Diabolo Bona Ena Koikoi Karadia Inai Henia

1, 2. Bapatiso negadiai daidia idia moale?

BEMA oi be lagani momo lalonai Iehova oi hesiai henia, hebouhebou badadia bona maragidia ai bapatiso ena tok momo oi kamonai vadaeni, ani? To, herevana unai tok be nega hida oi kamonai, bapatiso idia ura abia taudia idia gini bona bapatiso ena henanadai rua idia haerelaia neganai, unai ese oi ia hagoadaia. Unai nega ai, helai taudia idia moale bona edia imana idia patapataia. Danu, oi itaia unai taudia be Iehova ena kahana ai idia gini dainai, emu matana ranu idia diho. Oibe, unai bamona negadia ai ita moale bada!

² Reana, ita be lagani ta lalonai iseda hebouhebou idauidau dekenai bapatiso haida ita itaia, to aneru be bapatiso momo idia itaia diba. Wiki ta lalonai aneru idia itaia taunimanima tausen momo be bapatiso idia abia bona Iehova ena orea lalonai idia vareai neganai, guba dekenai idia moale bada. (Luka 15:7, 10) Ita diba, aneru idia moale bada, badina idia itaia orea ia bada ia lao!—Hagai 2:7.

DIABOLO BE “LAIONA MAI BOIBOI BADA BAMONA” IA LOALOA

3. Dahaka dainai Satani be “laiona mai boiboi bada bamona” ia loaloa noho, bona ia ura dahaka ia karaia?

³ To, lauma dikadia be unai bapatiso karana idia itaia neganai, idia badu dikadika. Satani bona ena demoni idia badu, badina idia itaia taunimanima tausen momo be inai tanobada dikana idia dadaraia noho. Idia badu badina Satani be mai hekokoroku ida ia gwau, tau ta be lalokau dainai Iehova do ia hesiai henia lasi, bona hahetoho badana ia davaria neganai Dirava do ia rakatania. (Iobu 2:4, 5) Hanaihanai ta be ena lalona ia hadaia ena mauri be Iehova dekenai do ia gwauhamatalaia neganai, Satani ena hereva ia hakoikoia unai. Lagani ta ta ai taunimanima tausen momo idia bapatiso neganai, Satani ena hereva ita hakoikoia bona ita habadua. Unai dainai, Satani be “laiona mai boiboi bada bamona. . . . Hunia dekenai ia raka loaloa noho, do ia ania ore taudia ia tahua noho”! (1 Petero 5:8) Unai “laiona” ia ura ita ia ania, anina be ia ura iseda hetura karana Dirava ida ia hadikaia o Dirava ita rakatania.—Salamo 7:1, 2; 2 Timoteo 3:12.

4, 5. (a) Iehova be edena dala rua amo Satani ena dagedage karana ia koua? (b) Keristani tauna momokani be dahaka dainai ia lalogoada diba?

⁴ Ena be iseda inai tauna be ia dagedage bada, to ia dekenai do ita gari lasi. Dahaka dainai ita gari lasi? Badina Iehova ese dala rua ai unai “laiona” ena dagedage karadia ia koua. Unai dala rua be dahaka? Ginigunana be inai: Iehova ia gwau hutuma bada Keristani taudia momokanidia be hisihisi badana amo do idia roho mauri. (Apokalupo 7:9, 14) Dirava ena peroveta herevadia be hanaihanai idia guguru. Unai dainai, Satani ia diba Dirava ena orea taudia ibounai ia hadikaia ore diba lasi.

⁵ Dala iharuana be Dirava ena hesiai tauna ta ena hereva ese ia hahedinaraia. Peroveta tauna Asaraia be King Asa dekenai ia gwau: “Umui be Lohiabada dekenai umui noho neganai, ia ese umui dekenai danu ia noho.” (2 Sivarai 15:2; 1 Korinto 10:13) Baibel lalonai sivarai momo ese idia hahedinaraia, Satani ia ura Dirava kahirakahira idia noho taudia ia hadikaia, to hanaihanai ia kwalimu diba lasi. (Heberu 11:4-40) Hari inai negai, Dirava kahirakahira ia noho Keristani tauna be Satani ia dadaraia bona ia halusia diba. Oibe, Baibel be ita ia hagoadaia: “Diabolo umui inai henia, bona ia be umui amo do ia heau siri.”—Iamesi 4:7, NW.

