Momo Be Iesu Ena Hereva Dekenai Idia Moale Lasi

Kaperanauma ena sinagoga ai, Iesu be taunimanima ia hadibadia ia be guba amo ia mai paraoana. Unai hereva tamona be Galilea ena ist kahanai, paraoa bona gwarume amo ia ubudia bena idia giroa lou taudia dekenai ia gwauraia danu.

Iesu ia hereva ia gwau: “Emui sene taudia ese taunimanima lasi gabuna ai mana idia ania, to idia mase.” Ma ia gwau: “Lau be guba amo ia diho mai mauri paraoana. Bema ta ese inai paraoa ia ania, do ia mauri ela bona hanaihanai. Bona momokani, do lau henia paraoana be egu tauanina, unai amo tanobada taudia ese mauri idia abia diba.”​—Ioane 6:48-51.

Lagani 30 C.E. ena siahu negana ai, Iesu be Nikodemo ia hamaoroa, Dirava ese tanobada ia lalokau henia bada dainai, iena Natuna ia henia iseda Hahemauri Tauna ai do ia lao. Bena Iesu ia gwau ena tauanina idia ania karana ena anina be do ia karaia boubou gauna do idia abidadama henia. Unai be mauri hanaihanai abia dalana.

To taunimanima be Iesu ena hereva dekenai idia moale lasi. Idia henanadai: “Edena bamona inai tauna ese ena tauanina ia henia ita ania totona?” (Ioane 6:52) Iesu ia ura do idia laloparara ia herevalaia gauna be laulau herevana, to ena hidio korikorina lasi. Gabeai ia gwauraia herevana amo unai ia hahedinaraia.

“Bema taunimanima ena Natuna ena tauanina umui ania lasi bona ena rara umui inua lasi, umui be mauri do umui abia lasi. Lauegu hidio ia ania bona egu rara ia inua tauna be mauri hanaihanai do ia abia, . . . badina egu hidio be aniani korikorina bona egu rara be inua gauna korikorina. Lauegu hidio ia ania bona egu rara ia inua tauna be lau ida ia hakapua.”​—Ioane 6:53-56.

Iuda taudia be unai hereva idia kamonai neganai, idia moale lasi! Idia laloa Iesu be taunimanima edia hidio eiava Dirava ese ia taravatu gauna, hidio mai ena rara, ania karana ia herevalaia. (Genese 9:4; Levitiko 17:10, 11) To Iesu be hidio korikorina ania o rara korikorina inua karana ia herevalaia lasi. Ia hahedinaraia mauri hanaihanai idia ura abia taudia ibounai ese iena tauanina goevadaena, do ia bouboulaia gauna, bona iena rara, do ia bubua gauna, do idia abidadama henia. To, iena hahediba taudia momo be unai hahediba herevana idia lalopararalaia lasi. Haida idia gwau: “Inai be hereva namona lasi! Ai ura lasi ai kamonai.”​—Ioane 6:60.

Iesu ia itaia ena hahediba taudia haida be idia maumau dainai, ia nanadaidia: “Unai ese umui ia habadua, a? Bema umui itaia taunimanima ena Natuna be guna ia noho gabuna dekenai ia daekau, dahaka do umui karaia? . . . Umui dekenai lau gwauraia vadaeni herevadia be lauma helaga amo bona mauri idia henia. To umui haida be umui abidadama lasi.” Unai dainai hahediba taudia momo be ia idia rakatania bona ia idia badinaia lou lasi.​—Ioane 6:61-64.

Unai dainai Iesu ese ena aposetolo 12 ia nanadaia: “Umui danu umui ura lao, a?” Petero ia haere: “Lohiabada e, daika dekenai do ai lao? Mauri hanaihanai herevadia be oi amo idia mai. Ai abidadama bona ai diba oi be Dirava ena Helaga Tauna.” (Ioane 6:67-69) Ena be unai negai Petero bona aposetolo ma haida be Iesu ena hahediba herevana idia lalopararalaia lasi, to Iesu idia badinaia noho!

Ena be Iesu ese Petero ena hereva ia moalelaia, to ia gwau: “Lau ese umui 12 lau abia hidi, ani? To umui ta be ladana hadikaia tauna.” (Ioane 6:70) Iesu be Iuda Iskariote ia herevalaia. Reana Iesu ia itaia vadaeni Iuda be dala kererena ia badinaia matamaia.

To, Iesu ia moale badina ia itaia Petero bona aposetolo ma haida be ia idia rakatania lasi, to taunimanima hamauria gaukara lalonai ia idia durua noho.