Daika Be Edia Tamana—aberahamo Eiava Diabolo?

Ruma Maragidia o Au Raurau Rumadia Ena Aria totona Iesu be Ierusalema dekenai ia do noho lalonai, taunimanima dekenai hereva momokani ia hadibaia. Unuseniai idia noho Iuda taudia haida be Iesu dekenai idia gwau: “Ai be Aberahamo ena natudia bona nega ta tau ta ena igui hesiai gaukara ai karaia lasi.” Iesu ia gwau: “Lau diba umui be Aberahamo ena natudia. To umui ese lau hamasea dalana umui tahua noho, badina egu hadibaia hereva umui abia dae lasi. Egu Tamana ida lau noho neganai, lau itaia gaudia lau herevalaia, to umui be emui tamana dekenai umui kamonai gaudia umui karaia.”​—Ioane 8:33, 37, 38.

Iesu ia ura inai ia hahedinaraia: Iena Tamana be edia tamana amo ia idau. Iuda taudia be Iesu ena hereva idia lalopararalaia lasi dainai, idia hereva lou: “Aiemai tamana be Aberahamo.” (Ioane 8:39; Isaia 41:8) Idia be Aberahamo ena bese taudia, unai dainai idia laloa edia Dirava bona Iena turana Aberahamo ena Dirava be tamona.

To idia hoa badina Iesu ia gwau: “Bema umui be Aberahamo ena natudia, Aberahamo ia karaia gaudia do umui karaia.” Momokani, natuna be ena tamana ia tohotohoa. Iesu ma ia gwau: “Lau ese umui dekenai Dirava amo lau kamonai hereva momokani lau gwauraia, to umui ese lau hamasea dalana umui tahua noho. Aberahamo be unai bamona ia karaia lasi.” Bena Iesu be idia ia hadaradaraia herevana ia gwauraia: “Umui be emui tamana ena kara umui karaia noho.”​—Ioane 8:39-41.

Iuda taudia idia laloparara lasi Iesu be daika ia herevalaia. Idia hereva idia be Aberahamo ena natudia, idia gwau: “Ai be heudahanai karana amo ai vara lasi, aiemai Tamana be tamona, Dirava unai.” To Dirava be edia Tamana, a? Iesu ia gwau: “Bema Dirava be emui Tamana, lau do umui lalokau henia, badina lau be Dirava amo lau mai bona iniseniai lau noho. Lau be sibona egu ura dainai lau mai lasi, to Dirava ese lau ia siaia.” Iesu ese henanadai ta ia henia bona sibona ese ia haerelaia, ia gwau: “Dahaka dainai lau herevalaia gaudia umui lalopararalaia lasi? Badina egu hereva umui kamonai diba lasi.”​—Ioane 8:41-43.

Iesu ia ura ia idia dadaraia taudia dekenai do ia vara gauna ia hahedinaraia. Bena maoromaoro ia hamaorodia: “Umui be emui tamana, Diabolo amo, bona umui ura emui tamana ena ura umui karaia.” Edia tamana be edena bamona tauna? Iesu ese ia gwauraia hedinarai: “Matamana amo ia be ala-ala tauna bona hereva momokani ia badinaia lasi.” Ma ia gwau: “Dirava amo ia mai tauna be Dirava ena hereva ia kamonai. To umui be umui kamonai lasi, badina umui be Dirava amo umui mai lasi.”​—Ioane 8:44, 47.

Iuda taudia be unai idia kamonai neganai, idia badu bona idia gwau: “Aiemai hereva be maoro, ai gwau, ‘Oi be Samaria tauna bona oi lalonai demoni ta ia noho.” Iesu idia gwauraia “Samaria tauna” neganai, idia hahedinaraia ia idia matauraia lasi. To Iesu be edia hereva ia laloa lasi, ia gwau: “Lau lalonai demoni ta ia noho lasi. Lau be egu Tamana lau matauraia, to umui be lau umui matauraia lasi.” Iesu ia ura hahedinaraia edia hereva eiava kara ese namo o dika ia havaraia diba, ia gwau: “Bema tau ta ese egu hereva ia badinaia, ia be do ia mase lasi.” Ia gwau lasi aposetolo taudia bona ia idia badinaia taudia be do idia mase lasi. To ena hereva ena anina be idia be do idia ore vaitani lasi, eiava “mase iharuana” do idia davaria lasi. Ena be idia mase, to do idia toreisi lou.​—Ioane 8:48-51; Apokalupo 21:8.

To Iuda taudia be Iesu ena hereva idia lalopararalaia lasi, idia gwau: “Hari ai diba oi lalonai demoni ta ia noho. Aberahamo be ia mase vadaeni, bona peroveta taudia danu, to oi gwau, ‘Bema tau ta ese egu hereva ia badinaia, ia be mase do ia mamia lasi, lasi momokani.’ Oi ese emai tamana Aberahamo, ia mase vadaeni tauna oi hereaia, a? . . . Vadaeni oi be daika?”​—Ioane 8:52, 53.

Iesu ia hahedinaraia diba ia be Mesia, to unai ia karaia lasi. To ia gwau: “Bema lau sibona lau hanamoa, egu hairai be anina lasi. To egu Tamana ese lau ia hanamoa, bona umui gwau ia be emui Dirava. To umui be ia umui diba lasi. Lau be ia lau diba, bema lau gwau ia lau diba lasi, lau be koikoi tauna, umui bamona.”​—Ioane 8:54, 55.

Bena Iesu ese Aberahamo ia herevalaia lou, ia gwau: “Emui tamana Aberahamo be ia moale bada egu dina ia itaia totona, bona lalona ena matana amo ia itaia bona ia moale.” Oibe, Aberahamo be Dirava ena gwauhamata ia abidadama henia bona Mesia ena mai ia naria. Iuda taudia be unai idia abia dae lasi, idia gwau: “Oiemu mauri lagani be 50 ia do abia lasi, to Aberahamo oi itaia vadaeni, a?” Iesu ia haere: “Umui lau hamaoroa momokani, Aberahamo ia do vara lasi neganai, lau noho vadaeni.” Iesu ia ura hahedinaraia, ia be tanobada ia do mai lasi neganai, guba ai ia be aneru goadana ta.​—Ioane 8:56-58.

Iuda taudia idia badu, badina Iesu ia gwau ia be Aberahamo ia do noho lasi negana ai ia noho, unai dainai idia ura nadi amo ia idia hodoa. To Iesu be idia amo ia raka oho.