Do Ia Noho Hanaihanai Basileia

Hanuaboi ta ai, King Nebukanesa be nihi idauna ta ia abia. Unai ia laloa momo dainai ia mahuta diba lasi. Ena meamea taudia ia boiria mai bona ia gwau: ‘Egu nihi umui gwauraia.’ Idia gwau: ‘King e, mani emu nihi oi gwauraia.’ To Nebukanesa ia gwau: ‘Lasi! Umui ese egu nihi umui gwauraia, eiava umui do lau hamasea.’ Ia dekenai idia gwau lou: ‘Mani emu nihi oi herevalaia, bona emu nihi ena anina do ai gwauraia hedinarai.’ Ia gwau: ‘Umui ibounai be umui ura lau umui koia. Egu nihi umui gwauraia hedinarai!’ King dekenai idia gwau: ‘Ta ese unai bamona ia karaia diba lasi. Oi herevalaia gauna be ia auka.’

Nebukanesa ia badu dikadika dainai oda ia henia ena tano ai idia noho diba bada taudia ibounai do idia hamasea. Daniela, Sataraka, Misaka bona Abetenigo danu. Daniela ese king ia noia ia dekenai nega ia henia totona. Bena ia bona ena turadia be heduru totona Iehova dekenai idia guriguri. Iehova be dahaka ia karaia?

Matahanai ta amo, Iehova ese Daniela dekenai Nebukanesa ena nihi ena anina ia hahedinaraia. Murina dinana ai, Daniela be king ena hesiai tauna dekenai ia lao bona ia gwau: ‘Diba bada taudia umui hamasea lasi. King ena nihi lau gwauraia hedinarai diba.’ Hesiai tauna ese Daniela ia abia lao Nebukanesa dekenai. Daniela be king ia hamaoroa: ‘Dirava ese vaira nega be oi dekenai ia hahedinaraia. Inai be emu nihi: Kaivakuku badana ta oi itaia, iena kwarana be golo, ena kemena bona imana be siliva, ena bogana bona mamuna be kopa, ena aena be auri, bona ena aena palapala be auri bona raro idia mikisi. Bena nadi ta be ororo amo ia roho bona kaivakuku ena aena palapala ia botaia, bona ia makohi maragimaragi bona lai ese idia odaia lao. Nadi be ororo badana ai ia lao, bona tanobada ibounai ia koua.’

Bena Daniela ia gwau: ‘Inai be emu nihi ena anina: Emu basileia be golo kwarana. Siliva be oi murinai do ia mai basileia. Bena ta do ia mai kopa bamona, ia ese tanobada ibounai do ia lohiaia. Basileia ma ta ena goada be auri bamona. Dokonai, do ia mai basileia be do ia parara, ena kahana haida ai auri aukadia idia noho, raro manoka be auri ida idia mikisi. Ororo badana ai ia lao nadi be Dirava ena Basileia. Unai basileia ese basileia ibounai do ia hamakohia bona ia sibona do ia gini ela bona hanaihanai.’

Nebukanesa be Daniela vairanai ia tui diho bona ena vairana be tano dekenai ia atoa. Bona ia gwau: ‘Emu Dirava ese oi dekenai unai nihi ia hahedinaraia. Dirava ta be ia bamona lasi.’ Nebukanesa ese Daniela ia hamasea lasi, to diba bada taudia edia gunalaia tauna ai ia halaoa bona Babulonia ena provinsi ia lohiaia. Iehova ese Daniela ena guriguri ia haerelaia dalana oi itaia, a?