Mai Momokani ida Gau Ibounai Karaia

1, 2. Dahaka dainai Iehova ia itaia ita be kara momokani ita badinaia neganai ia moale? Haheitalai gwauraia.

SINA ta bona ena natuna mero be sitoa ta amo idia raka-lasi. To, mero be ia gini bona ena toana be ia gari. Iena imana dekenai sitoa amo ia abia gadara gauna ta ia dogoatao noho. Ia laloaboio dainai unai gauna ia atoa lou lasi o ena sinana ia hadibaia lasi ia hoia totona. Unai dainai ia gari bona sinana dekenai ia boiboi. Ena sinana ese ia hamaoroa do ia gari lasi, bona sitoa dekenai ia hakaua vareai unai gauna ia atoa lou bona sori hereva ia gwauraia totona. Mero be unai bamona ia karaia neganai, sinana ia moale bada. Dahaka dainai sinana ia moale?

² Tama sina be hanaihanai idia moale, bema idia itaia edia natudia be kara momokani idia badinaia. Bona iseda guba Tamana, “kara momokani ena Dirava” be unai bamona danu. (Salamo 31:5) Ia itaia lo Keristani taudia ai ita lao bona ita ura kara momokani ita badinaia neganai, ia moale. Ita ura Ia ita hamoalea bona iena lalokau lalonai ita noho dainai, Paulo ena hereva ita badinaia, ia gwau: “Ai ura mai momokani ida gau ibounai ai karaia.” (Heberu 13:18, NW) Hari, gau badadia foa do ita herevalaia. Nega haida ita davaria unai gaudia dekenai kara momokani ita badinaia be auka. Gabeai, kara maoromaoro ita badinaia dainai ita abia hahenamo do ita herevalaia.

MAI MOMOKANI IDA SIBONA EDA KARA ITA TAHUA

3-5. (a) Ita sibona ita koia karana dekenai edena dala ai Baibel ese ita ia sisiba henia? (b) Dahaka ese ita ia durua mai momokani ida sibona eda kara ita tahua totona?

³ Mai momokani ida sibona eda kara ita tahua be ia auka. Ita be kara dika taudia dainai, nega momo ita sibona ita koia. Hegeregere, Iesu ese Laodikea Keristani taudia ia hamaoroa, idia be sibona idia koia badina idia laloa idia taga, to Iesu ena matanai idia be idia “ogogami, matakepulu, bona kopina kavakava,” badina idia ese Dirava tura henia karana idia rakatania. (Apokalupo 3:17) Edia koikoi karana ese idia karaia kara dika ia habadaia sibona.

⁴ Danu Iamesi ena sisiba oi laloatao, ia gwau: “Tau ta bema ia laloa ia be Keristani tauna namona, to iena malana ia naria diba lasi neganai, ia ese sibona ena lalona ia koia noho. Unai tau ena Keristani kara be anina lasi.” (Iamesi 1:26) Bema ita laloa, ena be iseda malana ita gaukaralaia kerere to Dirava be iseda tomadiho karana ia abia dae—ita be sibona ita koia noho. Iseda tomadiho Iehova dekenai be anina lasi. Dahaka ese ita do ia durua unai dika ita dadaraia totona?

⁵ Unai karoa tamona lalonai, Iamesi ese Dirava ena hereva be hevarivari ida ia hahegeregerea. Ita ia sisiba henia Dirava ena taravatu goevadaena ita stadilaia bona unai hegeregerena iseda kara ita hanamoa be namo. (Iamesi 1:23-25) Baibel ese ita ia durua diba mai momokani ida sibona eda kara ita tahua bona do ita itaia edena kara ita hanamoa be namo. (Lalohisihisi ena Ane 3:40; Hagai 1:5) Danu Iehova ita noia diba iseda lalona do ia tahua, iseda lalohadai kerere do ia hahedinaraia bena do ita itaia edena kara dikadia ita rakatania be namo. (Salamo 139:23, 24) Kara koikoi be kara dika badana ta, unai dainai Iehova ena lalohadai ita abia dae be namo. Aonega Herevadia 3:32 ia gwau: “Lohiabada ese kara gagevagageva taudia, ia ura henia lasi momokani, to kara maoromaoro taudia be ia ese ia abidadama henia noho.” Iehova ese ita ia durua diba iena lalohadai hegeregerena kara momokanidia ita laloa bona iseda kara ita tahua totona. Laloatao, Paulo ia gwau: “Ai ura mai momokani ida gau ibounai ai karaia.” Ena be hari do ita goevadae diba lasi, to ita ura dikadika kara momokani ita badinaia.

