KAHANA 5

“Mamoe Naria Tauna Dekenai Umui Giroa Lou, Ia be Emui Mauri Ia Naria Tauna”

Inai buklet ese ia herevalaia gauna ta o haida be oi dekenai ia vara danu, a? Bema oibe, anina be oi sibona oi noho lasi. Idaunegai bona hari, Dirava ena hesiai taudia momo be oi davaria metau idia mamia danu. Bema Iehova ena heduru dainai idia ese unai bamona metau idia hanaia, anina be oi danu be unai bamona heduru oi abia diba.

“Lau laloparara Iehova ese lau ia rakatania lasi.

LALOATAO, Iehova dekenai oi giroa lou neganai, ia ese oi do ia abia dae. Oi do ia durua lalohekwarahi, lalohisihisi, bona lalomamina dikana oi dadaraia totona. Bona unai ese oi do ia hagoadaia tadikaka bona taihu ida Iehova oi hesiai henia lou totona. Emu noho dalana be aposetolo taudia edia negai idia noho taudia haida bamona, bona Petero be idia dekenai ia gwau: “Umui be mamoe bamona, dala maorona amo umui raka siri, to hari umui be mamoe naria tauna dekenai umui giroa lou, ia be emui mauri ia naria tauna.”—1 Petero 2:25.

Iehova dekenai oi giroa lou karana be abia hidi hereadaena. Dahaka dainai? Iehova do oi hamoalea. (Aonega Herevadia 27:11) Oi diba, eda kara ese Iehova ena lalona ia hahisia o hamoalea diba. Oibe, Iehova be ita ia doria lasi ia ita lalokau henia eiava hesiai henia totona. (Deuteronomi 30:19, 20) Iehova ita lalokau henia dainai ia ita tomadiho henia be namo. Unai bamona ita karaia neganai, ita be Iehova dekenai harihari gauna namona ta—eda abidadama—ita henia, bona ia ita hamoalea. Momokani, Iehova ita tomadiho henia be maoro, bona unai amo ita abia moalena ese gau ibounai ia hereaia.—Kara 20:35; Apokalupo 4:11.

Ia manoka taihu ta ia giroa lou dainai, kongrigeisen taudia idia moale

Danu, Dirava dekenai oi giroa lou neganai, Ia do oi diba namonamo. (Mataio 5:3) Edena dala ai? Taunimanima ibounai idia henanadai, ‘Dahaka dainai ita vara?’ Idia ura edia mauri ena badina idia diba dainai unai henanadai ena haere idia tahua, hitolo taudia be aniani idia tahua bamona. Taunimanima be unai bamona idia henanadai badina Iehova ese edia lalona ai unai ia atoa. Ia ese ita ia karaia Ia do ita hesiai henia bena moale do ita davaria. Ita diba Iehova ita lalokau henia dainai ia ita tomadiho henia be moale gauna.—Salamo 63:1-5.

Mani emu kara, oi diba Iehova ia ura ia dekenai oi giroa lou. Edena bamona unai oi diba? Laloatao: Ai be mai guriguri ida inai buklet ai hegaegaelaia namonamo. Reana inai buklet be elda ta o tadikaka o taihu ta ese oi dekenai ia henia vadaeni. Bena maoromaoro oi duahia bona ena hereva oi badinaia. Unai ese ia hamomokania Iehova be oi ia laloatao noho. Danu, Ia ese oi ia boiria oi giroa lou totona.—Ioane 6:44.

Ita moale badina ena be Iehova ena hesiai tauna ta ia boio, to Ia ese unai tauna ia laloatao noho. Taihu ladana Donna be unai kara ia laloa bada. Ia gwau: “Lau be metairametaira orea lau rakatania, to Salamo 139:23, 24 ena hereva lau laloa, ia gwau: ‘Dirava e, egu kudouna do oi tahua, ena dala ibounai do oi diba. Egu lalona danu do oi tohoa, bona egu laloa gaudia do oi davaria. Do oi itaia, bema egu lalona dekenai dika ta ia noho, bona noho hanaihanai dalana dekenai mani lau do oi hakaua.’ Lau diba lau be tanobada ena lasi, bona lau diba Iehova ena orea sibona be egu noho gabuna. Lau laloparara Iehova ese lau ia rakatania lasi. Namona be Ia dekenai lau giroa lou. Bona lau moale, badina ia dekenai lau giroa lou!”

Iehova dekenai oi giroa lou neganai, ia ese oi do ia abia dae

Ai guriguri oi danu be Iehova dainai oi “moale” lou totona. (Nehemia 8:10) Iehova dekenai oi giroa lou dainai, do oi lalohisihisi lasi.

Iehova Dekenai Idia Giroa Lou Taudia Edia Henanadai Edia Haere

DAHAKA LAU KARAIA GUNA BE NAMO?

