Iehoiada Ena Gari Lasi Karana

Iesebele ena natuna kekeni ena ladana be Atalaia, ia be kara dika hahinena iena sinana hegeregerena. Atalaia be Iuda ena king ia adavaia. Ena Adavana ia mase neganai, ena natuna ia lohia matamaia. To iena natuna ia mase neganai, Atalaia be sibona Iuda ena lohia hahine ai ia halaoa. Bena Atalaia ese king ena bese taudia ibounai, king ai do idia lao taudia, ena tubudia danu ia ura hamasedia. Taunimanima be ia dekenai idia gari.

Hahelaga Tauna Badana Iehoiada bona ena adavana Iehosebata, idia diba Atalaia ia karaia noho karana be dika. Ena be idia diba edia mauri do idia haboioa, to Atalaia ena tubuna mero Iehoasa, ia be beibi sibona, idia hunia. Dubu helaga lalonai ia idia naria.

Iehoasa ena mauri lagani be 7 neganai, Iehoiada ese iduhu gunalaia taudia bona Levi taudia ia haboudia bona ia gwau: ‘Dubu helaga ena geiti umui gimaia, bona tau ta do ia vareai lasi.’ Bena Iehoiada ese Iehoasa be Iuda ena king ai ia halaoa bona ena kwarana ai korona ia atoa. Iuda taudia idia boiboi: ‘King ia mauri daudau!’

Kwini Atalaia be hutuma edia boiboi ia kamonai bona dubu helaga dekenai ia heau lao. King matamata ia itaia neganai, ia boiboi: “Umui ura lau umui hadikaia, a?” Iduhu gunalaia taudia ese ia idia dogoatao, idia abia lao bona idia hamasea. To, Atalaia ena kara dika ese Iuda besena dekenai dahaka ia havaraia?

Iehoiada ese Iuda besena ia durua Iehova ida gwaubou ta idia karaia totona, unai amo Ia sibona idia tomadiho henia. Iehoiada ese ia oda henidia Bala ena dubu bona ena kaivakuku idia hadikaia ore totona. Ia ese hahelaga taudia bona Levi taudia ia abia hidi dubu ai idia gaukara totona, unai amo taunimanima be unuseniai do idia tomadiho lou. Geiti naria taudia ia abia hidi, dubu idia gimaia totona, unai amo goeva lasi taudia do idia vareai lasi. Bena Iehoiada bona iduhu gunalaia taudia ese Iehoasa idia abia lao king ena ruma dekenai bona terona ai ia helai. Iuda taudia idia moale bada. Badina Iehova idia tomadiho henia diba. Karadika hahine Atalaia ese idia do ia biagua lou lasi bona Bala do idia tomadiho henia lou lasi. Iehoiada ena gari lasi karana ese taunimanima momo ia durua karana oi itaia, a?