RUMA BESE LALONAI KARA MOMOKANI BADINAIA

6. Dahaka dainai headava taudia be ta ta dekenai kara momokani idia hahedinaraia be namo? Bona unai amo edena kara dika idia dadaraia diba?

⁶ Namona be Keristani ruma bese taudia ese kara momokani idia hahedinaraia. Tau bona hahine be ta ta dekenai kara momokani idia hahedinaraia be namo. Keristani headava lalonai miro karadia, hegeregere tau o hahine ma ta hauraia kava karana, hunia dalanai Internet amo ta tura henia karana, eiava ponografi itaia karana be maoro lasi. To, madi headava Keristani taudia haida be unai kara dikadia idia karaia bona edia adavana amo idia hunia. Unai be koikoi karana. King Davida ena hereva oi laloa: “Koikoi taudia danu lau helai noho lasi, bona kara maoromaoro koikoi taudia danu, be lau haboua tamona lasi.” (Salamo 26:4) Bema oi headava vadaeni, namo lasi kara dikana ta oi karaia bona emu adavana amo oi hunia!

7, 8. Baibel lalonai edena haheitalai ese natudia ia durua kara momokani idia ura henia bona laloa bada totona?

⁷ Tama sina be edia natudia dekenai kara momokani idia hadibaia neganai, Baibel ai idia noho haheitalai idia gaukaralaia diba. Kara koikoi idia karaia taudia haida edia sivarai idia noho, hegeregere Akana, Gehasi, bona Iuda. Akana be ia henaohenao bona ena kara ia hunia toho, Gehasi be ia ura kohu momo ia abia dainai ia koikoi bona Iuda be ia henaohenao bona koikoi dalanai Iesu ena mase dalana ia karaia.—Iosua 6:17-19; 7:11-25; 2 King Taudia 5:14-16, 20-27; Mataio 26:14, 15; Ioane 12:6.

⁸ To Baibel lalonai kara momokani taudia haida edia sivarai idia noho danu. Hegeregere Iakobo, Iepeta bona ena natuna kekeni, bona Iesu Keriso. Iakobo be ena natudia ia hamaoroa edia bosea lalonai idia davaria moni do idia abia giroa lou, badina ia laloa unai be Aigupito taudia idia kerere bona idia udaia. Iepeta ena natuna kekeni be sibona ena ura ia dadaraia bona ena tamana ena ura ia abia dae. Iesu be idia dagedage taudia dekenai sibona ia gwauraia hedinarai, unai amo peroveta herevadia idia guguru bona ena turadia ia gimaia. (Genese 43:12; Gunalaia Taudia 11:30-40; Ioane 18:3-11) Unai be sivarai haida sibona, to unai ese tama sina dekenai ia hahedinaraia Baibel amo edia natudia idia hadibaia diba kara momokani idia ura henia bona laloa bada totona.

9. Bema tama sina idia ura natudia dekenai kara momokani idia hahedinaraia, dahaka idia dadaraia be namo? Bona dahaka dainai edia haheitalai namona be mai anina bada?

⁹ Unai bamona hahediba karana be tama sina edia maduna badana ta. Paulo ia gwau: “Taunimanima haida umui hadibaia, to dahaka dainai umui sibona umui hadibaia lasi? Umui haroro, umui gwau, ‘Henaoa lasi,’ to umui be umui henaoa, a?” (Roma 2:21) Tama sina haida ese edia natudia dekenai kara momokani idia hadibaia, to idia sibodia be unai idia badinaia lasi. Reana, tama sina ese dava maragi gauna ta idia henaoa neganai, idia gwau: “Unai be gau ta lasi, gaukara taudia idia diba taunimanima ese unai kohu haida do idia henaoa.” Eiava koikoi herevana ta idia gwauraia neganai, idia gwau: “Unai be koikoi badana lasi, ia be gau maragina sibona.” To momokani, henaohenao be kara dikana, ena be ia be dava maragi o dava bada gauna. Bona hereva koikoi gwauraia karana be kara dikana, ena be ia be gau badana o gau maragina.a (Luka 16:10) Natudia be tama sina edia koikoi karadia idia itaia haraga diba bona edia kara namodia ia hadikaia diba. (Efeso 6:4) To, bema edia tama sina edia haheitalai amo kara momokani idia dibaia, idia bada neganai inai koikoi tanobada lalonai Iehova idia hanamoa diba.—Aonega Herevadia 22:6.