“ITA BE . . . LAUMA DIKADIA IDA ITA HEATU NOHO”

6. Edena dala ai Satani be Keristani taudia ta ta ia dagedage henia?

⁶ Satani be ia kwalimu diba lasi, to bema ita naria namonamo lasi ita ia hadikaia diba. Satani ia diba bema iseda hetura karana Iehova ida ia hamanokaia, ita ia hadikaia diba. Edena dala ai Satani ia ura unai ia karaia? Ia be dala toi ai ita ia dagedage henia: (1) Dagedage karana ia habadaia, (2) ita ta ta ia heatu henia, bona (3) mai koikoi ida ita ia hedibagani henia. Mani unai dala toi ita herevalaia.

7. Dahaka dainai Satani be mai badu bada ida Iehova ena taunimanima ia dagedage henia noho?

⁷ Dagedage karana ia habadaia. Ioane ia gwau: “Tanobada ibounai be Dika Tauna ena siahu lalonai ia noho.” (1 Ioane 5:19, NW) Unai siri be Keristani taudia momokanidia ibounai dekenai gau ta ia hadibaia. Satani be laiona bamona kara dika tanobada taudia ibounai ia abia vadaeni, unai dainai hari ia be mai badu bada ida Iehova ena taunimanima ia dagedage henia noho. (Mika 4:1; Ioane 15:19; Apokalupo 12:12, 17) Ia badu dikadika badina ia diba ena nega be ia kwadogi. Unai dainai ena dagedage karadia ia habadaia noho. Hari, Satani be ena dagedage karana dokona ia halasia noho, bona ia ura iseda hetura karana Iehova ida do ia hadikaia. Unai dainai, namona be ita laloparara ita be edena bamona nega lalonai ita noho bona dahaka ita karaia be gau badana.—1 Sivarai 12:32.

8. Paulo ia gwau ita be lauma dikadia ida ita “heatu,” ena anina be dahaka?

⁸ Ita ta ta ia heatu henia. Paulo be Keristani taudia ia hamaoroa: “Ita be . . . guba ai idia noho lauma dikadia ida ita heatu noho.” (Efeso 6:12, NW) Dahaka dainai Paulo be inai hereva “heatu” ia gaukaralaia? Badina “heatu” ena anina be tatau rua be imana amo idia heatu, bona idia doria heheni ta be tano dekenai ia moru totona. Unai dainai, Paulo be unai hereva amo ia hahedinaraia ita ta ta be lauma dikadia ida ita heatu noho. Herevana taunimanima be lauma dikadia idia laloa momo eiava lasi, to namona be ita laloaboio lasi ita be Iehova dekenai gwauhamata ita karaia neganai, ita be unai heatu lalonai ita vareai. Iseda mauri ita gwauhamatalaia negana amo, Keristani taudia ta ta be unai heatu lalonai idia vareai. Unai dainai, Paulo be nega toi Efeso dekenai idia noho Keristani taudia ia hagoadaia idia “gini goada” totona!—Efeso 6:11, 13, 14.

9. (a) Dahaka dainai Satani bona demoni be “koikoi karadia” idauidau idia gaukaralaia? (b) Dahaka dainai Satani ia ura iseda laloa dalana ia hadikaia, bona edena dala ai ita dadaraia diba? (Rau 220 ai ia noho maua itaia.) (c) Hari, edena koikoi karana ta do ita herevalaia?

⁹ Mai koikoi ida ita ia hedibagani henia. Paulo ese Keristani taudia ia hagoadaia Satani ena “koikoi karadia” idia koua totona. (Efeso 6:11) Paulo ena hereva amo ia hahedinaraia lauma dikadia be koikoi karadia momo idia gaukaralaia. Badina Keristani taudia haida be hahetoho ta idia haheaukalaia, to hahetoho ma ta idia davaria neganai idia moru. Unai dainai, Diabolo bona demoni dikadia be iseda kara idia diba totona, ita idia stadilaia namonamo. Bena eda manoka gauna idia gaukaralaia iseda hetura karana Dirava ida idia hadikaia totona. To, ita moale badina Baibel ese Satani ena koikoi karadia momo ia gwauraia hedinarai. (2 Korinto 2:11) Inai buka lalonai ita be kohu momo ura henia karana, hebamo dikadia, bona matabodaga karadia ita herevalaia vadaeni. Mani Satani ena koikoi karana ta—meamea karadia—ita herevalaia.

MEAMEA KARADIA—DIRAVA DADARAIA KARANA

10. (a) Meamea karadia haida be dahaka? (b) Iehova ese meamea karadia be edena bamona ia laloa, bona emu lalohadai be dahaka?

