Sabati Ai Ta Be Kara Namodia Ia Karaia Diba, A?

Iesu be Galilea ai ia haroro neganai, gau namodia momo ia karaia. To ia gwau, “siti ma haida dekenai Dirava ena Basileia ena sivarai namona lau harorolaia danu be namo,” anina be Galilea sibona lasi, to gabu ma haida dekenai do ia haroro danu. Unai dainai ia lao “Iudea ena sinagoga lalodiai ia haroro.” (Luka 4:43, 44) Unai be nega namona, badina ia be siahu negana bona Ierusalema ai aria do idia karaia negana ia kahirakahira.

Evanelia bukadia ai Iesu ese Galilea ai ia karaia haroro gaukara ena sivarai be momo, to Iudea ai ia karaia gaukara ena sivarai be momo lasi. Ena be Iudea ai taunimanima idia ura lasi kamonai, to unai ese Iesu ia koua lasi ia lao gabudia dekenai ia haroro bona kara namodia ia karaia totona.

Kahirakahira Iesu be Iudea ena siti badana, Ierusalema, dekenai do ia lao, 31 C.E. ena Pasova Aria totona. Mamoe Iduarana kahirakahira, du ese idia hagegea digudigu gabuna ta ia noho, idia gwauraia Betesata. Gorere taudia, matakepulu, aena bona imana dika taudia momo be unai gabu dekenai idia lao. Dahaka dainai? Badina momo idia laloa bema unai ranu ia marere negana ai ranu lalonai idia diho, do idia namo.

Inai be Sabati dinana, bona Iesu ese inai digudigu gabuna badinai lagani 38 lalonai ia gorere tauna ta ia itaia. Iesu ia henanadai: “Oi ura oi namo, a?” Unai tauna ia haere: “Tau badana e, ranu ia marere neganai durua tauna ta ia noho lasi ranu lalonai lau ia atoa diho totona. To lau lao noho lalonai, ta be lau vairanai ia diho guna.”​—Ioane 5:6, 7.

Iesu ese ia gwauraia herevana dainai, unai gorere tauna ia hoa. Ia gwau: “Oi toreisi! Emu geda oi abia isi bona oi raka.” (Ioane 5:8) Bona unai ia karaia. Maoromaoro iena gorere ia namo, iena geda ia abia bona ia raka lao!

Iuda taudia be ia vara kara namona dainai idia moale lasi, to unai tauna idia itaia neganai idia hahemaoro henia, idia gwau: “Inai be Sabati dinana, emu geda oi huaia be maoro lasi.” Idia ia haere henia: “Lau ia hanamoa tauna be lau ia hamaoroa, ‘Emu geda oi abia isi bona oi raka.’” (Ioane 5:10, 11) Iuda taudia be vaia Sabati dinana ai gorere taudia idia hanamoa taudia dekenai idia moale lasi.

Idia ura diba daika ese unai tauna ia hamaoroa: “Geda oi abia isi bona oi raka.” To ia namo tauna be Iesu ena ladana ia diba lasi, badina Iesu be “hutuma huanai ia raka vareai vadaeni.” (Ioane 5:12, 13) Gabeai, unai tau ese Iesu be Dubu Helaga lalonai ia davaria, hari ia diba daika ese ia ia hanamoa.

Vadaeni ia lao bona Iuda taudia ia hamaoroa Iesu ese ia ia hanamoa. Unai idia kamonai neganai, Iesu dekenai idia lao. Idia lao badina ia karaia kara namodia dainai idia ura diba daika ena siahu amo unai ia karaia, a? Lasi. To, Iesu ese Sabati dinana ai ia karaia kara namona dainai idia ura ia idia hahemaoro henia. Bona ia idia dagedage henia matamaia!