KAROA 35
Edena Dala Ai Dirava Ena Turana Ai Lau Lao Diba?
Jeremy be hekwakwanai amo ia laloparara Dirava tura henia karana be mai anina bada. Ia gwau: “Lau be 12 neganai, egu tamana ese ai ia rakatania. Hanuaboi ta, egu bedi ai lau guriguri, Iehova lau noia egu tamana ia giroa mai totona.”
Jeremy ena lalohisihisi negana ai, Baibel ia duahia matamaia. Bena Salamo 10:14 ia duahia neganai, ena lalona ia hagoadaia. Unai siri ese Iehova be inai bamona ia herevalaia: “Kerere lasi tauna be oi dekenai ia giroa, bona oi be tamana lasi natuna ena durua tauna.” Jeremy ia gwau: “Lau mamia Iehova be lau ia hereva henia bona lau ia hamaoroa ia be egu durua tauna; ia be egu Tamana. Ia be tama namo hereana!”
ENA BE emu hekwakwanai be Jeremy ena bamona eiava lasi, to Baibel ese ia hahedinaraia Iehova ia ura oi be iena turana ai oi lao. Oibe, Baibel ia gwau: ‘Dirava kahirakahira oi lao, bona ia be oi kahirakahira do ia mai.’ (Iamesi 4:8) Unai hereva edia anina mani oi laloa: Ena be Iehova Dirava oi itaia diba lasi, bona ia be taunimanima amo ia idau, to oi ia boiria ena turana ai oi lao totona!
To Dirava oi tura henia totona oi gaukara goada be namo. Haheitalai: Bema flaoa pot ta be emu ruma lalonai oi atoa, oi diba ia be sibona do ia tubu lasi. To hanaihanai ranu oi henia bona gabu namona dekenai oi atoa. Dirava tura henia karana danu be unai bamona. Dahaka oi karaia diba emu hetura karana Dirava ida ia goada totona?
Baibel Stadilaia Karana Ena Namo
Hetura karana be dala rua ai ia gaukara—herevahereva bona kamonai karana. Dirava tura henia karana danu be unai bamona. Baibel ita duahia bona stadilaia karana amo Dirava ita kamonai henia.—Salamo 1:2, 3.
Reana stadi karana oi ura henia momokani lasi. Matamata taudia momo idia ura TV idia raraia, idia gadara, eiava turadia ida idia loaloa. To, bema Dirava oi ura tura henia, ia gwauraia dalana oi badinaia be namo. Namona be ia oi kamonai henia totona, iena Hereva oi stadilaia.
To Baibel stadilaia karana be gaukara metauna ta bamona oi laloa lasi. Ena be stadi karana oi ura henia lasi, to oi moalelaia diba. Gau ginigunana be Baibel stadilaia negana oi makaia. Kekeni ta ladana Lais, ia gwau: “Lau be mai egu sediual. Daba ta ta ai lau karaia gauna ginigunana be Baibel ena karoa ta lau duahia.” Mauri lagani 15 kekenina, Maria, ena sediual be idau. Ia gwau: “Lau do mahuta lasi lalonai, Baibel ena kahana maragina ta lau duahia.”
Emu stadi sediual oi hamatamaia totona, rau 292 ena maua oi itaia. Bena henunai, miniti 30 bamona lalonai Dirava ena Hereva oi stadilaia diba ena taim oi torea.
․․․․․
Emu stadi negana oi makaia be ena hamatamaia sibona. Stadi oi karaia neganai, reana do oi laloa Baibel duahia be ia auka. Mauri lagani 11 merona, Jezreel ena hereva do oi abia dae, ia gwau: “Baibel ena kahana haida be emu lalona ia veria lasi bona oi lalopararalaia be auka.” Bema oi be unai bamona oi mamia, oi hesiku lasi. Baibel oi duahia gwauraia neganai, namona be oi laloatao oi be nega oi atoa emu turana Iehova Dirava oi kamonai henia totona. Baibel oi stadilaia noho karana dainai, do oi mamia ia be moale gauna bona mai ena namo!
Guriguri be Mai Anina Bada
Guriguri be Dirava ita hereva henia dalana. Ia be harihari gauna hereadaena! Hanuaboi eiava dina ai Iehova Dirava ita hereva henia diba. Hanaihanai ia noho hegaegae ita ia kamonai henia totona. Unai sibona lasi, to ia ura oi gwauraia gauna ia kamonai. Unai dainai Baibel ese oi ia hagania: “Gau ibounai lalonai do umui guriguri bona noinoi goadagoada mai tanikiu ida, emui noinoi herevadia be Dirava dekenai do umui gwauraia hedinarai.”—Filipi 4:6.