¹⁰ Tau ta be meamea karadia ia karaia neganai, ia be lauma dikadia ida ia gaukara hebou. Meamea karadia haida be vada, babalau, bona mase taudia hereva henia karana. Ita diba Iehova ia gwau meamea karadia be “kara bodaga.” (Deuteronomi 18:10-12; Apokalupo 21:8) Ita danu be ‘dika do ita negea momokani’ dainai, namona be lauma dikadia ita dadaraia. (Roma 12:9) Bema unai bamona ita karaia, ita be iseda guba Tamana, Iehova ita hamoalea bada!

11. Dahaka dainai Satani do ia kwalimu bada bema ita ta ia veria meamea karadia ita karaia totona? Haheitalai gwauraia.

¹¹ To, meamea karadia ita karaia neganai, ita be iseda turana namona Iehova ita dadaraia bona iena inai tauna ita tura henia. Unai dainai Satani ia ura dikadika meamea karadia ita karaia. Satani be Keristani tauna ia koia bona meamea karadia ia karaia neganai, ia kwalimu. Dahaka dainai? Mani inai haheitalai oi laloa: Bema tuari tauna ta be ena inai taudia ese ena lalona idia ania, vadaeni iena tuari oreana ia rakatania bena idia dekenai ia hanaia, ena inai taudia edia tuari biaguna do ia moale bada. Reana, unai tuari tauna be trofi ta bamona do ia hahedinaraia, ena tuari biaguna gunana ena lalona ia hahisia totona. Unai hegeregerena, bema Keristani tauna be mai ena ura ida meamea karadia ia karaia bona Iehova ia dadaraia, ia be Satani ena siahu henunai ia noho unai. Satani be mai moale ida unai tauna do ia hahedinaraia, tuari ai ia kwalimulaia trofi ta bamona! Ita ta ita ura Satani be ita dekenai unai bamona ia karaia, a? Lasi! Ita be Iehova do ita rakatania lasi.

HENANADAI AMO DARADARA IA HAVARAIA

12. Satani be edena bamona dala ia gaukaralaia meamea karadia amo ita ia hamorua totona?

¹² Meamea karadia ita inai henia neganai, Satani be do ia kwalimu lasi. Unai dainai, ia diba iseda lalohadai ia haidaua be namo. Edena dala ai unai do ia karaia? Dala ia tahua Keristani taudia dekenai daradara ia havaraia totona, unai amo ‘dika do idia gwauraia namo bona namo do idia gwauraia dika.’ (Isaia 5:20) Nega momo Satani be unai ia karaia totona, guna ia gaukaralaia dalana ta ia gaukaralaia—henanadai amo daradara ia havaraia.

13. Edena dala ai Satani ese henanadai ia gaukaralaia daradara ia havaraia totona?

¹³ Satani ese idaunegai henanadai ia gaukaralaia dalana mani oi laloa. Eden ai Satani be Heva ia nanadaia: “Momokani, uma gabu ena au huahua ta ania lasi taravatu Dirava ese ia atoa o lasi?” Iobu ena nega ai, guba ai aneru idia hebou neganai, Satani ia henanadai: “Bema Iobu ese oi dekena amo gau ta ia abia lasi neganai, oi dekenai do ia gari, a?” Bona Iesu be tanobada ai ena hesiai gaukara ia matamaia neganai, Satani ese Iesu ia hamaoroa: “Bema oi be Dirava ena Natuna neganai, inai nadi dekenai oi oda henia, vadaeni aniani gaudia dekenai do oi halaoa.” Mani oi laloa—Satani ia ura wiki siks gunanai Iehova ese Iesu dekenai ia gwauraia herevana ia mogea. Iehova be ia gwau: “Inai be lauegu Natuna, egu lalokau, lau moale bada ia dekenai”!—Genese 3:1; Iobu 1:9; Mataio 3:17; 4:3.

14. (a) Edena dala ai Satani be meamea karadia dekenai daradara ia havaraia? (b) Hari dahaka do ita herevalaia?

¹⁴ Hari, Satani be unai bamona dala ia gaukaralaia meamea karadia dekenai daradara ia havaraia totona. Madi, ia ese tadikaka taihu haida dekenai daradara ia havaraia vadaeni. Idia momo idia daradara reana meamea karadia haida be idia namo. Idia laloa, ‘Momokani meamea karadia ibounai be idia dika, a?’ (2 Korinto 11:3) Edena dala ai unai bamona taudia ita durua diba edia lalohadai idia haidaua totona? Edena dala ai ita gini goada diba, bena Satani ena koikoi karadia ese ita idia koia lasi? Haere ita abia totona, gau rua do ita herevalaia, badina Satani be unai dala dekenai meamea karadia ia gaukaralaia danu. Unai be moale karadia bona gorere hanamoa daladia.

