Ia Gwauhamatalaia Natuna

Iosepa bona Maria be Betelehema dekenai idia noho, to Nasareta dekenai idia giroa lou lasi. Iesu ia vara bona dina namba 8 ai, iena kopina idia utua, Dirava ese Israela taudia dekenai ia henia Taravatu hegeregerena. (Levitiko 12:2, 3) Bona beibi ena kopina idia utua murinai, unai dina ai vaia ena ladana idia hatoa. Idia ese edia natuna ena ladana idia hatoa Iesu, aneru Gabriela ese ia hamaorodia hegeregerena.

Hua ta mai kahana ia hanaia, bona inai be Iesu ia vara ena dina namba 40. Iena tama sina ese ia be edeseni idia abia lao? Ierusalema ena dubu helaga dekenai idia abia lao, edia noho gabuna amo unai be daudau lasi. Mose ena Taravatu ia gwau, natuna mero ia havaraia bena dina namba 40 ai, sinana be dubu helaga dekenai ena hagoevaia karana totona boubou gauna ia henia be namo.​—Levitiko 12:4-8.

Maria ese unai Taravatu ia badinaia. Boubou totona, manu maragidia rua ia mailaia. Unai ese ia hahedinaraia, Iosepa bona Maria be taga taudia lasi. Taravatu ia gwau, idia ese mamoe natuna ta bona manu ta idia bouboulaia be namo. To bema sina ta ia hegeregere lasi mamoe ta ia hoia totona, vadaeni pune manu natudia rua eiava kerea manu rua ia mailaia diba. Maria be ia hegeregere lasi dainai, manu maragidia rua be boubou totona ia mailaia.

Dubu helaga ai, tau buruka ta ese Iosepa bona Maria ia hedavari henia. Iena ladana be Simeona. Dirava ese Simeona ia hamaoroa, ia do mase lasi neganai Iehova ese ia gwauhamatalaia Keriso, o Mesia, do ia itaia. Unai dina ai, lauma helaga ena hakaua henunai Simeona be dubu helaga dekenai ia vareai, unuseniai ia ese Iosepa, Maria bona edia beibi ia itaia. Simeona ese beibi ia rosia.

Simeona ese Iesu ia rosia noho lalonai, Dirava ia tanikiu henia, ia gwau: “Siahu Ibounai Lohiabadana e, emu hereva hegeregerena, emu hesiai tauna be mai maino ida do ia mase, badina egu matana ese emu hamauria karana ia itaia vadaeni, bona unai be taunimanima ibounai vairanai oi hegaegaelaia, ia be bese idauidau ia koua diburana do ia kokia diarina, bona ia be emu taunimanima Israela edia hairai.”​—Luka 2:29-32.

Iosepa bona Maria be unai hereva dekenai idia hoa. Simeona ese ia hanamodia, bona Maria dekenai ia gwau, “inai beibi dainai Israela taudia momo be do idia moru bona do idia gini lou,” bona do ia mamia hisihisina be tuari kaia bamona ia do ia gwadaia.​—Luka 2:34.

Unai dina ai hahine ta ia noho danu. Ia be peroveta hahine Ana, ena mauri lagani be 84. Ia be hanaihanai dubu helaga dekenai ia lao. Unai nega ai, Iosepa, Maria, bona beibi Iesu dekenai ia lao. Bena Ana be Dirava ia tanikiu henia matamaia bona idia kamonai taudia ibounai dekenai Iesu ia herevalaia.

Ita gwau diba, Iosepa bona Maria be dubu helaga dekenai idia vara gaudia dainai idia moale! Momokani, unai ibounai amo idia hamomokania edia natuna be Dirava ese ia Gwauhamatalaia Tauna.