naria, a?— Reana oi dekenai muramura idia henia bona gau ma haida idia karaia. Oi namo totona oi idia durua dainai oi moale, a?—

Samaria tauna ese Iesu ia tanikiu henia ia hanamoa dainai bona unai ese Iesu ia hamoalea. Oi laloa emu sinana eiava tamana be oi totona gau ta idia karaia neganai, tanikiu herevana oi gwauraia ese idia do ia hamoalea, a?— Oibe, do idia moale.

Ma haida be oi totona dina ibounai eiava wiki ibounai gau haida idia karaia. Reana unai bamona idia karaia badina unai be edia gaukara. Reana idia moale unai idia karaia totona. To reana oi laloaboio idia oi tanikiu henia totona. Reana diba oi abia totona emu tisa ia gaukara goada. Unai be iena gaukara. To do ia moale bema ia karaia gaukarana dainai ia oi tanikiu henia.

Nega haida taunimanima be oi totona gaukara maragidia haida sibona idia karaia. Ta ese oi totona iduara ia kehoa bona ia dogoatao, a? Eiava teibolo ai ta ese oi dekenai aniani ia henia, a? Unai bamona gau maragidia dainai tanikiu herevana oi gwauraia be namo.

Bema tanobada ai idia noho taudia dekenai tanikiu herevana ita gwauraia, vadaeni iseda guba Tamana dekenai tanikiu herevana do ita gwauraia danu. Bona gau momo dainai Iehova ita tanikiu henia diba! Ita dekenai mauri ia henia bona iseda mauri ita moalelaia totona gau momo ia henia. Unai dainai badina namona dainai dina ibounai Iehova ita hanamoa be namo.