Iehova Bona Ena Natuna Laloatao

BEMA ta be oi dekenai harihari gauna namo hereana ta ia henia, unai gauna be edena bamona do oi laloa?— Do oi gwau tanikiu bona unai gauna ia henia tauna do oi laloaboio, a? Eiava unai tauna bona oi totona ia karaia karana do oi laloatao?—

Iehova Dirava be ita dekenai harihari gauna namo hereana ta ia henia. Iena Natuna be tanobada dekenai ia siaia ita dainai ia mase totona. Iesu be ita dainai ia mase ena badina oi diba, a?— Namona be unai mai anina bada gauna ita lalo-pararalaia.

Karoa 23 dekenai ita dibaia bamona, Adamu ese Dirava ena taravatu goevadaena ia makohia neganai, ia kara dika. Bona ita ibounai iseda tamana Adamu amo kara dika ita abia. Unai dainai, dahaka ita abia be gau badana?— Tanobada dekenai mauri goevadaena ia noholaia tamana ita abia be gau badana. Oi laloa daika be unai tamana namona?— Iesu.

Iehova ese Iesu be tanobada dekenai ia siaia, unai amo ia be iseda tamana bamona ai ia lao diba, to Adamu lasi. Baibel ia gwau: “ ‘Tau ginigunana, Adamu, be Dirava ese ia karaia, taunimanima edia mauri ia abia.’ To Adamu dokona, gabeai ia mai Tauna be mauri hanaihanai ia henia Laumana.” Daika be Adamu ginigunana?— Oibe, ia be tano kahuna amo Dirava ese ia karaia tauna. Daika be Adamu iharuana?— Iesu. Baibel ese unai ia hahedinaraia, ia gwau: “Adamu ginigunana be tano kahuna dekena amo Dirava ese ia karaia, bona ia be tanobada dekena amo. To Adamu iharuana [Iesu] be guba dekena amo ia mai.”​—1 Korinto 15:​45, 47; Genese 2:7.

Dirava ese Iesu ena mauri be guba amo ia abia bona Maria ena bogana lalonai ia atoa dainai, Iesu be Adamu amo kara dika ia abia lasi. Unai dainai Iesu be tau goevadaena. (Luka 1:​30-​35) Iesu ia vara neganai, aneru ta be mamoe naria taudia dekenai ia gwau: “Hari, inai dina . . . umui emui Hamauria Tauna ia vara vadaeni.” (Luka 2:​11) To Iesu be iseda Hamauria Tauna ai ia lao totona, dahaka ia karaia guna be namo?— Namona be ia tubu daekau bona tau badana ai ia lao, Adamu bamona. Bena Iesu be “Adamu iharuana” ai ia lao diba.

Iesu, iseda Hamauria Tauna be iseda “Hanaihanai Noho Tamana” ai do ia lao danu. Baibel lalonai ia be unai ladana dekenai idia boiria. (Isaia 9:​6, 7) Oibe, goevadae tauna Iesu be iseda tamana ai ia lao diba to Adamu lasi, ia be ia kara dika neganai, goevadae lasi tauna ai ia lao. Unai dala amo “Adamu iharuana” ita abia hidi diba eda tamana ai ia lao totona. Oibe, Iesu be Iehova Dirava ena Natuna.

Iesu dibaia karana amo, do ita abia dae diba ia be iseda Hamauria Tauna. Oi laloatao dahaka gauna amo ita do ia hamauria?— Oibe, Adamu amo ita abia kara dika bona mase amo. Ita dainai Iesu ese ia bouboulaia mauri goevadaena idia gwauraia mauri davana. Iehova ese mauri davana ia henia, unai amo iseda kara dika ia kokia diba.​—Mataio 20:28; Roma 5:8; 6:​23.

Oibe, ita ura lasi Dirava bona ena Natuna ese ita dainai idia karaia gauna ita laloaboio, ani?— Iesu be ia murinai idia raka taudia dekenai dala idauna ia hahedinaraia, unai ese ita ia durua diba ia karaia gauna ita laloatao totona. Mani unai ita herevalaia.

Mani oi laloa oi be Ierusalema dekenai ia noho ruma ta ena atai daiutuna lalonai oi noho. Gabu be ia dibura vadaeni. Iesu bona ena aposetolo taudia be teibolo ta dekenai idia helai. Teibolo dekenai be idia gabua mamoe vamu haida, paraoa haida bona uaina kakakakana idia noho. Idia be anibou ta idia karaia noho. Ena badina oi diba, a?—

Unai anibou ese lagani handred haida gunanai Iehova ese ena taunimanima, Israela taudia be Aigupito dekenai hesiai gaukara idia karaia neganai, idia totona ia karaia gauna idia laloa lou. Unai nega ai Iehova ese ena taunimanima ia hamaoroa: ‘Ruma bese ta ta totona mamoe natuna ta do umui alaia bona ena rara be emu ruma ena iduara ena au kahana kahana dekenai do umui dahua.’ Bena ia gwau: ‘Emu ruma dekenai umui vareai bona mamoe vamuna umui ania.’

