Ierusalema Idia Hadikaia

Nega momo, Iuda taudia ese Iehova idia rakatania bona dirava koikoidia idia tomadiho henia. Lagani momo lalonai, Iehova ia ura idia ia durua. Peroveta taudia momo ia siaia, to idia kamonai lasi. Idia ese peroveta taudia idia kirikirilaia. Edena dala ai Iehova ese edia kaivakuku tomadiho henia karana ia hadokoa?

Unai negai Babulonia ena king Nebukanesa be bese idauidau ia halusia noho. Nega ginigunana ai, tuari amo Ierusalema ia abia neganai, King Iehoiakini, lohia taudia, tuari taudia, bona gau idauidau idia koroa taudia be Babulonia dekenai ia abidia lao, bona Iehova ena dubu helaga ai idia noho kohu ibounai danu. Bena Nebukanesa ese Sedekaia be Iuda ena king ai ia halaoa.

Matamanai, Sedekaia ese Nebukanesa ia kamonai henia. To kahirakahira besedia bona peroveta koikoi taudia ese Sedekaia idia hamaoroa Babulonia ia gwau-edeede henia totona. Ieremia ese ia hadibaia: ‘Bema oi gwau-edeede, Iuda ai ala-ala, hitolo, bona gorere do idia vara.’

Sedekaia be lagani 8 ia lohia murinai, Babulonia dekenai ia gwau-edeede. Ia ese heduru totona Aigupito ena ami ia noia. Vadaeni Nebukanesa ese Ierusalema idia tuari henia totona ena ami orea ia siaia, bona siti kahirakahira ai edia kamepa idia haginia hagegea. Ieremia ese Sedekaia ia hamaoroa: ‘Iehova ia gwau, bema Babulonia taudia dekenai sibona oi henia, do oi mauri bona siti do idia hadikaia lasi. To bema oi karaia lasi, Babulonia taudia ese Ierusalema do idia gabua bona oi be dibura tauna bamona do idia abia lao.’ Sedekaia ia gwau: ‘Sibona do lau henia lasi!’

Lagani ta mai kahana murinai, Ierusalema magu idia makohia bona siti be lahi amo idia gabua. Dubu helaga idia gabua, momo idia hamasea, tausen momo be dibura taudia bamona idia abia lao.

Sedekaia be Ierusalema amo ia heau, to Babulonia taudia ese ia idia lulua. Ieriko kahirakahira dekenai ia idia dogoatao bona Nebukanesa dekenai idia abia mai. Babulonia ena king ese Sedekaia ena natudia memero be iena vairanai ia hamasedia. Bena Nebukanesa ese Sedekaia ena matana ia hakepulua bona dibura ruma ai ia atoa, gabeai ia mase. To Iehova ia gwauhamata Iuda taudia be ‘lagani 70 murinai, Ierusalema dekenai do ia abia giroa mai.’

Babulonia dekenai idia abia lao matamata taudia dekenai dahaka do ia vara? Idia be Iehova do idia badinaia noho, a?