Oi Kamonai Henia Tauna Dibaia Dalana

NEGA haida ia auka ita kamonai henia tauna ita dibaia totona. Reana emu tama eiava sina ese oi ia hamaoroa gau ta oi karaia totona. To sikuli tisa ta eiava pulisi tauna ta ese oi ia hamaoroa gau idauna do oi karaia. Bema unai ia vara, daika ena hereva do oi kamonai henia?—

Inai buka ena Karoa 7 ai, Baibel amo Efeso 6:​1-3 ita duahia. Unuseniai ia gwau natudia ese edia tama sina idia kamonai henia be namo. Siri ia gwau: “Umui emui tamana bona sinana do umui kamonai henia, Lohiabada lalonai.” (Buka Helağa) “Lohiabada lalonai” ena anina oi diba, a?— Lohiabada lalonai idia noho tama sina ese edia natudia dekenai Dirava ena taravatu idia hadibaia.

To taunimanima badadia haida be Iehova idia abidadama henia lasi. Unai dainai, bema idia ta ia gwau sikuli ena eksam lalonai oi koikoi diba eiava sitoa amo gau ta oi abia kava diba be edena bamona? Natuna ta ia koikoi eiava ia henaohenao be maoro, a?—

Laloaboio lasi, nega ta King Nebukanesa ese taunimanima ibounai ia hagania ia haginia golo kaivakuku dekenai idia tui diho totona. To Sataraka, Misaka bona Abetenigo be unai idia karaia lasi. Ena badina oi diba, a?— Badina Baibel ia gwau taunimanima ese Iehova sibona idia tomadiho henia be namo.—Esodo 20:3; Mataio 4:​10.

Iesu ia mase murinai, ena aposetolo taudia be Iuda taudia edia kota badana, Sanhedrin vairanai idia gini. Hahelaga Tauna Badana Kaiapa ia gwau: “Ai ese taravatu ai atoa, umui hadibaia lasi inai [Iesu ena] ladana dekenai. To hari emui hadibaia hereva dekenai Ierusalema ibounai umui hahonua vadaeni.” Dahaka dainai aposetolo taudia ese Sanhedrin taudia idia kamonai henia lasi?— Petero be aposetolo taudia ibounai totona Kaiapa dekenai ia gwau: “Dirava ai kamonai henia be namo, taunimanima ai kamonai henia be dika.”—Kara 5:​27-​29.

Unai negai, Iuda taudia edia tomadiho gunalaia taudia edia siahu be bada. To, edia tano be Roma gavamani edia lohia henunai ia noho. Unai gavamani ia hakaua tauna ena ladana be Kaisara. Ena be Iuda taudia idia ura lasi Kaisara ese idia ia lohiaia, to Roma gavamani ese taunimanima totona gau namodia momo ia karaia. Bona hari inai negai danu gavamani be edia taunimanima totona gau namodia momo idia karaia. Unai gaudia haida oi diba, a?—

Gavamani ese dala idia karaia bona pulisi bona lahi habodoa taudia dekenai edia gaukara davana idia henia ita idia gimaia totona. Idia ese matamata taudia totona sikuli idia karaia bona hospital idia haginia danu. Gavamani ese moni ia negea unai gaudia karaia totona. Oi diba gavamani be edeseni amo moni ia abia?— Taunimanima amo. Taunimanima ese gavamani dekenai idia henia moni idia gwauraia takisi.

Hadibaia Tauna Badana be tanobada dekenai ia noho neganai, Iuda taudia momo idia ura lasi Roma gavamani dekenai takisi idia henia. Unai dainai dina ta hahelaga taudia ese tatau haida idia siaia Iesu idia nanadaia totona. Henanadai be inai, ‘Kaisara dekenai takisi moni do ai henia, a?’ Idia ura unai amo Iesu idia koia. Bema Iesu ia haere, ‘Oibe, takisi oi henia be namo,’ Iuda taudia momo be ena hereva dainai do idia moale lasi. To Iesu ia gwau diba lasi, ‘Lasi, takisi moni do oi henia lasi.’ Badina unai bamona ia hereva be kerere.

