Abata ese Tanobada ta Ia Hadikaia—Do Ia Vara Lou, A?

GUNA oi kamonai tau ta be tanobada ena dokona ia herevalaia, a?— Hari taunimanima momo ese idia herevalaia. Haida idia laloa tanobada be niuklia bomu idia gaukaralaia tuarina ta lalonai do idia hadikaia ore. Oi laloa Dirava ia ura taunimanima ese iseda tanobada hairaina idia hadikaia ore, a?—

Ita dibaia bamona, Baibel ese tanobada ena dokona ia gwauraia. Ia gwau: ‘Tanobada be kahirakahira do ia ore.’ (1 Ioane 2:​17) Oi laloa tanobada dokona ena anina be inai tanobada do ia ore, a?— Lasi, Baibel ia gwau Dirava ese tanobada ia karaia “taunimanima idia noholaia” bona idia moalelaia totona. (Isaia 45:18) Salamo 37:29 ia gwau: “Kara maoromaoro taudia ese, Dirava ia henidia tano dekenai do idia noho ela bona hanaihanai.” Unai badina dainai Baibel ia gwau tanobada be do ia noho hanaihanai.​—Salamo 104:5; Hadibaia Tauna 1:4.

Unai dainai bema tanobada dokona ena anina be inai tanobada do ia ore lasi, vadaeni ena anina be dahaka?— Haere ita davaria diba bema Noa ena negai ia vara gauna ita tahua namonamo. Baibel ia gwau: “Dirava ese unai tanobada gunana be ranu dekena amo ia hadikaia ore, abata badana dekena amo.”​—2 Petero 3:6.

Noa ena negai unai Abata badana ia vara neganai, ta be unai nega ena dokona ai ia roho mauri, a?— Baibel ia gwau Dirava be ia idia dadaraia taudia dekenai abata badana ia mailaia neganai, “Noa, kara maoromaoro ia harorolaia tauna, bona taunimanima 7, idia sibona idia mauri.”​—2 Petero 2:5.

Vadaeni, edena tanobada ia ore? Tano korikorina eiava kara dika taudia?— Baibel ia gwau “Dirava idia kamonai henia lasi” taudia ia hadikaia ore. Bona unai siri ese Noa ia gwauraia ‘haroro tauna.’ Oi laloa dahaka ia harorolaia?— Noa be taunimanima dekenai “unai tanobada gunana” ena dokona ena sivarai ia hadibaia.

Iesu be Abata badana ia herevalaia neganai, iena hahediba taudia dekenai dokona ia do mai lasi neganai, taunimanima ese idia karaia gaudia ia gwauraia. Idia dekenai ia gwau: “Unai neganai, abata badana do ia ginidae lasi neganai, idia aniani noho, idia inuinu noho, idia headava noho, ia mai bona Noa be lagatoi dekenai ia guia dinana. Taunimanima ese idia laloa lasi dahaka do ia vara, idia kara dika noho, ia mai bona abata badana ia ginidae, vadaeni abata ranu ese ibounai ia abia lao.” Bena Iesu ia gwau inai tanobada ia do ore lasi neganai taunimanima be unai bamona gaudia do idia karaia danu.​—Mataio 24:​37-​39.

Iesu ena hereva ese ia hahedinaraia Abata ia do mai lasi neganai, taunimanima ese idia karaia karadia amo gau haida ita dibaia. Inai buka ena Karoa 10 duahia karana amo, unai taudia idia karaia karadia oi laloatao, a?— Tatau haida ese ma haida idia hagaridia bona idia dagedage henidia. To Iesu ia gwau, Dirava ese Noa ia siaia idia dekenai ia haroro totona neganai, momo idia kamonai lasi.

Unai dainai nega ia ginidae neganai, Iehova ese Noa ia hamaoroa, Ia ese abata amo kara dika taudia do ia haorea. Ranu ese tanobada ibounai bona ororo danu ia koua diba. Iehova ese Noa ia hamaoroa lagatoi badana ta do ia karaia. Unai lagatoi be maua badana ta bamona, bema rau 238 ai ia noho laulau oi itaia.

Dirava be Noa ia hamaoroa lagatoi badana ta do ia karaia, unai amo ia, iena ruma bese bona animal momo be lagatoi lalonai do idia noho namonamo diba. Noa bona iena ruma bese idia gaukara goada. Au badadia idia utua bona unai au amo lagatoi idia karaia. Unai lagatoi be bada herea dainai, lagani momo herea lalonai idia karaia.

Unai lagani momo herea lalonai Noa be lagatoi ia karaia neganai, dahaka gaukara ma ta ia karaia danu?— Abata ia mai sivaraina be taunimanima dekenai ia hadibaia. Idia ta ia kamonai, a? Ta ia kamonai lasi, to Noa ena ruma bese taudia sibona. To taunimanima iboudiai be ma gau haida dekenai idia bisi bada. Iesu ia gwau dahaka gaudia idia karaia, oi laloatao, a?— Idia be aniani, inuinu bona headava dekenai idia bisi bada. Idia abia dae lasi idia be kara dika taudia bona nega idia atoa lasi Noa idia kamonai henia totona. Unai dainai idia dekenai ia vara gauna mani ita itaia.

