“Emu Kara Dika Lau Gwauatao Vadaeni”

Gabu idauidau taudia ibounai be Iesu ena sivarai idia kamonai. Momo be gabu daudau amo idia mai, ena hahediba herevadia idia kamonai bona hoa karadia idia itaia totona. To dina haida murinai, iena gaukara ia hamatamaia gabuna, Kaperanauma dekenai ia giroa. Unai siti be Galilea Gohuna badinai ia noho, bona momo idia kamonai Iesu ia giroa mai. Unai dainai momo be ia noho rumana dekenai idia mai. Galilea bona Iudea bona Ierusalema amo Farisea bona Taravatu hadibaia taudia haida danu idia mai.

“Taunimanima momo idia haboua dainai ruma ia honu, iduara badinai danu gabu be lasi, bona ia ese idia dekenai sivarai namona ia herevalaia matamaia.” (Mareko 2:2) Hari Iesu be gau idauna do ia karaia. Bona unai kara amo Iesu ese do ia hahedinaraia ia be mai ena siahu taunimanima edia hisihisi ibounai bona gorere ia haorea totona.

Iesu be hutuma ia hadibaia noho lalonai, tatau 4 ese paralais tauna ta be ena mahuta patana ida idia huaia mai. Idia ura Iesu ese edia turana do ia hanamoa. To hutuma dainai, “Iesu dekenai idia abia vareai diba lasi.” (Mareko 2:4) Unai dainai reana idia lalohisihisi bada. Vadaeni ruma ena guhi dekenai idia daekau bona guhi ai matu idia karaia. Bena paralais tauna be ena mahuta patana ida ruma lalonai idia hadihoa.

Iesu be edia kara dainai ia badu, a? Lasi! Ia moale badina idia be mai edia abidadama, bona paralais tauna dekenai ia gwau: “Emu kara dika lau gwauatao vadaeni.” (Mataio 9:2) To Iesu be kara dika ia gwauatao diba, a? Taravatu hadibaia taudia bona Farisea taudia idia badu, idia gwau: “Dahaka dainai inai tauna be unai bamona ia hereva? Ia be Dirava ena ladana ia hadikaia. Dirava sibona ese kara dika ia gwauatao diba, ani?”​—Mareko 2:7.

Iesu be edia lalohadai ia diba dainai, idia dekenai ia gwau: “Dahaka dainai emui lalona ai unai bamona umui laloa noho? Edena be haraga, paralais tauna dekenai lau gwau, ‘Emu kara dika lau gwauatao,’ eiava ‘Oi toreisi, emu mahuta patana oi abia bona oi raka’?” (Mareko 2:8, 9) Oibe, Iesu ese do ia henia boubou gauna amo, unai tauna ena kara dika ia gwauatao diba.

Bena hutuma bona ia idia gwauraia dika taudia vairanai, Iesu ia hahedinaraia ia be mai ena maoro tanobada ai kara dika ia gwauatao totona. Ia giroa bona paralais tauna ia oda henia: “Oi lau hamaoroa, oi toreisi, emu mahuta patana oi abia bona emu ruma dekenai oi lao.” Bona maoromaoro unai ia karaia, taunimanima ibounai vairanai ena mahuta patana ia abia bona ia raka-lasi. Taunimanima idia hoa bona Dirava idia hanamoa, idia gwau: “Unai bamona kara ta be guna ai itaia lasi”!​—Mareko 2:11, 12.

Iesu ena hereva amo ia hahedinaraia kara dika dainai taunimanima idia gorere, unai dainai edia kara dika ia gwauatao neganai, idia be do idia namo lou. Baibel ia gwau, iseda tamana ginigunana Adamu ia kara dika neganai, kara dika be ita ibounai dekenai ia hanaia, unai dainai ita gorere bona ita mase. To Dirava ena Basileia ena lohia henunai, Iesu ese Dirava idia lalokau henia bona hesiai henia taudia ibounai edia kara dika do ia gwauatao. Unai nega ai gorere do ia ore vaitani.​—Roma 5:12, 18, 19.