Idia Moale Badina Kara Dika Tauna Ia Helalo-kerehai

Iesu ena haroro gaukara lalonai, nega idauidau ai hahedinaraia manau karana be mai anina bada. (Luka 14:8-11) Ia ura bada mai manau ida Dirava idia hesiai henia taudia ia tahua. Ia davaria taudia haida be kara dika badadia idia karaia.

Farisea taudia bona taravatu hadibaia taudia idia itaia unai taudia—idia laloa maragi taudia—be Iesu bona ia harorolaia sivaraina idia ura henia. Idia maumau, idia gwau: “Inai tauna ese kara dika taudia ia abia dae bona idia ida ia aniani.” (Luka 15:2) Farisea taudia bona taravatu hadibaia taudia idia laloa idia be ma haida idia hereaia bona ogogami taudia be edia aena henunai ia noho kahu hegeregerena idia kara henidia. Idia ura hahedinaraia unai taudia idia inai henia dainai, inai Heberu herevana, ‛am ha·’aʹrets, anina be “tano taudia,” idia gaukaralaia.

To Iesu be mai hemataurai bona hebogahisi ida ibounai ia kara henia. Unai dainai ladana maragi taudia momo, kara dika idia karaia taudia danu, idia ura Iesu idia kamonai henia. To, Iesu be unai bamona taudia ia durua dainai, idia maumauraia neganai, dahaka ia karaia?

Iesu ese parabole ta ia gwauraia, guna Kaperanauma ai ia gwauraia parabolena bamona. (Mataio 18:12-14) Iesu ia gwau Farisea taudia idia laloa idia be kara maoromaoro taudia bona Dirava ena mamoe maguna lalonai idia noho. To, ladana maragi taudia be idia boio mamoe bamona bona Dirava idia rakatania.

Iesu ia gwau: “Bema umui ta be mai ena mamoe 100 bona ta ia boio, taunimanima momo lasi gabuna ai mamoe 99 do oi rakatania bona ia boio mamoe do oi tahua ela bona oi davaria, ani? Ia davaria neganai, ena pagana dekenai ia huaia bona ia moale. Bona ruma dekenai ia ginidae neganai, ena turadia bona dekena taudia ia boiria bona idia dekenai ia gwau, ‘Lau ida umui moale, badina egu boio mamoena lau davaria vadaeni.’”​—Luka 15:4-6.

Iesu ese unai parabole ena anina ia hahedinaraia, ia gwau: “Umui lau hamaoroa unai hegeregerena kara dika tauna ta ia helalo-kerehai neganai, guba ai moale bada ia vara. Unai moale ese kara maoromaoro taudia 99 totona idia abia moalena ia hereaia, badina idia helalo-kerehai be anina lasi.”​—Luka 15:7.

Iesu ese helalo-kerehai karana ia herevalaia neganai, Farisea taudia idia hoa. Idia laloa idia be kara maoromaoro taudia dainai, idia helalo-kerehai be anina lasi. Lagani haida gunanai, Iesu be takisi gogoa taudia bona kara dika taudia ida ia aniani dainai, Farisea taudia idia maumau neganai, ia hamaorodia: “Lau be kara maoromaoro taudia boiria totona lau mai lasi, to kara dika taudia boiria totona lau mai.” (Mareko 2:15-17) Kara maoromaoro Farisea taudia idia laloa idia helalo-kerehai be anina lasi, unai dainai guba dekenai moale idia havaraia lasi. To kara dika taudia idia helalo-kerehai neganai, guba dekenai moale bada ia vara.

Unai hereva hagoadaia totona, Iesu ese parabole ma ta ia gwauraia: “Bema hahine ta be mai ena drekma koini 10 bona ta ia haboioa, ia be lamepa do ia gabua, ena ruma do ia daroa bona do ia tahua namonamo ela bona koini ia davaria, ani? Bona ia davaria neganai ena turadia bona dekena taudia ia boiria, ia gwau, ‘Lau ida umui moale, badina lau haboioa drekma koini lau davaria vadaeni.’”​—Luka 15:8, 9.

Unai parabole ena anina be ia boio mamoe ena parabole ena anina hegeregerena. Ia gwau: “Umui lau hamaoroa, unai hegeregerena bema kara dika tauna ta ia helalo-kerehai, Dirava ena aneru idia moale bada.”​—Luka 15:10.

Mani oi laloa: Kara dika taudia idia helalo-kerehai neganai, Dirava ena aneru idia moale bada! Unai be mai anina bada badina kara dika tauna ia helalo-kerehai bona Dirava ena Basileia lalonai ia vareai neganai, ia abia dagina ese aneru edia ia hanaia! (1 Korinto 6:2, 3) To aneru idia mama lasi. Kara dika tauna ia helalo-kerehai bona Dirava dekenai ia giroa lou neganai, iseda hemami be edena bamona?