Gorere tauna ta ia namo neganai, guna ia karaia gaukaradia be metairametaira do ia karaia lou. Unai hegeregerena, emu Keristani karadia oi goadalaia lou totona, dina ta ta ai Dirava ena Hereva oi stadilaia be namo. To namo lasi gau ibounai be nega tamona ai oi karaia. Reana miniti haida lalonai Baibel oi duahia o idia rekodi Baibel duahiduahi oi kamonai, iseda pablikeisen ta oi stadilaia, o jw.org Web sait ai idia noho gaudia oi sekea eiava tv.jw.org oi itaia. Danu, kongrigeisen heboudia oi lao henia matamaia. Gau badana be inai: Guriguri amo Iehova ena heduru oi noia. ‘Emu lalohekwarahi ibounai be ia dekenai oi negea, badina ia be oi ia laloa bada.’—1 Petero 5:7.

“Egu tomadiho karana lau rakatania murinai, lau hemarai Dirava lau guriguri henia totona. To guriguri karana lau matamaia lou. Bena daudau lasi murinai, egu kongrigeisen elda ta ese lau ia vadivadi henia. Ia ese lau ia hadibaia, Iehova be lau ia laloatao noho. Elda ese lau ia hagoadaia, dina ta ta ai Baibel lau duahia be namo. Unai duahiduahi karana ese lau ia hagoadaia hebou lau lao totona. Danu, haroro gaukara lau karaia lou. Lau moale badina Iehova be lau ia rakatania lasi.”—Eeva.

KONGRIGEISEN ESE LAU DO IDIA ABIA DAE EIAVA LASI?

Laloatao, kongrigeisen taudia be mai moale ida oi do idia abia dae. Idia be oi do idia gwau henia lasi o hahemaoro henia lasi, to oi do idia lalokau henia bona hagoadaia.—Heberu 10:24, 25.

“Lau hemarai Kingdom Hall dekenai lau lao totona. Lau daradara, egu turadia be lau do idia abia dae o lasi. Taihu burukana ta, lagani 30 gunanai unuseniai ia noho, ia gwau: ‘Natugu, oi giroa lou dainai lau moale!’ Unai hereva ese lau ia hagoadaia bada. Oibe, lau giroa dainai lau moale bada.”—Javier.

“Kingdom Hall dekenai lau lao neganai, murina kahanai lau helai, unai amo ta ese lau do ia itaia lasi. To, momo be lau idia itaia, idia gwau lau idia diba badina lau maragi neganai unuseniai lau hebou. Idia ese lau idia hanamoa bona rosia, unai ese lau dekenai lalomaino ia havaraia. Bona lau moale bada.”—Marco.

ELDA TAUDIA BE EDENA BAMONA LAU DO IDIA DURUA?

Elda taudia be oi do idia durua namonamo. Idia ese oi do idia hanamoa badina oi ura “guna oi abia lalokauna” oi hahedinaraia lou. (Apokalupo 2:4) Elda be “mai manau” bona hebogahisi ida oi do idia durua, emu kerere gunadia hamaoromaoroa totona. (Galatia 6:1; Aonega Herevadia 28:13) Reana idia ese ta do idia abia hidi oi ia stadi henia totona, bena Iehova Kahirakahira Oi Lao bukana o “Dirava Ena Lalokau Lalonai Do Umui Noho” bukana do umui stadilaia. Laloatao, elda taudia ese dala idauidau ai oi do idia hagoadaia bona durua.—Isaia 32:1, 2.

“Ena be lagani 8 lalonai kongrigeisen lau bamoa lasi, to elda be lau idia vadivadi henia loulou. Dina ta ai, elda ta ese emai foto haida ia hahedinaraia. Foto lau itadia neganai, guna lau karaia gau namodia momo lau laloatao. Hari, lau ura Iehova lau hesiai henia, unai amo do lau moale lou. Elda edia heduru namodia dainai lau goada lou.”—Victor.

“Oi Do Ia Hagoadaia”

Dirava tomadiho henia karana oi matamaia lalonai, iseda ane bukana ladana Iehova Dekenai Ane Abia ese oi ia hagoadaia diba. Hegeregere, ane namba 60 oi laloa. Ena hereva be 1 Petero 5:10 amo idia abia, bona ane ena sinado be: “Oi Do Ia Hagoadaia.”

Dirava ese oi ia boiria mai

Diari ai oi raka totona.

Emu kudou ia diba namonamo

Ena oda oi moalelaia.

Bema ena ura oi karaia,

Ia be oi do ia durua.
Dirava ese Iesu ia henia,

Unai amo oi kwalimu diba.

Ena Natuna ia siaia dainai,

Oi ese goada oi abia.

Oi hahedinaraia lalokau

Be ia laloaboio lasi.

(ABIA LOU)

Oi be Dirava ena; Ia hoia vadaen’,

Oi gini goada, oi ia gimaia.

Ia ese oi do ia hagoadaia.

Oi gini goada, oi ia naria.

Inai ane ena miusiki bona Basileia anedia ma haida oi kamonai totona, inai maua oi skenia eiava www.jw.org oi itaia. Oi lao PUBLICATIONS > MUSIC.