Natudia be Tama Sina amo Idia Ura Abia Gauna
TAMA SINA ibounai be taunimanima ese idia lalo-pararalaia diba lasi gauna idia durua. Idia ta ta ese edia tauanina amo gau ta idia henia. Unai dainai, sinana ena bogana lalonai ia tubu gauna be mauri tauna. Unai dainai ita hoa lasi, beibi ta ia vara neganai, taunimanima idia gwau “beibi ena vara dalana be hoa gauna.”
Momokani, natudia havaraia karana be tama sina edia maduna ena hamatamaia sibona. Matamanai, ta ese beibi ia naria be namo, to idia tubu daekau noho lalonai, tama sina ese tauanina dalanai sibona lasi to dala haida amo idia naria danu be namo. Gau badana be heduru idia abia edia hemami, kara, lalona bona lauma dalanai idia goada idia lao totona.
Natudia idia tubu daekau namonamo totona, tama sina edia lalokau idia mamia be gau badana. Ena be tama sina ese edia natudia idia hamaoroa idia lalokau henia, to edia kara amo edia hereva idia hamomokania be namo. Oibe, natudia ese tama sina edia haheitalai namona idia itaia be gau badana. Kara maoromaoro taravatudia bona hakaua herevadia edia mauri dekenai idia abia be namo. Bona idia do maragi neganai unai idia abia be gau badana. Natudia be heduru idia abia lasi ela bona idia bada neganai, lalohisihisi gaudia idia vara diba.
Baibel sibona lalonai hakaua hereva hereadia ita davaria diba. Baibel amo idia mai hadibaia herevadia ese namo bada idia havaraia. Unai bamona hadibaia herevadia amo, natudia idia lalo-parara idia dekenai idia gwauraia herevadia be taunimanima edia hereva lasi, to edia Havaraia Tauna, edia guba Tamana ena hereva. Unai dainai tama sina ese natudia hadibaia totona idia henia sisiba herevadia be mai edia siahu bona idia be hereadae.
Baibel ese tama sina ia hagoadaia do idia hekwarahi edia natudia edia lalona dekenai hakaua hereva maorodia idia atoa totona. To, natudia idia tubu daekau noho lalonai, tama sina idia hekwarahi bada idia ida mai anina bada gaudia idia herevalaia totona. Inai buka, Hadibaia Tauna Badana amo Diba Ita Abia, idia karaia dalana amo tama sina ia durua bena unai bamona hekwakwanai do ia vara lasi. Inai buka be lauma dalanai hereva namodia ia hahedinaraia, oi bona emu natudia umui duahia hebou totona. To unai sibona lasi, inai buka ese matamata taudia bona idia ida inai buka idia duahia taudia huanai herevahereva dalana namona ia kehoa be namo.
Do oi itaia inai buka lalonai natudia idia haere diba. Inai buka lalonai henanadai namodia momo idia noho. Unai kahana dekenai oi mai neganai, des (—) ta do oi itaia. Unai ena anina be duahia karana oi hadokoa bona natuna oi hagoadaia ena lalohadai ia gwauraia hedinarai totona. Nega momo natudia idia ura edia lalohadai idia gwauraia. Bema lasi, do idia hesiku haraga.
Mai anina bada gauna be inai, inai henanadai ese oi do ia durua emu natuna ena lalohadai oi dibaia totona. Momokani, reana emu natuna ese haere kererena ia henia diba. To unai henanadai murinai idia torea herevadia ese emu natuna ia durua diba hereva lalohadailaia karana ia diba totona.
Inai buka ena laulau ibounai be 230 mai kahana. Laulau momo edia henunai hereva maragidia idia noho, unai ese natuna ia durua ia itaia bona ia duahia gauna amo haere ia henia totona. Unai dainai natuna ida unai laulau oi riviulaia. Idia be hadibaia gaudia namodia, idia ese mai anina bada gaudia idia hahedinaraia diba.
Natuna be duahiduahi ia diba neganai, ia oi hagoadaia inai buka be oi dekenai ia duahia bona ia sibona dekenai danu. Ia duahia loulou karana amo, ena sisiba namodia be iena lalona bona kudouna dekenai do ia atoa. To oi bona natuna huanai lalokau bona hemataurai karana oi hagoadaia totona, inai buka umui duahia hebou hanaihanai be namo.
Hari natudia be sihari kava karadia, meamea, bona moale karadia dikadia idia kamonai bona itaia diba, to lagani haida gunanai taunimanima idia laloa unai bamona gaudia do idia vara lasi. Unai dainai ta ese idia ia gimaia be namo, inai buka ese hemataurai dalanai unai gaudia ia gwauraia hedinarai goevagoeva. To, tama sina ese natudia be aonega ibounai ena Badina, iseda guba Tamana, Iehova Dirava, dekenai idia hakaua lao be namo. Iesu, Hadibaia Tauna Badana, be hanaihanai unai bamona ia karaia. Ai laloa inai buka ese oi bona emu ruma bese do ia durua emui mauri be Iehova ia moalelaia dalanai umui noholaia totona, unai amo noho hanaihanai hahenamo do umui abia.