Israela Ena King Ginigunana

Iehova ese Israela taudia dekenai hahemaoro taudia ia henia, idia gunalaia totona, to king idia ura. Samuela dekenai idia gwau: ‘Ita badinai idia noho bese ibounai be mai edia king. Ai danu king ta ai ura.’ Samuela ia mamia unai be kerere, unai dainai Iehova dekenai ia guriguri. Iehova ese ia hamaoroa: ‘Taunimanima be oi idia dadaraia lasi. Idia be lau idia dadaraia. Idia oi hamaoroa king ta idia abia diba, to king ese idia amo gau momo do ia noia.’ To taunimanima idia gwau: ‘Unai be namo gau ta lasi. Ai ura king ta!’

Iehova ese Samuela ia hamaoroa, tau ta ladana Saulo be king ginigunana ai do ia lao. Saulo be Rama dekenai Samuela vadivadi henia totona ia lao neganai, Samuela ese Saulo ena kwarana ai oela ia bubua, unai amo king ai ia halaoa.

Gabeai Samuela ese Israela taudia ia boiridia mai, edia king matamata ia hahedinaraia totona. To Saulo idia davaria lasi. Oi diba dahaka dainai? Badina kohu gaudia huanai ia hunia. Bena Saulo idia davaria, bona idia hakaua raka-lasi bona taunimanima vairanai ia gini. Ibounai huanai Saulo be tau latana, bona mai ena hairai. Samuela ia gwau: ‘Iehova ese ia abia hidi tauna umui itaia.’ Taunimanima idia boiboi: ‘King ia mauri daudau!’

Matamanai King Saulo be Samuela ia kamonai henia bona Iehova ia badinaia. To gabeai ena kara ia idau. Hegeregere, king be maoro lasi boubou gaudia ia henia totona. Nega ta, Samuela ese Saulo ia hadibaia ia totona do ia naria, to Samuela ia mai haraga lasi. Unai dainai Saulo be boubou gauna ia henia. Samuela be dahaka ia karaia? Saulo ia hamaoroa: ‘Oi ese Iehova oi badinaia lasi.’ Saulo be ena kerere amo gau ta ia dibaia, a?

Gabeai, Saulo be Amaleka taudia tuari henia totona ia lao neganai, Samuela ese ia hamaoroa idia ta do ia hamauria lasi. To Saulo be King Agaga ia hamasea lasi. Iehova ese Samuela ia hamaoroa: ‘Saulo be lau ia rakatania vadaeni, bona lau ia kamonai henia lasi.’ Samuela ia lalohisihisi bada, bona Saulo ia hamaoroa: ‘Oi be Iehova oi badinaia lasi dainai, ia ese king ma ta do ia abia hidi.’ Samuela ia raka gwauraia neganai, Saulo ese ena kouti rimuna ia dogoatao bona dabua ia darea. Bena Samuela ese Saulo ia hamaoroa: ‘Iehova ese oi amo basileia ia kokia vadaeni.’ Iehova ese basileia be ia ia lalokau henia bona badinaia tauna dekenai do ia henia.