Israela taudia ese unai bamona idia karaia. Bona unai hanuaboi tamona ai, Dirava ena aneru be Aigupito tano ia hanaia. Ruma momo lalonai, aneru ese vara guna memerodia ia hamasea. To aneru ese mamoe ena rara be iduara ena au kahana kahana dekenai ia itaia neganai, unai ruma ia hanaia. Unai rumadia lalonai, natuna ta ia mase lasi. Farao, Aigupito ena king be Iehova ena aneru ese ia karaia karana dainai ia gari bada. Unai dainai Farao ese Israela taudia ia hamaoroa: ‘Umui lao diba. Aigupito umui rakatania!’ Vadaeni edia kamelo bona doniki latanai edia kohu idia atoa bona unai gabu idia rakatania.

Iehova ia ura lasi ena taunimanima ese idia Ia ruhaia dalana idia laloaboio. Unai dainai ia gwau: ‘Nega tamona lagani ta ta ai, hari hanuaboi umui ania aniani bamona be do umui ania be namo.’ Unai anibou idia gwauraia Pasova. Unai hanuaboi ai Dirava ena aneru be rara amo idia makaia rumadia ia “hanaia.”​—Esodo 12:​1-​13, 24-​27, 31.

Iesu bona ena aposetolo taudia be Pasova idia ania neganai, unai idia laloa. Gabeai, Iesu ese mai anina bada karana ta ia karaia. Unai ia do karaia lasi neganai, kamonai lasi aposetolo Iuda ia siaia raka-lasi. Bena Iesu ese paraoa ta ia abia, ia guriguri, ia makohia bona ena hahediba taudia dekenai ia henia. Ia gwau: “Umui abia, umui ania.” Bena idia ia hamaoroa: ‘Inai paraoa ese lauegu tauanina ia makaia, umui dainai lau mase neganai do lau henia.’

Gabeai Iesu ese uaina kakakaka kapusina ia abia. Guriguri amo Dirava ia tanikiu henia lou murinai, idia dekenai ia henia bona ia gwau: “Umui ibounai umui inua.” Bona idia ia hamaoroa: ‘Inai uaina be lauegu rarana ia makaia. Daudau lasi egu rarana do lau bubua kara dika ena igui amo umui lau ruhaia totona. Inai bamona do umui karaia, lau do umui laloatao totona.’​—Mataio 26:​26-​28; 1 Korinto 11:​23-​26.

Oi itaia, Iesu ia gwau ena hahediba taudia be unai bamona do idia karaia noho ia idia laloatao totona, ani?— Pasova anibou do idia karaia lou lasi. To, lagani ta ta ai nega tamona unai anibou do idia karaia Iesu ena mase idia laloatao totona. Unai anibou idia gwauraia Lohiabada Ena Anibou. Hari unai anibou ita gwauraia Memorial. Dahaka dainai?— Badina unai nega ai Iehova bona ena Natuna ese ita dainai idia karaia gauna ita laloa lou.

Paraoa ita itaia neganai, Iesu ena tauanina ita laloa be namo. Mai ena ura ida unai tauanina ia henia, unai amo mauri hanaihanai ita abia diba. Bona uaina kakakakana be edena bamona?— Unai ese ita dekenai Iesu ena rara ena anina ia hadibaia lou be namo. Unai rara be Aigupito dekenai Pasova totona idia karaia mamoe ena rara ia hereaia momokani. Ena badina oi diba, a?— Baibel ia gwau Iesu ena rara ese kara dika ia gwauatao diba. Bona iseda kara dika ibounai ia kokia neganai, do ita gorere, buruka bona mase lasi. Memorial dekenai ita lao neganai, unai ita laloa be namo.

Memorial dekenai ibounai ese paraoa do idia ania bona uaina do idia inua be namo, a?— Iesu ese idia ania bona inua taudia ia hamaoroa: ‘Egu basileia lalonai do umui vareai bona guba dekenai lau ida terona latanai do umui helai.’ (Luka 22:​19, 20, 30) Anina be guba dekenai do idia lao Iesu ida do idia lohia totona. Unai dainai guba dekenai Iesu ida do idia lohia taudia sibona ese paraoa bona uaina do idia ania bona inua be namo.

To paraoa eiava uaina idia ania bona inua lasi taudia danu be Memorial dekenai idia lao be namo. Ena badina oi diba, a?— Badina Iesu be ita dainai ena mauri ia henia danu. Memorial dekenai ita lao karana amo ita hahedinaraia unai kara ita laloaboio lasi. Dirava ena harihari gauna namo hereana ita laloatao.