Iseda Gari Hanaia Dalana

OI DAVARIA Iehova hesiai henia karana be auka lasi, a?— Hadibaia Tauna Badana ia gwau do ia auka. Iesu idia do hamasea lasi hanuaboina ai, ena aposetolo taudia ia hamaoroa: “Tanobada taudia ese umui do idia badu henia, to umui diba vadaeni, idia ese lau dekenai idia badu henia guna vadaeni.”​—Ioane 15:18.

Petero ia heagi ia gwau Iesu do ia rakatania diba lasi, to Iesu ia gwau Petero ese unai hanuaboi ai nega toi Iesu do ia gorea. Bona Petero be unai bamona ia karaia! (Mataio 26:​31-​35, 69-​75) Unai be edena bamona ia vara?— Unai ia vara badina Petero ia gari bona aposetolo taudia haida danu.

Aposetolo taudia idia gari ena badina oi diba, a?— Mai anina bada gauna ta idia karaia lasi. Unai gauna dibaia karana ese ita do ia durua diba Iehova ita hesiai henia totona, herevana taunimanima be ita dekenai dahaka idia hereva eiava karaia. Guna, Iesu be ena aposetolo taudia ida ia noho hanuaboi ginigabena ai ia vara gauna mani ita laloa lou.

Matamanai, Pasova idia hahelagaia hebou. Dirava ena taunimanima ese lagani ta ta ai unai idia karaia, Aigupito ena igui amo Dirava ese idia ia ruhaia negana idia laloa lou totona. Bena Iesu be idia ida anibou ta ia hamatamaia. Gabeai karoa ta ai unai do ita herevalaia bona ia hahedinaraia edena bamona unai anibou ese ita do ia durua Iesu ita laloatao totona. Anibou murinai bona ena aposetolo taudia ia hagoadaia murinai, Iesu ese Getesemane umana dekenai idia ia hakaua lao. Unai be idia ura henia gabuna, nega momo unuseniai idia lao.

Uma dekenai idia noho neganai, Iesu be uma gabu ena kahana ta dekenai ia lao, ia guriguri totona. Petero, Iamesi bona Ioane ia hamaorodia do idia guriguri danu. To idia mahuta. Nega toi Iesu be sibona ia lao ia guriguri totona, bona unai nega toi ia giroa ia davaria Petero bona ma haida idia mahuta! (Mataio 26:​36-​47) Idia noga bona guriguri noho be namo ena badina oi diba, a?— Mani unai ita herevalaia.

Unai hanuaboi ai Iesu bona aposetolo taudia ma haida ese Pasova idia karaia neganai, Iuda be idia danu ia noho. Reana oi laloatao, Iuda be henaohenao tauna ai ia lao. Hari ia be Iesu hamasea dalana ia karaia tauna ai ia lao. Iuda ia diba Iesu be nega momo ena aposetolo taudia ida Getesemane umana dekenai idia hebou. Unai dainai Iuda ese tuari taudia be unuseniai ia hakaua lao Iesu idia dogoatao totona. Idia ginidae neganai, Iesu ese ia nanadaidia: “Daika umui tahua?”

Tuari taudia idia haere: “Iesu.” Iesu be mai gari lasi ida ia haere: “Lau inai.” Tuari taudia be Iesu ena gari lasi karana dekenai idia hoa bada, unai dainai idia raka muri bona tano dekenai idia moru. Bena Iesu ia gwau: ‘Bema lau umui tahua, lauegu aposetolo taudia mani do idia lao.’​—Ioane 18:​1-9.

Tuari taudia ese Iesu idia dogoatao bona ena imana idia kwatua neganai, aposetolo taudia idia gari bona idia heau boio. To Petero bona Ioane idia ura diba dahaka do ia vara, unai dainai sisina daudau amo tuari taudia murinai idia raka. Gabeai, Iesu be hahelaga tauna badana Kaiapa ena ruma dekenai idia abia lao. Hahelaga tauna badana be Ioane ia diba dainai, Ioane bona Petero be magu lalonai idia vareai.

Hahelaga taudia ibounai be Kaiapa ena ruma dekenai idia haboua vadaeni kota karaia totona. Idia ura Iesu idia hamasea. Unai dainai samani koikoi taudia idia abidia vareai. Taunimanima ese edia imana amo Iesu idia paisia bona idia pataia. Unai ibounai ia vara noho lalonai, Petero be unuseniai ia noho.

