Aneru Badana Mikaela be Daika?

BAIBEL ese Mikaela ia gwauraia momo lasi. To, Baibel ese ia ia herevalaia neganai, nega momo ia be gaukara ta ia karaia. Hegeregere, Daniela bukana ai, Mikaela be aneru dikadia ia tuari henia; Iuda bukana ai, ia be Satani ida ia hepapahuahu; bona Apokalupo dekenai, ia be Diabolo bona ena demoni ida ia tuari. Mikaela ese Iehova ena lohia siahuna ia abia isi bona Dirava ena inai taudia ia tuari henia karana amo ia hahedinaraia, ena ladana ena anina​—“Daika be Dirava Bamona?”​—hegeregerena ia kara. To Mikaela be daika?

Taunimanima haida edia ladadia be momo. Hegeregere, Iakobo ena ladana ma ta be Israela, bona aposetolo Petero ena ladana ma ta be Simona. (Genese 49:​1, 2; Mataio 10:2) Unai hegeregerena, Baibel ese ia hahedinaraia Mikaela be Iesu Keriso ena ladana ma ta, guba ai ia noho neganai unai ladana ia abia bona hari unai ladana ia do gaukaralaia noho. Baibel ese unai ia hamomokania daladia haida mani ita itaia.

Aneru badana. Baibel ia gwau Mikaela be “aneru badana.” (Iuda 9) Baibel ese “aneru badana” ia herevalaia neganai, ia be aneru tamona sibona ia herevalaia, nega ta ia gwau lasi aneru badadia. Unai ese ia hahedinaraia aneru badana tamona sibona ia noho. Bona Baibel ia gwau Iesu be aneru badana ena dagi ia abia. Tesalonika Ginigunana 4:16 ese ia toreisi lou Lohiabada Iesu Keriso ia herevalaia neganai, ia gwau: “Mai goada danu Lohiabada do ia boiboi, bona aneru badana ese do ia boiboi.” Baibel ese ia hahedinaraia, Iesu ena gadona be aneru badana ena gadona. Unai dainai, unai siri ese ia hahedinaraia Iesu be aneru badana Mikaela.

Ami edia Hakaua Tauna. Baibel ia gwau, “Mikaela mai ena aneru momo danu ese . . . huala mai ena aneru momo danu . . . idia tuari henia.” (Apokalupo 12:7) Unai dainai, Mikaela be kamonai aneru ibounai edia Hakaua Tauna. Apokalupo bukana ese danu ia hahedinaraia, Iesu be kamonai aneru orea ibounai edia Hakaua Tauna. (Apokalupo 19:​14-16) Bona aposetolo Paulo ese “Lohiabada Iesu bona iena aneru mai siahu bada” ia herevalaia. (2 Tesalonika 1:7) Unai dainai, Baibel ese Mikaela bona “iena aneru” bona Iesu bona “iena aneru” ia gwauraia. (Mataio 13:41; 16:27; 24:31; 1 Petero 3:22) Siri ta ese ia hahedinaraia lasi guba dekenai kamonai aneru orea rua ia noho​—ta be Mikaela ese ia hakaua bona ma ta be Iesu ese ia hakaua​—unai dainai ita gwau diba Mikaela be Iesu Keriso.a