KONGRIGEISEN LALONAI KARA MOMOKANI BADINAIA

10. Tadikaka bona taihu ida ita herevahereva neganai, dahaka gaudia ita laloa bada be namo?

¹⁰ Iseda tadikaka taihu ita bamoa neganai, unai ese ita do ia durua kara momokani ita habadaia totona. Karoa 12 ai ita dibaia hegeregerena, namona be eda harihari gauna, herevahereva karana unai, ita naria namonamo. Iseda tadikaka bona taihu ida ita herevahereva neganai, unai ita laloa bada be namo. Ma haida ida ita herevahereva karana be ma haida maumauraia eiava edia ladana hadikaia karana ai ia lao diba! Bema ita diba lasi sivarai ta be momokani o koikoi bona ita herevalaia, reana ita be koikoi herevana ita halasia noho, unai dainai ita herevalaia gaudia dekenai ita naria namonamo. (Aonega Herevadia 10:19) Danu, ena be ita diba hereva ta be momokani, to namo lasi ita laloa ma haida dekenai ita herevalaia be maoro. Hegeregere, ita be maoro lasi ma haida edia mauri lalonai idia vara gaudia be ma haida dekenai ita kikilaia totona, o reana ita herevalaia be lalokau karana lasi. (1 Tesalonika 4:11, NW) Taunimanima haida be ma ta idia hereva auka henia neganai, idia gwau unai be momokani dainai idia gwauraia, to namona be nega ibounai mai hebogahisi bona hemataurai ida ita hereva.—Kolose 4:6.

11, 12. (a) Haida be kara dika badana idia karaia neganai, edena dala ai unai hekwakwanai idia habadaia? (b) Kara dika badadia dekenai, Satani be dahaka koikoi hereva haida ia halasia, bona edena dala ai ita dadaraia diba? (c) Edena dala ai Iehova ena orea dekenai kara momokani ita hahedinaraia diba?

¹¹ Kongrigeisen idia gunalaia taudia dekenai hereva momokani ita gwauraia be mai anina bada. Kara dika badadia idia karaia taudia haida idia ura edia kara dika idia hunia dainai, elda taudia ese idia nanadaia neganai, idia koikoi. To unai ese edia kara dika ia habadaia sibona. Unai bamona taudia be mai koikoi ida Iehova idia hesiai henia, bona hehuni dalanai kara dika badadia idia karaia noho. Unai bamona tauna ena kara ibounai be koikoi sibona. (Salamo 12:2) Ma haida be elda taudia dekenai hereva momokani ena kahana haida sibona idia gwauraia, to mai anina bada hereva haida idia hunia. (Kara 5:1-11) Unai bamona koikoi karadia be Satani amo idia mai.—Rau 188 ai maua ladana “Satani Ena Koikoi Herevadia Kara Dika Badadia Dekenai” itaia.

¹² Bema Iehova ena orea ena pepa haida ita hahonua neganai, unai pepa dekenai hereva momokani sibona ita torea be namo. Hegeregere, iseda haroro gaukara ena ripoti ita torea neganai, ita koikoi lasi be gau badana. Eiava, hesiai gaukara totona aplikeisen ita hahonua neganai, bema ita be mai eda gorere, namona be pepa ai ita hahedinaraia bona mai momokani ida iseda mauri bona iseda hesiai gaukara ena sivarai ita torea.—Aonega Herevadia 6:16-19.

