“Babulonia Badana” Dibaia Dalana

APOKALUPO bukana dekenai laulau herevadia momo idia noho. (Apokalupo 1:1) Hegeregere, ia gwau hahine ta ena baguna dekenai inai ladana “Babulonia badana” ia noho. Baibel ia gwau unai hahine be taunimanima hutuma bona “bese idauidau taudia” latanai ia helai. (Apokalupo 17:​1, 5, 15) Hahine korikori ta be unai bamona ia karaia diba lasi, unai dainai Babulonia Badana ese gau ta ia laulaulaia. Vadaeni, unai ariara hahine ese dahaka ia laulaulaia?

Apokalupo 17:18 ia gwau, unai hahine be “hanua badana, tanobada ena king ibounai ia ese ia biagua hanuana.” Inai hereva “hanua” ese orea ta ia laulaulaia. Unai “hanua badana” ese “tanobada ena king” ibounai ia biagua dainai, reana inai hahine, Babulonia Badana, be orea badana ta bona iena gaukara be tanobada ibounai lalonai ia karaia. Ita gwau diba Babulonia Badana be siahu bada oreana ta. Edena bamona oreana? Tomadiho oreana. Apokalupo bukana ena siri haida ese ita do idia durua unai hereva ita lalopararalaia totona, mani ita itaia.

Politikol, bisinesi bona tomadiho oreadia be mai edia siahu bada. Inai hahine idia gwauraia Babulonia Badana, be politikol oreana ta lasi, badina Baibel ia gwau “tanobada ena king,” eiava inai tanobada ena politikol oreadia be “ia danu matabodaga karadia idia karaia.” Iena matabodaga karadia anina be inai tanobada gavamani ida ia gaukara hebou, unai dainai Baibel ese ia ia gwauraia “ariara hahine badana.”​—Apokalupo 17:​1, 2; Iamesi 4:4.

Babulonia Badana be bisinesi oreana ta lasi, badina ia idia hadikaia ore neganai, “tanobada ena hoihoi taudia,” bisinesi oreadia unai, be ia dainai do idia taitai. Baibel ia gwau king bona hoihoi taudia ese Babulonia Badana be “daudau dekena amo” do idia itaia. (Apokalupo 18:​3, 9, 10, 15-17) Unai dainai, ita gwau diba Babulonia Badana be politikol eiava bisinesi oreana badana ta lasi, to ia be tomadiho oreana.

Babulonia Badana ese “meamea karadia” amo bese ibounai ia koia bona unai ese ia hamomokania ia be tomadiho oreana. (Apokalupo 18:23) Meamea karadia ibounai be tomadiho koikoi bona demoni amo idia mai dainai, Baibel ese Babulonia Badana ia gwauraia “lauma dikadia edia noho gabuna.” (Apokalupo 18:2; Deuteronomi 18:​10-12) Babulonia Badana ese danu tomadiho momokani ia dadaraia, “peroveta taudia” bona “helaga taudia” ia dagedage henia. (Apokalupo 18:24) Babulonia Badana ese tomadiho momokani ia inai henia dainai, “Iesu idia badinaia” taudia ia dagedage henia bona ia hamasedia danu. (Apokalupo 17:6) Unai dainai, inai hahine idia gwauraia Babulonia Badana, ese tomadiho koikoi ibounai ia laulaulaia​—Iehova Dirava idia inai henia tomadiho ibounai unai.