Heabidae Bona Guriguri Karana Amo Diba Ita Abia

Olive Ororona ena ist kahanai be Betania hanuana, Ierusalema amo ia be kilomita 3 bamona. (Ioane 11:18) Iesu be unuseni ia lao, bona Mareta bona Maria edia ruma dekenai ia noho. Idia bona edia tadikaka, Lasaro, be Iesu ena turadia, bona mai moale ida ia idia abia dae.

Mesia ese idia ia vadivadi henia be hahenamo badana. Mareta ia ura heabidae karana ia hahedinaraia dainai, Iesu totona aniani namona ia hegaegaelaia. Mareta be ia gaukara, to ena tadina, Maria, be Iesu ena aena badinai ia helai bona ena hereva ia kamonai. Daudau lasi, Mareta be Iesu dekenai ia gwau: “Lohiabada e, egu tadina ese lau ia rakatania bona lau sibona lau gaukara noho, unai oi itaia, a? Oi hamaoroa do ia mai bona lau ia durua.”​—Luka 10:40.

Iesu be Maria ia gwau henia lasi, to Mareta ia sisiba henia, badina tauanina gaudia ia laloa momo. Ia gwau: “Mareta e, Mareta e, oi be gau momo dainai oi lalohekwarahi. To, gau haida o tamona sibona be hegeregere. Maria ese gau namona ia abia hidi, bona ia amo do ita kokia lasi.” (Luka 10:41, 42) Oibe, Iesu ia hahedinaraia namo lasi nega bada ita haorea aniani momo ita hegaegaelaia totona. Aniani sisina sibona be hegeregere.

Mareta ena kara be namo. Ia ura heabidae karana ia hahedinaraia. To aniani ia laloa momo dainai, Dirava ena Natuna ena hahediba herevadia ia kamonai lasi! Iesu ia hahedinaraia Maria be abia hidi maorona ia karaia, bona unai ese ia do durua bada. Ita dekenai unai be haheitalai namona.

Nega ma ta ai, Iesu ese mai anina bada gauna ma ta ia hadibaia. Hahediba tauna ta ese Iesu ia nanadaia: “Lohiabada e, mani ai dekenai guriguri dalana oi hadibaia, Ioane ese ena hahediba taudia ia hadibaia hegeregerena.” (Luka 11:1) Lagani ta mai kahana gunanai, Iesu ena Ororo Harorona ai guriguri dalana ia hadibaia. (Mataio 6:9-13) To reana unai negai inai hahediba tauna ia noho lasi, unai dainai Iesu ese guriguri dalana ia gwauraia lou. Bena parabole ta amo ia hahedinaraia guriguri loulou karana be mai anina bada.   

Ia gwau: “Bema umui ta be mai ena turana bona malokihi ai ena ruma dekenai oi lao bona oi noia, ‘Egu turana e, mani lau dekenai paraoa toi oi henia, badina egu turana ta be gabu daudau amo ia mai bona lau dekenai gau ta ia noho lasi ia lau henia totona.’ To ruma lalonai ena turana ia haere: ‘Lau oi hahekwarahia lasi. Iduara lau lokaia vadaeni, bona lau bona egu natudia maragidia be ai mahuta vadaeni, lau toreisi diba lasi oi dekenai gau ta lau henia totona.’ Umui lau hamaoroa, do ia toreisi bona ena turana dekenai ena ura gaudia do ia henia, badina ia be ena turana dainai lasi, to ia noinoi loulou dainai.”​—Luka 11:5-8.

Iesu ia ura idia dekenai ia hahedinaraia, ena be unai tauna ia hesiku, to ena turana ia noinoi loulou dainai ia durua. Unai hegeregerena, bema iseda lalokau guba Tamana dekenai ita guriguri loulou, ita abia dae momokani ia ese ena abidadama hesiai taudia edia noinoi do ia kamonai henia! Iesu ma ia gwau: “Umui lau hamaoroa, umui noinoi noho, bona umui dekenai do ia henia. Umui tahua noho, bona do umui davaria, bona iduara dekenai umui pidipidi noho, bena ia ese do ia kehoa. Badina idia noinoi taudia ibounai be do idia abia, bona idia tahua taudia ibounai be do idia davaria, bona idia pidipidi taudia ibounai dekenai iduara do idia kehoa.”​—Luka 11:9, 10.

Bena unai parabole ena anina hahedinaraia totona, Iesu ese tama ena kara ia herevalaia, ia gwau: “Umui huanai edena tamana, bema ena natuna mero be gwarume totona ia noinoi, ia dekenai gwarume do ia henia lasi to gaigai do ia henia? Eiava bema gatoi totona ia noinoi, ia dekenai doadoa ta do ia henia, a? Unai dainai, bema umui kara dika taudia ese emui natudia dekenai harihari gaudia namodia umui henia diba, namona be umui diba momokani, emui Tamana, guba ai ese lauma helaga be idia noinoi taudia dekenai do ia henia!” (Luka 11:11-13) Ita moale diba badina iseda Tamana ia ura iseda guriguri ia kamonai bona iseda dabu gaudia ia henia!