Hesiai kekeni ta, geiti ia naria kekenina unai, ese Petero ia itaia. Ia gwau: “Oi danu be Iesu . . . ena durua tauna ta, ani?” To Petero ese Iesu ia gorea. Nega sisina murinai kekeni ma ta ese Petero ia itaia bona ia badibadinai idia gini taudia dekenai ia gwau: “Inai tau danu be Iesu . . . ena durua tauna ta.” Petero ese Iesu ia gorea lou. Nega sisina murinai taunimanima ma haida ese Petero idia itaia bona idia gwau: “Momokani, oi be idia edia turana ta.” Nega ihatoina Petero ese Iesu ia gorea, ia gwau: “Momokani, unai tau be lau diba lasi!” Petero ia gwau ia be hereva momokani ia gwauraia neganai, Iesu ia giroa bona Petero ia itaia.​—Mataio 26:​57-​75; Luka 22:​54-​62; Ioane 18:​15-​27.

Oi diba dahaka dainai Petero ia koikoi?— Oibe, badina ia gari. To dahaka dainai ia gari? Dahaka ia karaia lasi dainai ia gari? Mani unai oi laloa. Iesu be ia gari lasi totona dahaka ia karaia?— Dirava dekenai ia guriguri bona Dirava ese ia durua ia gari lasi totona. Bona laloaboio lasi, Iesu be nega toi Petero ia hamaoroa do ia guriguri, noga, bona naria noho totona. To dahaka ia vara?—

Unai nega ta ta ai, Petero ia mahuta. Ia guriguri lasi bona ia naria noho lasi. Unai dainai Iesu idia dogoatao neganai, ia hoa. Gabeai kota dekenai, Iesu idia botaia bona ia hamasea palanina idia karaia neganai, Petero ia gari. To, hora haida gunanai Iesu ese ena aposetolo taudia ia hamaorodia dahaka do idia mamia?— Iesu be idia ia hamaoroa tanobada ese ia idia inai henia hegeregerena, tanobada ese idia do ia inai henia danu.

Mani ita laloa, Petero dekenai ia vara gauna be ita dekenai ia vara diba. Hegeregere, oi be klasrum dekenai oi noho bona ma haida ese pepe idia saluti eiava Krismas idia moalelaia lasi taudia idia gwauraia dika. Bema ma ta ia giroa bona oi ia nanadaia: “Momokani oi ese pepe oi saluti henia lasi, a?” Eiava ma haida idia gwau: “Ai kamonai Krismas oi moalelaia lasi!” Do oi gari hereva momokani oi gwauraia totona, a?— Petero bamona do oi koikoi, a?—

Gabeai, Petero ia sori bada badina Iesu ia gorea. Ia karaia karana ia lalo-pararalaia neganai, ia raka murimuri ai bona ia tai. Oibe, Iesu dekenai ia giroa lou. (Luka 22:32) Mani unai oi laloa. Dahaka ese ita ia durua diba bena do ita gari lasi bona Petero ese ia gwauraia herevana bamona ita gwauraia lasi?— Laloaboio lasi, Petero be ia guriguri bona ia naria noho lasi. Unai dainai, bema ita ura Hadibaia Tauna Badana ena murinai ita raka, dahaka ita karaia be namo?—

Namona be heduru totona Iehova dekenai ita guriguri. Iesu ia guriguri neganai, Dirava ese ia karaia gauna oi diba, a?— Aneru ta ia siaia Iesu durua totona. (Luka 22:43) Dirava ena aneru ese ita idia durua diba, a?— Baibel ia gwau: “Lohiabada ena aneru ese, Dirava dekenai idia gari taudia ia naridia noho, bona dika dekena amo ia hamauridia noho.” (Salamo 34:7) To Dirava ena heduru ita abia totona, ita guriguri sibona be hegeregere lasi. Oi diba ita karaia gauna ma ta be dahaka?— Iesu ese ena murinai idia raka taudia ia hamaorodia do idia noga bona naria noho. Unai be edena bamona ita karaia diba?—

Namona be iseda Keristani heboudia dekenai idia gwauraia gaudia bona Baibel dekenai ita duahia herevadia ita kamonai henia namonamo. Bona hanaihanai Iehova dekenai ita guriguri bona ita noia ita do ia durua ia ita hesiai henia totona. Bema unai bamona ita karaia, heduru do ita abia iseda gari hanaia totona. Bena do ita moale dala ia kehoa neganai, ma haida dekenai Hadibaia Tauna Badana bona ena Tamana do ita herevalaia.