13. Edena dala ai tadikaka ida bisinesi ita karaia neganai, kara momokani ita hahedinaraia?

¹³ Bisinesi karadia dekenai danu kara momokani ita hahedinaraia be namo. Nega haida tadikaka bona taihu be bisinesi idia karaia hebou. Namona be idia naria namonamo, unai bisinesi karadia be Kingdom Hall ai eiava haroro gaukara ai idia karaia o herevalaia lasi. Reana tadikaka ta be tadikaka ma ta totona ia gaukara. Bema tadikaka o taihu haida ita abia iseda kampani dekenai idia gaukara totona, vadaeni namona be mai momokani ida idia ita kara henia, edia gaukara negana hegeregerena edia davana ita henia, bona gavamani ena taravatu hegeregerena hahenamo haida ita henia be namo. (1 Timoteo 5:18; Iamesi 5:1-4) Eiava, bema ita be tadikaka ta o taihu ta ena kampani dekenai ita gaukara, namona be ita gaukara ena hora ibounai lalonai ita gaukara, badina unai hegeregerena pei do ita abia. (2 Tesalonika 3:10) Namo lasi ita laloa ia be iseda tadikaka dainai ita do ia kara namo henia, hegeregere ita dekenai holide, hahenamo haida eiava harihari gaudia ma haida do ia henia, to gaukara taudia ma haida dekenai unai bamona do ia karaia lasi.—Efeso 6:5-8.

14. Keristani taudia be bisinesi idia karaia hebou neganai, dahaka idia karaia be namo, bona dahaka dainai?

¹⁴ To edena bamona bema ita bona tadikaka be abiatorehai ta ita karaia hebou eiava bisinesi ta dekenai moni ita atoa hebou? Baibel be hakaua hereva namona ta ia henia: Pepa dekenai bisinesi karadia ibounai ita torea be namo! Hegeregere, Ieremia be tano kahana ta ia hoia neganai, unai gaudia be pepa rua dekenai ia torea, hamomokania taudia ese idia sainia danu, bona idia atoa namonamo gabeai idia gaukaralaia totona. (Ieremia 32:9-12; Genese 23:16-20 itaia danu.) Tadikaka ida bisinesi ita karaia neganai, pepa ta ai unai gaudia ita torea, ita sainia, bona hamomokania taudia idia sainia danu be namo. Namo lasi ita laloa unai kara ese ia hahedinaraia ita be eda tadikaka ita abidadama henia lasi, lasi. To, unai kara ese lalohadai kereredia, lalohisihisi, bona heiriheiri karadia do ia koua. Tadikaka ta be tadikaka ma ta ida bisinesi idia karaia neganai, namona be idia laloatao kongrigeisen ena lalotamona bona maino be gau badana, namo lasi edia bisinesi karana ese unai ia hadikaia.b—1 Korinto 6:1-8.

TANOBADA TAUDIA HUANAI KARA MOMOKANI BADINAIA

15. Iehova ena lalohadai bisinesi kara koikoidia dekenai be dahaka, bona Keristani taudia be dahaka idia karaia be namo?

¹⁵ Keristani tauna ese kara momokani be kongrigeisen lalonai sibona do ia karaia lasi. Paulo ia gwau: “Ai ura mai momokani ida gau ibounai ai karaia.” (Heberu 13:18, NW) Tanobada taudia ida bisinesi ita karaia neganai, iseda Havaraia Tauna ia ura kara momokani ita badinaia. Aonega Herevadia bukana lalonai, nega foa sikele koikoidia ia herevalaia. (Aonega Herevadia 11:1; 16:11; 20:10, 23) Idaunegai, maketi gabudiai sikele bona hametaua gaudia idia gaukaralaia idia hoihoilaia gauna ena metau bona davana karaia monina ena metau idia tahua totona. Unai bisinesi taudia be hametaua gaudia rua bona sikele koikoi idia gaukaralaia taunimanima idia koia totona.c Iehova be unai bamona kara ia ura henia lasi! Dirava ena lalokau lalonai ita noho totona, bisinesi kara koikoidia ita dadaraia be gau badana.

16, 17. Hari inai negai edena bamona koikoi karadia be idia bada, bona Keristani taudia korikoridia idia ura edena kara do idia badinaia?

