Iehova ese Iesu Ia Gimaia

Israela tanona ena ist kahana ai idia noho taudia idia abia dae, idia be hisiu ese ia hakaua diba. Hanuaboi ta ai, Ist amo idia mai tatau haida ese hisiu bamona gauna ta idia itaia ia diaridiari, bona idia badinaia. Unai “hisiu” ese Ierusalema dekenai idia ia hakaua lao. Unai tatau ese taunimanima idia nanadaia: ‘Iuda edia king ai do ia lao natuna be edeseni? Ia dekenai hemataurai hahedinaraia totona ai mai.’

Ierusalema ena king Heroda be unai ia kamonai neganai, ia laloa momo. Dubu biagudia ia nanadaia: ‘Inai king be edeseni ai do ia vara?’ Ia idia hamaoroa: ‘Peroveta taudia idia gwau Betelehema dekenai do ia vara.’ Unai dainai Heroda ese Ist amo idia mai tatau ia boiria bona ia hamaoroa: ‘Betelehema dekenai umui lao bona inai natuna umui tahua. Umui giroa mai bona iena noho gabuna umui hadibaia. Lau danu be ia dekenai hemataurai do lau hahedinaraia.’ To ia koikoi.

Unai “hisiu” ia marere matamaia. Bona unai tatau ese idia badinaia ela bona Betelehema dekenai. Unai “hisiu” be ruma ta ataiai ia doko bona tatau be ruma lalonai idia vareai. Bona Iesu bona ena sinana Maria idia davaria. Natuna dekenai idia tui diho bona harihari gaudia hegeregere, golo, frenkinsens, bona muro idia henia. Iehova ese unai tatau ia siaia, a? Lasi.

Hanuaboi ai, Iehova ese nihi ta amo Iosepa ia hamaoroa: ‘Heroda ia ura Iesu ia alaia. Emu adavana bona natuna ida Aigupito dekenai umui lao. Unuseni umui noho ela bona oi do lau hamaoroa umui giroa lou.’ Karaharaga Iosepa bona ena famili be Aigupito dekenai idia lao.

Iehova ese Ist amo idia mai tatau ia hamaoroa Heroda dekenai do idia giroa lou lasi. Heroda ia laloparara unai tatau be do idia giroa lou lasi neganai, ia badu dikadika. Iesu ia davaria diba lasi dainai, oda ia henia Betelehema ai Iesu ena mauri lagani hegeregerena memero ibounai do idia hamasea. To Iesu be ia mauri, badina Aigupito dekenai ia noho.

Gabeai Heroda ia mase. Iehova ese Iosepa ia hamaoroa: ‘Umui giroa lou diba.’ Iosepa, Maria, bona Iesu be Israela dekenai idia giroa lou, bona Nasareta siti dekenai edia ruma idia karaia.