ISEDA URA GAUDIA IA GAUKARALAIA KERERE

15. (a) Europe bona America tanodia ai taunimanima edia lalohadai meamea karadia dekenai be dahaka? (b) Tanobada taudia edia lalohadai meamea karadia dekenai ese edena dala ai Keristani taudia haida edia lalohadai ia hadikaia?

¹⁵ Europe bona America tanodia ai, taunimanima idia laloa meamea, vada bona babalau karadia ma haida be idia dika lasi. Muvi, TV ena program, buka bona kompiuta gadara ai idia hedinarai lauma dikadia edia kara be mai ena aonega, ia be moale gauna, bona dika ta ia havaraia lasi. Babalau karadia idia hahedinaraia muvi bona buka haida be hari taunimanima momo ese idia ura henia bada. Ia hedinarai goevagoeva, demoni ese taunimanima idia koia dainai, idia laloa meamea karadia be Dirava ese ia taravatua lasi bona dika ta ia havaraia lasi. Keristani taudia danu be unai bamona lalohadai idia abia dae, a? Haida be unai bamona lalohadai idia abia. Mani inai haheitalai oi laloa, Keristani tauna be meamea karadia ia hahedinaraia muvi ia itaia murinai ia gwau, “Unai muvi lau itaia, to lau be meamea karadia lau karaia lasi.” Dahaka dainai unai bamona lalohadai be kerere?

16. Dahaka dainai meamea karadia idia hahedinaraia muvi ita itaia o buka ita duahia karana be dika ia havaraia diba?

¹⁶ Ena be babalau karadia ita karaia bona muvi dekenai ita itaia be mai ena idau, to namo lasi ita laloa muvi dekenai ita itaia karana ese dika ta do ia havaraia lasi. Dahaka dainai? Mani inai oi laloa: Baibel ese ia hahedinaraia Satani bona demoni be iseda lalona ai idia noho gaudia idia diba lasi.a Unai dainai, guna ita gwauraia bamona, bema lauma dikadia idia ura ita laloa gauna bona iseda manoka gauna idia diba, idia be iseda kara—ita abia hidi moale karadia danu—idia stadilaia. Bema Keristani tauna ia hahedinaraia ia be babalau karadia, meamea herevadia mai edia siahu, lauma dikadia be taunimanima lalonai idia vareai o unai bamona kara haida edia muvi o buka ia moalelaia, demoni be do idia diba unai tauna be babalau karadia ia ura henia. Demoni be unai idia diba neganai, do idia gaukara goada Keristani tauna ena manoka gauna dekenai ia idia hamorua totona. Oibe, haida be meamea karadia idia hahedinaraia muvi idia itaia momo o buka idia duahia momo dainai, gabeai meamea karadia idia karaia.—Galatia 6:7.

17. Satani be edena dala ai gorere taudia ia koia diba?

¹⁷ Satani be moale karadia sibona ia gaukaralaia lasi, to gorere hanamoa daladia ia gaukaralaia danu ita ia koia totona. Edena bamona ia karaia? Keristani tauna ta be hospital o doketa dekenai nega momo ia lao, to gorere hanamoa dalana ta ia davaria lasi dainai ia lalohisihisi. (Mareko 5:25, 26) Satani bona demoni be unai idia gaukaralaia diba Keristani tauna ena abidadama idia hamanokaia totona. Satani bona demoni idia diba Baibel ia gwau: “Meamea karadia idauidau ibounai do umui karaia lasi.” (Levitiko 19:26) Ia gorere Keristani tauna be Baibel ena sisiba ia dadaraia totona, demoni ese idia tohoa meamea tauna o gorere idia tahua o hanamoa totona meamea gaudia haida idia gaukaralaia doketa taudia dekenai ia lao. Bema demoni idia kwalimu, unai tauna ena hetura karana Dirava ida idia hadikaia diba. Edena dala ai unai idia karaia diba?

18. Edena bamona gorere hanamoa daladia be Keristani tauna ese ia dadaraia be namo, bona dahaka dainai?

¹⁸ Iehova be iena taravatu idia utua taudia ia sisiba henia, ia gwau: “Bema Dirava ena taravatu ita kamonai henia lasi, ia ese iseda guriguri do ia kamonai henia lasi.” (Aonega Herevadia 28:9) Oibe, namo lasi ita gorere lalonai ita karaia karana ta dainai, Iehova ese iseda guriguri ia kamonai henia lasi bona iena heduru ita dekenai do ia kokia. (Salamo 41:3) Unai dainai, bema doketa be gorere idia tahua o hanamoa totona meamea gaudia haida idia gaukaralaia, Keristani tauna momokanina ese unai ia dadaraia be namo.b (Mataio 6:13) Unai dala amo, Iehova ena heduru do ia abia noho.—Rau 222 ai maua ladana “Momokani, Inai be Meamea Karana, A?” itaia.

