Aneru ese Iesu Ena Vara Idia Hadibaia

Roma Basileia ia lohiaia tauna, Kaisara Augusto be oda ia henia, Iuda taudia be edia vara gabuna dekenai do idia giroa edia ladana rejistaia totona. Iosepa ena famili be Betelehema amo dainai Maria ida ena hanua dekenai idia giroa. Bona Maria be kahirakahira do ia mara.

Betelehema dekenai idia ginidae neganai, idia davaria noho gabuna tamona be hosi edia ruma. Unuseniai Maria ese iena natuna Iesu ia havaraia. Dabua amo ia kumia bona animal edia aniani mauana ai ia udaia namonamo.

Betelehema kahirakahira ai, mamoe naria taudia haida be hanuaboi ai murimuri dekenai edia mamoe idia gimaia. Karaharaga, aneru ta be idia vairanai ia gini bona Iehova ena hairai ena diari ese idia ia hagegea. Mamoe naria taudia idia gari, to aneru ia gwau: ‘Umui gari lasi. Sivarai namona ta lau ura gwauraia. Hari dina, Betelehema ai Mesia ia vara vadaeni.’ Bena aneru momo herea idia hedinarai, idia gwau: ‘Guba ai ia noho Dirava hanamoa, bona tanobada taudia be maino do idia abia.’ Bona aneru idia boio. Mamoe naria taudia be dahaka idia karaia?

Ta ta dekenai idia gwau: ‘Betelehema dekenai ita lao.’ Idia lao haraga bena Maria bona Iosepa idia davaria, bona beibi be animal edia aniani mauana lalonai ia hekure.

Aneru ese mamoe naria taudia dekenai ia gwauraia sivarai be taunimanima ese idia kamonai neganai, idia hoa. Maria be aneru ena hereva ia laloa dobu bona ia laloaboio diba lasi. Mamoe naria taudia idia giroa lou bona idia itaia bona kamonai gaudia dainai Iehova idia tanikiu henia.