Iehova Idia Badinaia Memero Foa

Nebukanesa ese Iuda amo Babulonia dekenai king, bona ladana bada taudia edia bese taudia ia abidia lao neganai, ofesa tauna ladana Asipenasa ia oda henia unai taudia ia naridia totona. Nebukanesa ese Asipenasa ia hamaoroa idia amo gorere lasi bona aonega memero do ia abia. Unai memero be lagani toi lalonai do idia treinia. Unai amo idia be Babulonia ena ofesa taudia ai do idia lao. Unai memero be duahiduahi, toretore, bona Babulonia gado do idia dibaia. Idia be king bona ena hesiai taudia ese idia ania aniani do idia ania. Unai memero 4 be Daniela, Hananaia, Misaela, bona Asaraia. Asipenasa ese idia dekenai Babulonia ladadia ia henia: Belitisasa, Sataraka, Misaka, bona Abetenigo. Idia abia edukeisen ese Iehova hesiai henia karana do ia koua, a?

Unai memero 4 be edia lalona idia hadaia Iehova idia badinaia totona. King ena aniani do idia ania lasi badina idia diba Iehova ena Taravatu ai unai aniani haida be miro. Unai dainai Asipenasa dekenai idia gwau: ‘Mani ai oi doria lasi king ena aniani ai ania totona.’ Asipenasa ia gwau: ‘Bema umui aniani lasi bona king ia itaia emui toana be gorere bamona, lau do ia hamasea!’

Daniela be dala ta ia laloa. Asipenasa ia hamaoroa: ‘Mani dina 10 lalonai ai dekenai uma aniani bona ranu sibona oi henia. Bena king ena aniani idia ania memero ida ai oi hahegeregerea.’ Asipenasa ia lalotamona.

Dina 10 murinai, Daniela bona ena turadia toi edia tauanina ena toana be goada bona namo herea, bona memero ibounai amo idia idau. Iehova ia moale badina ia idia badinaia. Ia ese Daniela dekenai aonega ia henia, unai amo matahanai bona nihi idauidau ia lalopararalaia diba.

Treinini ia ore neganai, Asipenasa ese Nebukanesa dekenai unai memero ia abidia lao. King be idia ida ia herevahereva bona ia itaia idia ibounai amo Daniela, Hananaia, Misaela, bona Asaraia be idau. Ia ese unai memero 4 ia abia hidi ena ruma ai idia gaukara totona. Nega momo king ese mai anina bada gaudia totona edia lalohadai ia abia. Iehova ese idia dekenai aonega ia henia dainai king ena aonega taudia bona meamea taudia edia aonega idia hereaia.

Ena be Daniela, Hananaia, Misaela, bona Asaraia be idau tano ai idia noho, to idia laloaboio lasi idia be Iehova ena taunimanima. Oi danu be nega ibounai Iehova do oi laloatao, ena be emu tama sina be oi ida idia noho lasi, a?