Gau ta Ita Heagilaia be Namo, A?

HEAGI ena anina oi diba, a?— Haheitalai ta be inai. Oi diba namonamo lasi gauna ta be nega ta oi karaia toho vadaeni, a? Reana soka bolo oi kikia toho. Eiava reana varo gadarana lalonai oi vareai toho. Ta ese oi ia kirikirilaia bona ia gwau, “Unai lau karaia namo herea diba.”— Oibe, unai tauna be ia heagi.

Ma haida be unai bamona idia karaia neganai, emu hemami be edena bamona? Oi ura henia, a?— Bema sibona emu kara oi heagilaia ma haida be dahaka do idia laloa?— Bema ta oi hamaoroa, “Lau ese oi lau hereaia,” oi laloa unai be hebogahisi karana, a?— Iehova be unai bamona idia karaia taudia ia ura henia, a?—

Hadibaia Tauna Badana be ma haida ia diba, idia laloa idia ese ma haida idia hereaia. Idia sibona idia heagilaia bona taunimanima ibounai idia laloa maragi. Unai dainai dina ta, Iesu ese sivarai ta amo idia dekenai ia hahedinaraia, sibona ena kara heagilaia karana be kerere. Mani ita kamonai.

Unai be Farisea tauna bona takisi gogoa tauna edia sivarai. Farisea taudia be tomadiho hadibaia taudia bona hanaihanai edia kara amo idia hahedinaraia ma haida amo idia be kara maoromaoro bona helaga taudia momokani. Iesu ena sivarai lalonai ia herevalaia Farisea tauna, be Dirava ena dubu Ierusalema dekenai ia lao, ia guriguri totona.

Iesu ia gwau, takisi gogoa tauna ta danu ia lao dubu dekenai ia guriguri totona. Taunimanima momo ese takisi gogoa taudia idia ura henia lasi. Idia laloa takisi gogoa taudia idia ura taunimanima idia koia toho. Bona momokani, takisi gogoa taudia momo be nega haida idia koikoi.

Dubu dekenai, Farisea tauna be Dirava dekenai inai bamona ia guriguri: ‘Dirava e, oi lau tanikiu henia badina lau be kara dika taudia haida bamona lasi. Taunimanima lau koia eiava kara dika ma haida lau karaia lasi. Lau be inai takisi gogoa tauna bamona lasi. Lau be kara maoromaoro tauna. Lau be pura ta lalonai nega rua aniani lau ania lasi, unai dainai nega bada ia noho oi lau laloa totona. Bona lau davaria kohu gaudia ibounai ena karoa 10 be dubu dekenai lau henia.’ Farisea tauna ia laloa ia ese ma haida ia hereaia momokani, ani?— Bona unai be Dirava dekenai ia gwauraia danu.

To takisi gogoa tauna be unai bamona lasi. Ia guriguri neganai, ena matana be guba dekenai ia negea lasi. Ia be daudau dekenai ia gini bona ena kwarana ia atoa diho. Takisi gogoa tauna be iena kara dika dainai ia sori bada, bona mai lalohisihisi danu ena kemena ia botaia. Dirava dekenai sibona ena namo ia gwauraia lasi. To, ia guriguri: “Dirava e, lau be dika tauna, oi bogahisihisi lau dekenai.”

Oi laloa edena tauna ese Dirava ia hamoalea? Sibona ia laloa bada Farisea tauna? Eiava ena kara dika dainai ia sori bada takisi gogoa tauna?—

Iesu ia gwau Dirava be takisi gogoa tauna dekenai ia moale. Dahaka dainai? Iesu ia gwau: ‘Badina be sibona ia heagi tauna be henunai do ia noho. To sibona ia atoa diho tauna be do idia hanamoa.’​—Luka 18:​9-​14.

Iesu ena sivarai amo dahaka ita dibaia?— Ita dibaia gauna be inai, namo lasi ita laloa ma haida ita hereaia. Reana do ita gwau ita be unai bamona lasi, to iseda kara amo unai ita hahedinaraia diba. Nega ta unai bamona oi karaia, a?— Mani aposetolo Petero oi laloa.

