Ierusalema Ena Magu

Ita laloa giroa lou, lagani haida gunanai. Nehemia be King Aratasaseta ena hesiai tauna, ia be Israela tauna bona Parasa ena siti Susa ai ia noho. Nehemia ena tadikaka be Iuda amo sivarai dikana ia mailaia: ‘Ierusalema dekenai idia giroa lou taudia edia noho be ia dika. Babulonia taudia ese idia hadikaia geiti bona magu be idia haginia lou lasi.’ Nehemia ia lalohisihisi. Ia ura Ierusalema dekenai do ia lao bona heduru do ia henia, unai dainai ia guriguri king ese ia siaia totona.

Gabeai, king ia itaia Nehemia ia lalohisihisi. Ia gwau: ‘Oi be nega ta lalohisihisi toana oi hahedinaraia lasi. Dahaka ia vara?’ Nehemia ia gwau: ‘Dahaka dainai do lau lalohisihisi lasi? Ierusalema siti be ia dika.’ King ia henanadai: ‘Emu ura gauna be dahaka?’ Maoromaoro Nehemia ia guriguri. Bena ia gwau: ‘Mani lau oi siaia lao, Ierusalema ena magu lau haginia totona.’ King Aratasaseta ese Nehemia dekenai gwaumaoro ia henia ia lao totona, bona iena laolao ia durua totona gau ibounai ia karaia. Danu King ese Nehemia be Iuda ena gavana ai ia halaoa bona siti ena geiti totona timba ia henia.

Nehemia be Ierusalema dekenai ia ginidae neganai, siti ena magu ia sekedia. Bena hahelaga taudia bona lohia taudia ia haboua bona ia hamaorodia: ‘Magu ia dika momokani. Namona be ita gaukara.’ Taunimanima idia lalotamona, bona magu idia haginia lou.

To Israela taudia edia inai henia taudia haida be idia dekenai idia hevaseha, idia gwau: ‘Umui haginia magu be uda sisia ese idia hamorua diba.’ To gaukara taudia be edia hadikaia herevadia idia laloa lasi bona idia gaukara noho. Magu idia haginia daekau bona ia goada.

Bena edia inai taudia be dala idauidau amo idia mai, Ierusalema idia tuari henia totona. Iuda taudia ese unai idia kamonai neganai idia gari. To Nehemia ia gwau: ‘Umui gari lasi. Iehova be ita ida.’ Nehemia ese gima taudia ia atoa gaukara taudia idia gimaia totona bona edia inai taudia ese do idia tuari henidia lasi.

Dina 52 lalonai, magu bona geiti haginia gaukarana idia haorea. Nehemia ese Levi taudia ibounai ia haboua Ierusalema dekenai, magu idia hahelagaia totona. Ia ese ane taudia be grup rua dekenai ia hapararaia. Idia be Ranu Lohilohi Iduarana amo idia daekau lao, bena grup ta be ist kahana amo ia raka lao. Bona grup ma ta be west kahana amo idia lao. Bona siti idia raka hegege, kibi, simbol bona hap idia gadaralaia bona Iehova dekenai ane idia abia. Esera be grup ta ida ia lao bona Nehemia be grup ma ta ida ia lao ela bona dubu helaga dekenai idia hedavari. Taunimanima ibounai—tatau, hahine, bona natudia—be edia boubou gaudia idia henia Iehova dekenai bona idia moale noho. Edia moale ena regena be gabu daudau amo idia kamonai diba.