¹⁶ Satani be tanobada ena lohia dainai, koikoi karadia idia bada idia lao be ita hoalaia lasi. Dina ta ta ai hahetoho ita davaria koikoi karana ta ita karaia totona. Taunimanima be gaukara ta abia totona edia pepa o CV (curriculum vitae) dekenai nega momo koikoi herevadia idia torea bona idia gwau gaukara idauidau idia karaia diba bona kampani idauidau dekenai idia gaukara vadaeni. Taunimanima be tano idauna dekenai idia lao pepana, takisi pepana, insurens pepana, bona unai bamona pepa ma haida idia hahonua neganai, koikoi herevadia idia torea, unai amo gwaumaoro idia abia diba. Student taudia momo be eksam dekenai idia koikoi, bona sikuli gaukara ai sivarai o ripoti ta idia torea gwauraia neganai, Internet ai tau ta ia torea sivaraina ta idia gaukaralaia, to idia gwau unai be idia sibona ese idia torea gauna. Bona taunimanima be kara koikoi gavamani taudia amo gwaumaoro ta idia ura abia neganai, idia ese laloani moni idia henia. Inai tanobada ai inai bamona kara momo ita itaia, badina momo be “edia ura sibona do idia tahua, moni do idia mataganigani henia, . . . kara namodia do idia ura henia lasi.”—2 Timoteo 3:1-5.

¹⁷ Keristani taudia korikoridia be edia lalona idia hadaia unai bamona koikoi karadia idia dadaraia totona. To, nega haida unai be auka badina toana be koikoi karadia idia karaia taudia be edia mauri lalonai gau namodia momo idia davaria bona idia moale. (Salamo 73:1-8) Nega haida, Keristani taudia be moni dalanai idia hekwarahi sisina badina idia ura “gau ibounai ai” kara momokani idia badinaia. Kara momokani idia badinaia dainai gau haida idia reaia be namo, a? Oibe! To dahaka dainai ita gwau, oibe? Kara momokani idia badinaia dainai, dahaka hahenamo do idia davaria?

KARA MOMOKANI BADINAIA KARANA ENA HAHENAMO

18. Dahaka dainai kara momokani ia badinaia tauna be ladana namona ia abia?

¹⁸ Bema taunimanima idia gwau oi be kara momokani tauna, unai be ladana namona bona tanobada ena kohu ta ese unai ia hereaia lasi. (Rau 191 ai maua ladana “Nega Ibounai Lau be Kara Momokani Lau Badinaia, A?” itaia.) Mani oi laloa—taunimanima ibounai be kara momokani taudia ai idia lao diba! Kara momokani tauna ena ladana namona oi abia totona, emu toana, diba, moni, kohu, o mauri dalana be anina lasi. To taunimanima momo be kara momokani idia hahedinaraia lasi. Hari, kara momokani taudia momo do ita davaria lasi. (Mika 7:2) Haida be emu kara momokani dainai oi do idia kirikirilaia, to ma haida be emu kara momokani do idia laloa bada, bona oi do idia abidadama henia bona matauraia. Iehova ena Witnes taudia momo be mai momokani ida idia kara dainai, moni dalanai idia hegeregere. Koikoi taudia be edia moni gaukara amo idia hadokodia neganai, Witnes taudia be edia moni gaukara idia haboioa lasi, eiava gaukara idia davaria badina gaukara biagudia idia ura kara momokani taudia idia abia.

19. Edena dala ai kara momokani badinaia karana ese eda lalomamina bona Iehova tura henia karana ia hanamoa?

¹⁹ Ena be oi dekenai unai ia vara o lasi, to do oi itaia kara momokani ese hahenamo momo ia mailaia. Do ita abia hahenamo ta be inai: Iseda lalomamina be do ia goeva. Paulo ia gwau: “Ai diba emai lalomamina be ia goeva.” (Heberu 13:18, NW) Ma danu iseda lalokau guba Tamana ese emu kara namodia ia itaia, bona ia be kara momokani taudia ia lalokau henia. (Salamo 15:1, 2; Aonega Herevadia 22:1) Oibe, kara momokani ese ita ia durua Dirava ena lalokau lalonai ita noho totona bona unai be hahenamo badana. Karoa 15 ai, ita ese Iehova ena lalohadai gaukara dekenai do ita herevalaia.