KAHANA 14
Tanobada Ibounai Do Ia Lohiaia Basileiana
Oi diba unai be daika ena Basileia, a?— Oibe, unai be Dirava ena Basileia, unai Basileia ese tanobada be paradaiso ai do ia halaoa. Oi ura unai Basileia oi diba namonamo, a?—
Basileia iboudiai be mai edia king. Bona king ese iena tano ai idia noho taudia ia lohiaia. Oi diba daika be Dirava ena Basileia ena king, a?— Ia be Iesu Keriso. Ia be guba ai ia noho. Kahirakahira ia be tanobada taudia iboudiai edia King ai do ia lao! Oi laloa Iesu be tanobada ibounai ia lohiaia neganai, do ita moale, a?—
Paradaiso ai oi ura dahaka do oi karaia?
Oibe, do ita moale bada herea! Paradaiso ai, taunimanima be do idia heai o tuari lasi. Taunimanima ibounai be ta ta do idia lalokau henia. Ta do ia gorere o mase lasi. Matakepulu taudia be do idia itaia diba, taia kudima taudia be do idia kamonai diba, bona aena idia dika taudia be do idia heau bona idia roho diba. Aniani be momo dainai taunimanima do idia bogakunu. Danu, animal be idia sibona huanai bona ita dekenai do idia dagedage lasi. Mase taudia be do idia mauri lou. Inai buklet lalonai oi stadilaia taudia hegeregere Rebeka, Rahaba, Davida bona Elia be do idia mauri lou! Oi ura idia mauri lou neganai do oi hedavari henidia, a?—
Iehova be oi ia lalokau henia bona ia ura do oi moale. Bema oi be Iehova oi dibaia bona oi kamonai henia noho, Paradaiso hairaina lalonai do oi mauri hanaihanai diba! Oi ura unai ia vara, a?—