Eseta ese Ena Taunimanima Ia Hamauria

Eseta be Iuda kekenina, ia be Parasa ena siti Susa dekenai ia noho. Lagani momo gunanai, Nebukanesa ese Eseta ena famili be Ierusalema amo ia abia mai. Eseta be ena kasin Modekai ese ia naria. Modekai be Parasa ena King Ahasuero ena hesiai tauna.

King Ahasuero be kwini matamata ia ura abia. Unai dainai ena hesiai taudia ese hairai hahinedia be king dekenai idia mailaia, Eseta danu. Idia ibounai amo king ese Eseta ia abia hidi kwini ai ia lao totona. Modekai ese Eseta ia hamaoroa ia hahedinaraia lasi ia be Iuda kekeni.

Hekokoroku tauna Hamana be dagi bada taudia edia gunalaia tauna. Ia ura taunimanima ibounai be ia dekenai do idia tui diho. To, Modekai ese unai ia dadaraia dainai Hamana ia badu bona ia ura Modekai ia hamasea. Hamana ia diba Modekai be Iuda tauna neganai, palani ia karaia Parasa tano ai Iuda taudia ibounai ia hamasea totona. King dekenai ia gwau: ‘Iuda taudia ese dika idia havaraia; idia oi hamasea be namo.’ Ahasuero ia gwau: ‘Oi ura karaia gaudia oi karaia diba,’ bona siahu ia henia taravatu ta ia karaia totona. Hamana be taravatu ta ia karaia, Adara hua ena dina namba 13 ai taunimanima ese Iuda taudia ibounai do idia hamasea. Iehova ese unai ia itaia.

Eseta be unai taravatu ia diba lasi. Unai dainai Modekai ese kopi ta ia siaia bona ia hamaoroa: ‘Oi lao bona king oi hereva henia.’ Eseta ia gwau: ‘Bema king ese ta ia boiria lasi bona ia lao, do ia hamasea. King be dina 30 lalonai lau ia boiria lasi! To do lau lao. Bema ia ese ena itotohi be lau dekenai ia atoa, do lau mauri, bema lasi do lau mase.’

Eseta be king ena ariara dekenai ia lao. King ese Eseta ia itaia neganai, ena itotohi ia abia isi. Bona king ese ia nanadaia: ‘Eseta e, dahaka oi ura?’ Eseta ia gwau: ‘Lau ura aria ta dekenai oi bona Hamana lau boiria.’ Unai aria ai, Eseta ese aria ma ta dekenai idia ia boiria. Aria iharuana ai, king ese ia nanadaia lou: ‘Dahaka oi ura?’ Ia gwau: ‘Tau ta ia ura lau bona egu taunimanima ia hamasea. Mani ai oi hamauria.’ King ese ia nanadaia: ‘Unai be daika?’ Eseta ia gwau: ‘Inai tau dikana Hamana.’ Ahasuero ia badu dikadika bona maoromaoro Hamana ia hamasea.

To tau ta eiava king danu be Hamana ese ia atoa taravatu ia haidaua diba lasi. Unai dainai king ese Modekai be dagi bada taudia edia gunalaia tauna ai ia halaoa bona siahu ia henia taravatu matamata ta ia karaia totona. Modekai ese ia karaia taravatu be Iuda taudia ia gimaia bona maoro ia henia idia tuari totona. Adara hua ena dina 13 ai, Iuda taudia ese edia inai taudia idia halusia. Unai nega amo lagani ta ta ai kwalimu aria idia karaia.