Dirava Ena Basileia be Dahaka?

BAIBEL IA GWAU

“Guba ena Dirava ese basileia ta do ia haginia, inai basileia be do idia hadikaia diba lasi ela bona hanaihanai.”—Daniela 2:44.

“Dirava ese ita dekenai, natuna mero do ia henia! Bona ia be iseda [“gavamani,” New World Translation, futnout] gunalaia tauna do ia lao.”—Isaia 9:6.

UNAI GWAUHAMATA ENA NAMO

• Unai gavamani be mai momokani ida oi ia durua diba.—Isaia 48:17, 18.

• Tanobada matamatana lalonai, oi be mai goada bona moale ida do oi noho.—Apokalupo 21:3, 4.

BAIBEL ITA ABIDADAMA HENIA DIBA, A?

Oibe, badina rua be inai:

• Iesu ese ia hahedinaraia Dirava ena Basileia be dahaka do ia havaraia. Iesu ese ia murinai idia raka taudia ia hadibaia do idia guriguri, Dirava ena Basileia ia mai bona Dirava ena ura gauna tanobada dekenai do ia vara. (Mataio 6:9, 10) Dirava ese unai guriguri do ia haerelaia daladia be Iesu ese ia hahedinaraia.

  Iesu be tanobada ai ia noho neganai, hitolo taudia ia ubua, gorere taudia ia hanamoa, bona mase taudia ia hatoredia isi lou! (Mataio 15:29-38; Ioane 11:38-44) Vaira negana ai Iesu be Dirava ena Basileia ena King dainai, unai Basileia henunai do idia noho gaudia do ia hanamoa dalana be ia ese ia gwauraia hedinarai.—Apokalupo 11:15.

• Tanobada ai idia vara gaudia ese idia hamomokania Dirava ena Basileia be kahirakahira do ia mai. Iesu ia peroveta Basileia ese tanobada ai maino ia do mailaia lasi lalonai, tanobada ai tuari, hitolo, tano mareremarere bona ma gau haida do idia vara.—Mataio 24:3, 7.

  Hari, tanobada ai unai dika idauidau ita itaia. Ita diba kahirakahira Dirava ena Basileia ese unai bamona hekwakwanai do ia haorea.