Emu Headava Oi Moalelaia Totona Dirava Dekenai Oi Tabekau

Iehovaa Dirava ese tau bona hahine ginigunadia edia headava ia karaia. Baibel ia gwau Iehova ese hahine ginigunana ia karaia, bena ‘tau dekenai ia abia lao.’ Adamu ia moale bada dainai, ia gwau: “Ia be lauegu turia ena turia, bona lauegu hidio ena hidio.” (Genese 2:22, 23) Ia hahedinaraia Iehova ia ura headava taudia do idia moale.

Oi headava neganai, reana do oi laloa gau ibounai be do idia namo sibona. Ena be tau bona hahine be ta ta idia lalokau henia bada, to hekwakwanai be do idia vara. (1 Korinto 7:28) Inai buklet lalonai, Baibel ena hakaua herevadia idia noho, bema umui badinaia, emui headava bona famili maurina do ia namo.​—Salamo 19:8-11.

1 IEHOVA ESE IA HENIA MADUNA OI ABIA DAE

BAIBEL IA GWAU: Tau be ruma bese ena kwarana.​—Efeso 5:23.

Bema oi be tau, Iehova ia ura mai lalokau ida emu adavana do oi naria. (1 Petero 3:7) Iehova ese hahine be emu durua tauna ai ia halaoa bona ia ura do oi matauraia bona lalokau henia. (Genese 2:18) Emu adavana oi lalokau henia bada dainai iena ura oi atoa guna, to oiemu be gabeai.​—Efeso 5:25-29.

Bema oi be hahine, Iehova ia ura emu adavana do oi matauraia bada, bona ia oi durua ena maduna ia huaia noho totona. (1 Korinto 11:3; Efeso 5:33) Emu adavana ena abia hidi oi badinaia bona mai kudouna ibounai ida umui gaukara hebou. (Kolose 3:18) Bema unai bamona oi karaia, emu adavana bona Iehova edia matanai oi be hairai momokani.​—1 Petero 3:1-6.

OI KARAIA DIBA GAUNA:

• Emu adavana oi nanadaia dahaka do oi karaia tau o hahine namona ai oi lao totona. Oi kamonai namonamo, bona oi gaukara goada emu kara oi hanamoa totona

• Oi haheauka. Nega ia heau lalonai do umui diba edena dala ai ta ta umui hamoalea diba

2 EMU ADAVANA ENA HEMAMI OI LALOA BADA

BAIBEL IA GWAU: Namona be emu adavana ena ura gaudia oi laloa danu. (Filipi 2:3, 4) Dava bada gauna ta oi naria hegeregerena emu adavana do oi kara henia. Laloatao, Iehova ia ura ena hesiai taudia ese ‘taunimanima ibounai do idia hebogahisi henia.’ (2 Timoteo 2:24) “Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.” Unai dainai namona be emu hereva oi abia hidi namonamo. (Aonega Herevadia 12:18) Iehova ena lauma ese oi do ia durua mai hebogahisi bona lalokau ida oi hereva totona.​—Galatia 5:22, 23; Kolose 4:6.

OI KARAIA DIBA GAUNA:

• Iehova oi noia, oi ia durua oi badu lasi bona laloa kehoa do ia henia, unai amo emu adavana ida emui hekwakwanai umui herevalaia diba

• Do oi gwauraia herevadia bona do oi gwauraia dalana oi laloa namonamo

3 UMUI LALOTAMONA

BAIBEL IA GWAU: Oi headava neganai, oi bona emu adavana be “tauanina tamona” ai umui lao. (Mataio 19:5) To umui be taunimanima idaudia rua bona emui lalohadai be idauidau. Unai dainai, namona be umui hekwarahi emui lalohadai bona hemami do ia tamona totona. (Filipi 2:2) Abia hidi namodia umui karaia totona, umui lalotamona be gau badana. Baibel ia gwau: “Bema kara ta ena palani oi karaia neganai, sisiba namona do oi abia guna.” (Aonega Herevadia 20:18) Namona be Baibel ena hakaua herevadia hegeregerena mai anina bada abia hidi umui karaia hebou.​—Aonega Herevadia 8:32, 33.

OI KARAIA DIBA GAUNA:

• Emu adavana dekenai emu hemami korikori oi herevalaia

• Abia hidi ta oi do karaia lasi neganai, emu adavana dekenai unai oi herevalaia