Unai siri ia hereva bamona, Iehova dekenai gau momo oi gwauraia diba. Reana emu problem bona lalohekwarahi gaudia, danu tanikiu herevadia oi gwauraia diba. Vaia, emu turadia ese oi totona kara namodia idia karaia neganai, oi tanikiu henidia, ani? Iehova totona unai bamona oi karaia diba, badina oi dekenai ia karaia kara namodia momo be emu turadia ese do idia karaia diba lasi.—Salamo 106:1.
Henunai lista ta ai, Iehova ese oi totona ia karaia gaudia haida oi torea, ia oi tanikiu henia.
․․․․․
Momokani nega ta ta ai, gari bona lalohekwarahi gaudia oi laloa. Salamo 55:22 ia gwau: “Emu metau be Iehova dekenai oi negea lao, bona ia ese oi do ia durua. Ia ese kara maoromaoro tauna do ia rakatania lasi ia moru totona.”
Oi ura Iehova dekenai oi gurigurilaia lalohekwarahi gaudia be henunai ia noho laini ai oi torea.
․․․․․
Emu Ekspiriens
Dirava oi tura henia karana dekenai gau namona ma ta ia noho, bona namo lasi unai oi laloaboio. Salamo torea tauna Davida, ia gwau: “Iehova oi tohoa bona do oi itaia, ia be namo.” (Salamo 34:8) Davida be Salamo karoa 34 ia torea neganai, ia dekenai gari gauna ta ia vara. King Saulo ese ia ura alaia dainai iena mauri totona ia heau, unai negai Davida be ia gari bada. To ia idia inai henia taudia, Filistia taudia huanai ia hunia. Davida ia laloparara bema idia diba unai be ia neganai, do idia alaia. Unai dainai mai aonega ida ena kara ia haidaua bona kavakava tauna bamona ia kara, unai amo ia heau mauri.—1 Samuela 21:10-15.
Davida ia gwau lasi, ia be sibona ena aonega dainai ia heau mauri. To ia gwau Iehova ese ia durua. Ataiai Salamo ena hereva lalonai, ia gwau: “Iehova dekenai lau guriguri, bona lau ia haere henia. Lau gari henia gaudia ibounai amo lau ia hamauria.” (Salamo 34:4) Davida be ena ekspiriens ese ia hagoadaia, unai dainai ia gwau, “Iehova oi tohoa bona do oi itaia ia be namo.”a
Emu mauri lalonai Iehova ese oi ia durua negana ta oi laloatao, a? Bema oibe, mani henunai oi torea. Nouti: Dina ta ta ai dala maragina ai Iehova ese oi ia hanamoa karana ta ena sivarai oi torea. Reana nega haida unai kara maragina ita laloa bada lasi.
․․․․․
Reana emu tama sina ese oi dekenai Baibel idia hadibaia. Bema oibe, unai be hahenamo ta. To, oi sibona ese Dirava oi tura henia be namo. Bema unai oi do karaia lasi, inai karoa ena sisiba oi badinaia diba, Dirava ida emu hetura karana oi hamatamaia totona. Iehova ese emu hekwarahi do ia hanamoa. Baibel ia gwau: “Umui noinoi noho, bona umui dekenai do ia henia. Umui tahua noho, bona do umui davaria.””—Mataio 7:7.
INAI TOPIK DEKENAI DIBA MA HAIDA OI ABIA TOTONA VOLIUM 1, KAROA 38 BONA 39 OI DUAHIA
Oi dekenai ia auka haida dekenai Dirava oi herevalaia totona, a? Oi abia dae gaudia be mai gari lasi ida oi gwauraia hedinaraia dalana do oi dibaia.
[Futnout]
a Baibel haida ese inai hereva “tohoa bona do oi itaia” be inai bamona idia torea “oi sibona oi tahua,” bona “emu mauri ai idia vara gaudia amo do oi itaia.”—Contemporary English Version, bona The Bible in Basic English.
SIRI BADANA
“Dirava dibaia totona idia hitolo taudia be idia moale.”—Mataio 5:3.
