Edena Dala ai Tomadiho Momokani Do Oi Dibaia?

1. Tomadiho momokani be tamona sibona, a?

Iesu ese iena murinai idia raka taudia ia hadibaia, tomadiho momokani be tamona sibona. Unai tomadiho be mauri hanaihanai ia lao henia dalana ta bamona. Iesu ia gwau: “Taunimanima haida sibona be unai dala idia davaria.” (Mataio 7:14) Baibel ia badinaia bona gaukaralaia tomadihona sibona be Dirava ese ia abia dae. Tomadiho momokani taudia ibounai edia abidadama be tamona dainai, ibounai idia lalotamona.​—Ioane 4:23, 24; 14:6; Efeso 4:4, 5 duahia.

2. Dahaka dainai Iesu ese Keristani taudia ia hadibaia idia naria namonamo?

Iesu ese Keristani taudia ia hadibaia do idia naria namonamo, badina peroveta koikoi taudia ese Keristani taudia do idia hakaua kerere. Unai koikoi taudia edia toana be, tomadiho momokani taudia edia toana bamona. Bona edia dubu taudia be sibona idia gwauraia Keristani taudia. To, edena bamona oi diba, idia be Keristani taudia momokanidia o koikoidia? Tomadiho momokanina idia badinaia taudia sibona be Keristani taudia momokanidia edia kara bona dala namodia idia hahedinaraia.​—Mataio 7:13-23 duahia.

3. Tomadiho momokani taudia be edena bamona oi dibaia?

Tomadiho momokani ena toana faiv be inai:

• Tomadiho momokani taudia ese Baibel, Dirava ena Hereva idia matauraia. Idia gaukara goada, Baibel ena hakaua herevadia idia badinaia totona. Dubu haida be taunimanima edia lalohadai sibona idia hadibaia, to tomadiho momokanina be unai bamona ia karaia lasi. (Mataio 15:7-9) Tomadiho momokani taudia be idia harorolaia herevadia idia badinaia.​—Ioane 17:17; 2 Timoteo 3:16, 17 duahia.

• 

  Iesu ena murinai idia raka taudia momokanidia be Dirava ena ladana, Iehova, idia matauraia. Iesu ese Dirava ena ladana ia matauraia bona ma haida dekenai ia hadibaia. Ia ese taunimanima ia durudia Dirava idia diba, bona idia ia hadibaia edia guriguri amo Dirava ena ladana idia hahelagaia totona. (Mataio 6:9) Emu noho gabunai, edena tomadiho ese Dirava ena ladana be ma haida dekenai ia hadibaia?​—Ioane 17:26; Roma 10:13, 14 duahia.

• Keristani taudia momokanidia be Dirava ena Basileia sivaraina idia harorolaia. Dirava ese Iesu ia siaia, Basileia ena sivarai namona ia harorolaia totona. Dirava ena Basileia sibona ese taunimanima edia mauri do ia hanamoa. Iesu be unai Basileia sivaraina ia harorolaia ela bona ia mase. (Luka 4:43; 8:1; 23:42, 43) Danu Iesu ia gwau, ia murinai idia raka taudia ese Basileia sivaraina do idia harorolaia. Bema ta be oi dekenai ia mai, bona Dirava ena Basileia sivaraina ia herevalaia, oi laloa ia be edena tomadiho amo?​—Mataio 24:14 duahia.

• Iesu ena murinai idia raka taudia be inai tanobada dikana ena lasi. Anina be, idia be politikol bona heiriheiri karadia (hegeregere strike o protest) lalonai idia vareai lasi. (Ioane 17:16; 18:36) Danu, idia ese tanobada taudia edia lalohadai dikadia bona kara dikadia idia dadaraia.​—Iamesi 4:4 duahia.

• Keristani taudia momokanidia be taunimanima ibounai idia lalokau henia. Baibel amo diba maoro idia abia dainai, idia ese bese idauidau idia matauraia. Ena be tomadiho koikoi taudia be nega momo tanobada tuaridia idia durua, to tomadiho momokani taudia be tuari idia durua lasi. (Mika 4:1-3) Keristani taudia momokanidia ese edia nega bona kohu o unai bamona gaudia amo ma haida idia durudia bona hagoadaia.​—Ioane 13:34, 35; 1 Ioane 4:20 duahia.

4. Oi laloa edena tomadiho be momokani?

Edena tomadiho ese Baibel sibona amo taunimanima ia hadibaia, Dirava ena ladana ia matauraia, bona taunimanima ia hadibaia Dirava ena Basileia sibona be taunimanima edia mauri do ia hanamoa? Edena orea be taunimanima ibounai ia lalokau henia bona tuari ia dadaraia? Emu haere be dahaka?​—1 Ioane 3:10-12 duahia.