Iehova ese Samson Dekenai Goada Ia Henia

Israela taudia momo be kaivakuku idia tomadiho henia lou dainai, Filistia taudia be edia tano idia abia neganai Iehova ese unai ia koua lasi. To Israela taudia ma haida be Iehova idia lalokau henia. Idia ta be Manoa. Ia bona ena adavana be natudia lasi. Dina ta ai, Iehova ese aneru ia siaia Manoa ena adavana dekenai. Aneru ia gwau: ‘Natuna mero ta do oi havaraia. Ia ese Filistia taudia amo Israela taudia do ia hamauria. Ia be Nasiri tauna ai do ia lao.’ Oi diba Nasiri taudia be daidia? Idia be Iehova ena spesel hesiai taudia. Nasiri taudia be huina idia utua lasi.

Gabeai, Manoa ena natuna mero ia vara, bona ena ladana idia hatoa Samson. Samson ia tubu daekau neganai, Iehova ese ia dekenai goada bada ia henia. Iena imana amo laiona ia hamasea diba. Nega ta ai, Samson ese Filistia taudia 30 ia alaia. Filistia taudia ese Samson idia inai henia bona ia hamasea totona dala idia tahua. Hanuaboi ta ai Samson be Gasa ai ia mahuta, Filistia taudia be siti ena geiti dekenai idia lao bona ia idia naria, daba ai ia idia hamasea totona. To Samson be hanuaboi momokani ai ia toreisi, bona siti ena geiti ia kokia. Bona Heberona kahirakahira ia noho ororo ataiai dekenai geiti ia huaia daekau!

Gabeai, Filistia taudia be Samson ena turana kekeni Delila dekenai idia lao, bona idia gwau: ‘Ai ese oi dekenai moni badana do ai henia bema Samson ena goada ena badina oi dibaia. Ai ura ia ai dogoatao bona dibura ruma dekenai ai atoa.’ Delila be moni ia ura dainai ia lalotamona. Matamanai, Samson ia ura lasi ena goada ena badina ia gwauraia. To Delila ia noinoi loulou ela bona Samson ia hesiku bona ia hereva: ‘Egu huina be idia utua lasi badina lau be Nasiri tauna. Bema egu huina idia utua, egu goada do ia ore.’ Samson be kerere badana ia karaia, a?

Maoromaoro Delila be Filistia taudia ia hamaoroa: ‘Iena hunia gauna lau diba!’ Delila ese ena mamuna latanai Samson ia hamahutaia, bena tau ta ia boiria bona Samson ena huina ia utua. Delila ia boiboi: ‘Samson e, Filistia taudia idia mai inai!’ Samson ia noga, to ena goada ia ore vadaeni. Filistia taudia ese ia idia dogoatao, ena matana idia kokia, bona dibura ruma ai idia atoa.

Dina ta Filistia taudia tausen momo be edia dirava Dagona ena dubu ai idia haboua, bona idia boiboi: ‘Emai dirava ese ai dekenai Samson ia henia vadaeni! Samson abia raka-lasi! Ai do ia hamoalea.’ Ia be du rua huanai idia haginia, bona ia idia kirikirilaia. Samson ia boiboi: ‘Iehova e, plis inai nega tamona lau dekenai goada oi henia.’ Hari Samson ena huina ia lata lou. Ia be mai goada ibounai ida du rua ia doria. Bona ruma ia moru, dubu lalonai idia noho taudia ibounai ia hamasedia, bona Samson danu ia mase.