Noa bona ena ruma bese taudia be lagatoi lalonai idia vareai murinai, Iehova ese iduara ia koua. Lagatoi murimurinai idia noho taudia idia do abia dae lasi Abata do ia mai. To haraga herea guba amo ranu ia diho matamaia! Ia be hari ita itaia medu bamona lasi. Ia diho badabada! Daudau lasi ranu be sinavai badadia ai idia lao bona regerege bada ia karaia. Au bona nadi badadia be nadi maragidia bamona ia kokidia. Bona lagatoi murimurinai idia noho taudia be edena bamona?— Iesu ia gwau: “Abata badana ia ginidae, vadaeni abata ranu ese ibounai ia abia lao.” Lagatoi murimurinai idia noho taudia ibounai idia mase. Dahaka dainai?— Iesu ia gwau bamona, “idia laloa lasi dahaka do ia vara.” Idia kamonai lasi!​—Mataio 24:39; Genese 6:​5-7.

Laloatao, Iesu ia gwau unai taudia dekenai ia vara gauna ese ita dekenai gau ta ia hadibaia. Unai amo dahaka ita dibaia?— Taunimanima idia kara dika dainai ia hamasedia sibona lasi, to momo idia bisi bada dainai nega idia atoa lasi Dirava bona do ia karaia gauna idia dibaia totona. Ita naria namonamo be namo, edia kara ita tohotohoa garina.—

Oi laloa Dirava be abata amo tanobada do ia hadikaia lou, a?— Lasi, Dirava ia gwauhamata do ia karaia lou lasi. Ia gwau: “Lauegu kevau be ori lalonai lau atoa inai. Ia be egu gwauhamata.” Iehova ia gwau kevau be toa ta, ia hahedinaraia “abata ese mauri gaudia do ia hadikaia ore lou lasi.”​—Genese 9:​11-​17.

Unai dainai ita diba Dirava ese abata amo tanobada do ia hadikaia lou lasi. To, ita itaia bamona, Baibel ese tanobada ena dokona ia herevalaia. Dirava ese inai tanobada ia hadikaia neganai, daidia do ia hamauridia?— Gau ma haida idia laloa momo, to idia ura lasi Dirava idia dibaia taudia, a? Eiava idia bisi bada dainai idia be nega lasi Baibel idia stadilaia taudia, a? Dahaka oi laloa?—

Ita ura ita be Dirava ese do ia hamauria taudia huanai ita noho, ani?— Do ia namo herea bema iseda ruma bese be Noa ena ruma bese bamona, unai amo Dirava ese ita ibounai do ia hamauria, ani?— Bema ita ura tanobada dokona dekenai ita roho mauri, Dirava ese inai tanobada do ia hadikaia bona iena kara maoromaoro tanobada matamatana do ia havaraia dalana ita lalo-pararalaia be namo. Unai do ia karaia dalana mani ita itaia.

Baibel ese Daniela karoa 2, siri 44 dekenai unai ia herevalaia. Unai siri be iseda nega ia herevalaia, ia gwau: “Unai basileia namba 4 ena nega lalonai, guba ena Dirava ese basileia [eiava gavamani] ta do ia haginia, inai basileia be do idia hadikaia diba lasi ela bona hanaihanai. Unai basileia be Dirava ese do ia naria, vadaeni bese ta ese do ia halusia diba lasi. Bona unai basileia ese basileia ibounai do ia hamakohia, bona haorea momokani, bona ia sibona do ia noho ela bona hanaihanai.”

Unai oi lalo-pararalaia, a?— Baibel ia gwau Dirava ena gavamani ese tanobada ena gavamani ibounai do ia hadikaia ore. Dahaka dainai?— Badina Dirava ese King ai ia halaoa Tauna idia kamonai henia lasi. Bona unai tauna be daika?— Oibe, Iesu Keriso!

Iehova Dirava be mai ena maoro do ia lohia gavamanina ia abia hidi totona bona iena Natuna, Iesu, ia abia hidi King ai ia lao totona. Daudau lasi Dirava ena Lohia Tauna, Iesu Keriso, ena hakaua henunai tanobada ena gavamani ibounai do idia hadikaia ore. Apokalupo karoa 19, siri 11 ia lao 16 ese unai do ia karaia dalana ia gwauraia, inai laulau ese ia hahedinaraia bamona. Baibel ia gwau Dirava ena tuari, tanobada ena gavamani ibounai do ia hadikaia tuarina, ena ladana idia gwauraia Aramagedono.

Dirava ia gwau iena Basileia ese taunimanima edia gavamani do ia hadikaia ore. To ita ia hamaoroa unai ita karaia totona, a?— Lasi, Baibel ia gwau Aramagedono be “Siahu Ibounai Diravana ena Dina Badana.” (Apokalupo 16:​14, 16) Oibe, Aramagedono be Dirava ena tuari, bona Iesu Keriso ia gaukaralaia guba ena ami oreadia be tuari dekenai ia hakaudia totona. Aramagedono tuarina be ia kahirakahira, a? Unai ita diba dalana mani ita itaia.