LAUMA DIKADIA EDIA SIVARAI IDIA KIKILAIA MOMO NEGANAI

19. (a) Satani ese taunimanima ia koia dainai, dahaka idia laloa? (b) Keristani taudia be edena bamona sivarai idia herevalaia lasi be namo?

¹⁹ Europe bona America tanodia ai taunimanima momo idia abia dae lasi Satani be mai ena siahu bona dika ia havaraia diba. To, tano ma haida dekenai edia lalohadai be idau. Unai tano idauidau ai, Satani ese taunimanima ia koia dainai idia laloa iena siahu be bada herea. Taunimanima haida be edia mauri dinadia ibounai, edia aniani, edia gaukara, eiava edia mahuta negadia ai, lauma dikadia idia gari henia. Taunimanima be lauma dikadia ese idia karaia hoa karadia idia herevalaia momo. Taunimanima ese unai bamona sivarai idia herevalaia dalana ese ma haida edia lalona ia veria bona idia ura dikadika idia kamonai. To, unai bamona sivarai be ma haida dekenai ita herevalaia be namo, a? Lasi, Dirava momokanina ena hesiai taudia be badina rua dainai unai do idia karaia lasi.

20. Edena dala ai ta ese Satani ena lalohadai be ma haida dekenai ia hadibaia diba?

²⁰ Badina ginigunana be: Unai bamona sivarai be ma haida dekenai ita herevalaia neganai, ita be Satani ena ura ita habadaia noho. Edena dala ai? Baibel ia gwau Satani be siahu bada karadia ia karaia diba, to danu “hoa bona toa karadia idauidau momo dekena amo ia ese taunimanima momo do ia hakaua kerere.” (2 Tesalonika 2:9, 10) Satani be koikoi tauna badana dainai, ia diba edena dala ai ta ena lalona ia veria diba koikoi gaudia ia abia dae totona. Unai taudia do idia gwau idia be gau ta idia itaia bona idia kamonai bona ia be ia vara momokani. Bona idia gwauraia loulou bona hereva ma haida idia atoa kau taunimanima edia lalona idia veria totona. Bema Keristani tauna ese unai bamona sivarai be ma haida dekenai ia gwauraia, ia be Diabolo—“koikoi ibounai edia tamana”—ena ura ia karaia. Ia ese ma haida dekenai Satani ena lalohadai ia hadibaia noho.—Ioane 8:44; 2 Timoteo 2:16.

21. Iseda herevahereva lalonai ita ura dahaka ita herevalaia momo?

²¹ Badina iharuana be: Bema Keristani tauna ta be guna lauma dikadia ese idia kara dika henia, unai sivarai be tadikaka taihu dekenai do ia herevalaia lasi. Dahaka dainai? Baibel ia gwau: “Iesu, iseda Gunalaia Tauna bona iseda abidadama ia Hagugurua Tauna, ita itaia noho.” (Heberu 12:2, NW) Oibe, namona be ita be Keriso sibona do ita itaia noho, Satani lasi. Ita itaia Iesu be tanobada ai ia noho neganai, ena be Satani ia karaia diba gaudia eiava ia karaia diba lasi gaudia momo ia herevalaia diba, to Iesu be ena hahediba taudia dekenai lauma dikadia edia sivarai ia herevalaia momo lasi. Iesu be Basileia ena sivarai namona harorolaia gaukarana ia laloa bada. Unai dainai, namona be Iesu bona aposetolo taudia ita tohotohoa bona hanaihanai “Dirava ena kara badadia” ita harorolaia.—Kara 2:11; Luka 8:1; Roma 1:11, 12.

22. Dahaka ita karaia diba, unai amo guba dekenai moale bada do ia vara?

²² Momokani, Satani be koikoi karadia idauidau, meamea karadia danu, ia gaukaralaia iseda hetura karana Iehova ida ia hadikaia totona. To, bema kara dika ita dadaraia bona kara namo ita badinaia noho, meamea karadia ibounai do ita dadaraia bona Satani be ita do ia koia lasi. (Efeso 4:27) Mani oi laloa, “guba dekenai moale” bada do ia vara, bema ita be “Satani ena koikoi karadia” do ita dadaraia noho ela bona Satani do ia boio momokani!—Efeso 6:11.