DALA TA
Dina ta ta ai Baibel ena rau foa sibona oi duahia, bena lagani tamona lalonai Baibel ibounai oi duahia haorea diba.
INAI OI DIBA . . .?
Inai buka oi duahia bona Baibel ena sisiba oi badinaia karana ese ia hamomokania Iehova be oi ia laloa bada.—Ioane 6:44.
EMU PALANI!
Egu Baibel stadi karana amo gau haida lau dibaia totona, lau ese ․․․․․
Hanaihanai lau guriguri totona, lau ese ․․․․․
Inai topik dekenai lau ura egu tama sina lau nanadaia ․․․․․
DAHAKA OI LALOA?
● Edena dala ai sibona emu Baibel stadi karana oi moalelaia diba?
● Dahaka dainai Iehova ia ura goevadae lasi taudia edia guriguri ia kamonai?
● Edena dala ai emu guriguri dalana do oi hanamoa diba?
[Blurb]
‘‘Lau be maragi neganai, egu guriguri lalonai gau tamona sibona lau gwauraia loulou. Hari, dina ta ta ai, lauegu guriguri ai gau namodia bona dika gaudia lau gurigurilaia. Dina ta ta ai gau idauidau idia vara dainai, unai ese lau ia durua gau tamona lau herevalaia loulou lasi totona.’’—Eve
[Maua/Foto]
Baibel ena sivarai oi tahua namonamo
1. Oi ura duahia Baibel sivaraina ta oi abia hidi. Aonega totona oi guriguri, unai amo oi duahia gaudia do oi lalopararalaia.
2. Sivarai oi duahia namonamo. Metairametaira oi duahia, bona sibona oi piksaia unai sivarai lalonai oi noho. Idia vara gaudia oi itaia, taunimanima edia hereva oi kamonai bona hodahoda oi bonaia bona aniani oi mamia, bona gau ma haida danu. Emu lalohadai dekenai unai sivarai oi hamauria bamona!
3. Oi duahia sivaraina oi laloa. Sibona oi nanadaia:
● Dahaka dainai Iehova ese iena Hereva lalonai inai sivarai danu ia gwauraia?
● Daidia be haheitalai namona lau badinaia totona bona daidia be haheitalai dikana?
● Inai sivarai amo dahaka mai anina bada gaudia lau dibaia?
● Inai sivarai lalonai Iehova bona iena kara amo dahaka lau dibaia?
4. Iehova dekenai guriguri kwadogina gwauraia. Ia dekenai unai Baibel stadi amo dahaka gaudia oi dibaia bona edena dala ai emu mauri lalonai unai do oi badinaia dalana oi gwauraia. Hanaihanai Iehova oi tanikiu henia badina ia ese oi dekenai iena Hereva, Baibel, buka helaga unai, ia henia!
[Foto]
“Emu hereva be egu aena ena lamepa, bona egu dala ena diari.”—Salamo 119:105.
[Maua/Foto]
Mai Anina Bada Gaudia Atoa Guna
Oi bisi bada dainai nega be lasi oi guriguri, eiava Baibel oi stadilaia lasi, a? Emu mauri ai dahaka gaudia oi atoa guna karana ese unai do ia hahedinaraia.
Inai oi karaia: Baketi ta oi abia bona nadi badadia haida oi udaia. Bena miri oi hahonua. Hari emu baketi be nadi bona miri amo ia honu.
Hari baketi lalonai idia noho nadi bona miri oi kokia. Unai miri bona nadi do oi gaukaralaia lou, to hari baketi lalonai miri do oi hahonua guna, bena nadi oi udaia. Nadi totona speis be lasi, ani? Badina oi ese miri amo baketi oi hahonua guna.
Point be dahaka? Baibel ia gwau: “Mai anina bada gaudia do umui diba.” (Filipi 1:10) Bema emu mauri ai anina bada lasi gaudia hegeregere, moale karadia oi atoa guna, oi be nega lasi mai anina bada hegeregere, Dirava hesiai henia gaukaradia oi karaia totona. To bema Baibel ena sisiba oi badinaia, do oi itaia oi be mai emu nega Dirava oi hesiai henia bona moale karadia oi karaia totona. Dahaka gaudia be mai anina bada emu baketi ai do oi udaia guna?
[Foto]
Flaoa pot lalonai ia tubu flaoaflaoa bamona, namona be ita gaukara goada iseda hetura karana Dirava ida ia goada ia lao totona