Unai dainai, Iesu be dahaka ia karaia? Ia gwau: ‘Koin ta umui hahedinaraia, lau itaia.’ Iesu dekenai koin ta idia mailaia neganai, ia nanadaidia: ‘Daika ena laulau bona revareva be ia latanai?’ Unai tatau idia gwau: “Kaisara ena.” Unai dainai Iesu ia gwau: “Kaisara ena, Kaisara dekenai do umui henia, to Dirava ena, Dirava dekenai do umui henia.”—Luka 20:​19-​26.

Oibe, ta ese unai haere dekenai kerere ta ia davaria diba lasi. Bema Kaisara be taunimanima totona gau haida ia karaia, ia ese ia karaia moni be unai gaudia edia davana karaia totona ia dekenai idia henia be maoro. Unai dala amo, Iesu ia hahedinaraia ita abia gaudia dainai gavamani dekenai takisi moni ita henia be maoro.

Hari oiemu mauri lagani be ia bada lasi takisi moni oi henia totona. To gavamani dekenai gau ta oi henia be namo. Unai gauna oi diba, a?— Gavamani ena taravatu oi kamonai henia. Baibel ia gwau: ‘Gavamani do ita kamonai henia.’ Idia be gavamani lalonai siahu idia abia taudia. Unai dainai Dirava ese ita ia hamaoroa gavamani ena taravatu ita kamonai henia be namo.—Roma 13:​1, 2.

Reana taravatu ta ia gwau dala dekenai pepa eiava gau ma haida ita negea lasi. Unai taravatu oi kamonai henia be namo, a?— Oibe, Dirava ia ura oi kamonai henia. Pulisi taudia oi kamonai henia danu be namo, a?— Gavamani ese pulisi taudia dekenai edia gaukara davana ia henia taunimanima idia gimaia totona. Idia ita kamonai henia karana be hegeregere gavamani ita kamonai henia bamona.

Unai dainai bema oi ura dala oi hanaia bona pulisi tauna ta ia gwau “Naria!” dahaka oi karaia be namo?— Bema ma haida idia raka hanaia, idia do oi badinaia be namo, a?— Namona be oi naria, herevana oi sibona oi gini. Dirava ia gwau oi kamonai be namo.

Reana oi noho gabuna dekenai hekwakwanai ta ia vara, bona pulisi tauna ta ia gwau: “Dala dekenai umui lao lasi. Ruma dekenai umui noho sibona.” To reana boiboi oi kamonai bona oi ura diba dahaka ia vara noho. Ia vara gauna itaia totona oi raka-lasi be namo, a?— Unai be “gavamani” kamonai henia karana, a?—

Gabu momo ai, gavamani ese sikuli ia haginia bona tisa taudia edia gaukara davana ia henia. Unai dainai oi laloa Dirava ia ura tisa oi kamonai henia, a?— Mani unai oi laloa. Gavamani ese tisa taudia edia gaukara davana ia henia idia hadibaia totona, pulisi taudia dekenai edia gaukara davana ia henia ita idia gimaia totona hegeregerena. Unai dainai pulisi tauna eiava tisa tauna kamonai henia karana be gavamani kamonai henia karana hegeregerena.

To bema tisa tauna ta ia gwau kaivakuku ta dekenai tomadiho karana oi karaia be edena bamona? Unai neganai dahaka do oi karaia?— Heberu memero toi be kaivakuku dekenai idia tui diho lasi, King Nebukanesa ese idia ia hamaoroa neganai danu. Ena badina oi laloatao, a?— Badina idia ura lasi Dirava idia gwau-edeede henia.

Histori torea tauna Will Durant ese Keristani taudia ginigunadia ia herevalaia neganai, ia gwau edia ‘badinaia karana be Kaisara ena lasi.’ Lasi, ia be Iehova ena! Unai dainai laloaboio lasi iseda mauri lalonai Dirava ita atoa guna be namo.

Gavamani ita kamonai henia badina Dirava ia ura unai bamona ita karaia. To bema ita idia hamaoroa Dirava ia taravatua gauna ta ita karaia totona, dahaka ita gwau be namo?— Namona be aposetolo taudia ese hahelaga tauna badana dekenai idia gwauraia herevana ita gwauraia: “Dirava ai kamonai henia be namo, taunimanima ai kamonai henia be dika.”—Kara 5:​29.