Iesu ese ena aposetolo taudia ia hamaorodia ia idia dogoatao neganai, idia ibounai ese ia do idia rakatania, to Petero ia heagi ia gwau: ‘Taunimanima ibounai ese oi do idia rakatania, to lau ese oi do lau rakatania diba lasi.’ To Petero ia kerere. Sibona ena lalohadai dekenai ia tabekau momokani. Ia ese Iesu ia rakatania. To, ia giroa, gabeai inai buka ena Karoa 30 dekenai unai do ita itaia.​—Mataio 26:​31-​33.

Hari inai negai ia vara diba gauna ta mani ita laloa. Reana sikuli ai oi bona emu klas turana dekenai henanadai haida idia henia. Bema oi ese maoromaoro haere oi henia, to emu turana be ia hegeregere lasi, be edena bamona? Oibe, do oi moale bema haere oi diba. To bema ia haere haraga lasi tauna ida oi sibona oi hahegeregerea, oi laloa unai be hebogahisi karana, a?— Ia maoro bema sibona oi hanamoa, unai amo ma ta ena hemami oi hadikaia, a?—

Farisea tauna be unai bamona ia karaia. Ia heagi ia gwau ia ese takisi gogoa tauna ia hereaia. To Hadibaia Tauna Badana ia gwau Farisea tauna be ia kerere. Momokani, ta ese gau ta ia karaia namonamo karana ese ma ta ena ia hereaia diba. To ita gwau lasi ia ese ma haida ia hereaia.

Unai dainai bema iseda diba be bada, ita heagi be maoro, a?— Mani inai oi laloa. Iseda harana be ita sibona ita karaia, a?— Lasi, Iehova ese ita ta ta dekenai harana ia henia. Bona ita diba gaudia momo be ma ta amo ita dibaia. Reana buka ta dekenai ita duahia. Eiava ma ta ese ita ia hadibaia. Ena be sibona eda diba dekenai haere ita henia, to edena bamona ita diba?— Oibe, Iehova ese ita dekenai ia henia harana ita gaukaralaia karana amo.

Bema ta ia hekwarahi, oi karaia diba hebogahisi karana be ena lalona ia hanamoa herevana ta oi gwauraia. Ia oi hamaoroa ia karaia karana oi ura henia. Reana oi durua diba unai ia karaia namonamo totona. Do oi ura taunimanima be oi dekenai unai bamona idia karaia, ani?—

Haida edia goada ese ma haida edia ia hereaia. Bema oiemu goada ese emu tadikaka eiava taihuna ena goada ia hereaia be edena bamona? Oi heagi be maoro, a?— Lasi. Ita ania aniani ese iseda tauanina ia hagoadaia. Bona Dirava be dina ena diari, medu bona aniani idia hatubua gaudia ibounai ia henia, ani?— Unai dainai, bema goada ita abia Dirava ita tanikiu henia be namo.​—Kara 14:​16, 17.

Ita ura lasi sibona ena kara ia heagilaia tauna ita kamonai henia, ani?— Iesu ena hereva ita laloa: ‘Oi ura taunimanima ese oi dekenai idia karaia hegeregerena, oi danu inai bamona do oi karaia idia dekenai.’ Bema unai bamona ita karaia, ita be Iesu ese ena sivarai lalonai ia gwauraia Farisea tauna bamona lasi, ia be sibona ena kara ia heagilaia.​—Luka 6:​31.

Nega ta tau ta ese Iesu ia gwauraia namo. Hadibaia Tauna Badana ia gwau, ‘Oibe lau be namo,’ a?— Lasi unai bamona ia hereva lasi. To ia gwau: “Tau ta ia namo lasi, Dirava sibona mo.” (Mareko 10:18) Ena be Hadibaia Tauna Badana be ia goevadae, to sibona ena kara ia heagilaia lasi. To hanamoa ibounai be ena Tamana, Iehova dekenai ia henia.

Unai dainai, ita heagilaia diba tauna ta ia noho, a?— Oibe ta ia noho. Iseda Havaraia Tauna, Iehova Dirava dainai ita heagi diba. Dina ia diho ena hairai eiava Dirava ese ia havaraia hoa gaudia haida ita itaia neganai, ma ta dekenai ita gwau diba, ‘Iseda Dirava hereadaena, Iehova, ese unai ia karaia!’ Namona be nega ibounai ita noho hegaegae Dirava ese ia karaia vadaeni gau badadia bona nega vairai do ia karaia gaudia ita herevalaia totona.