Hahine ta be Ranu Guri Badinai

Pasova murinai, Iesu bona ena hahediba taudia be Samaria amo idia hanaia bona Galilea dekenai idia lao. Sukara siti kahirakahira ai, Iesu be ranu guri ta badinai ia laga-ani. Idia gwauraia Iakobo ena ranu guri. Bona ena hahediba taudia be siti dekenai idia lao aniani idia hoia totona.

Hahine ta be ranu abia totona ia mai. Iesu ese ia noia: “Mani ranu oi henia.” Hahine ia gwau: ‘Dahaka dainai lau oi hereva henia? Lau be Samaria hahine. Iuda taudia be Samaria taudia idia hereva henia lasi.’ Iesu ese ia hamaoroa: ‘Bema oi diba lau be daika, oi ese ranu totona lau do oi noia bona oi dekenai mauri ranu do lau henia.’ Hahine ia henanadai: ‘Anina be dahaka? Baketi oi dogoatao lasi.’ Iesu ia haere: ‘Lau henia ranuna ia inua tauna be do ia ranu mase lou lasi.’ Hahine ia gwau: “Tau badana e, unai ranu oi henia.”

Iesu ese ia hamaoroa: ‘Emu adavana ida ranu guri dekenai umui mai.’ Ia gwau: ‘Lau be adavana lasi.’ Iesu ia gwau: ‘Emu hereva be momokani. Oi be nega 5 oi headava, bona hari oi ida ia noho tauna be emu adavana lasi.’ Hahine ia gwau: ‘Lau itaia oi be peroveta tauna. Egu taunimanima idia abia dae inai ororo ai Dirava ai tomadiho henia diba, to Iuda taudia idia gwau Ierusalema sibona dekenai ita tomadiho be namo. Lau abia dae Mesia ia mai neganai, tomadiho dalana be ai do ia hadibaia.’ Bena Iesu ese ma haida dekenai ia gwauraia lasi hereva be ia dekenai ia gwauraia: ‘Lau be Mesia.’

Hahine be karaharaga ena siti dekenai ia lao bona Samaria taudia ia hamaoroa: ‘Toana be Mesia lau davaria. Ia be egu mauri ia diba namonamo. Umui mai bona itaia!’ Hahine idia badinaia lao ranu guri dekenai bona Iesu ena hereva idia kamonai.

Samaria taudia ese Iesu idia noia edia siti ai ia noho totona. Dina rua lalonai, taunimanima ia hadibaia, bona momo be ia idia abidadama henia. Samaria hahine idia hamaoroa: ‘Unai tau ena hereva ai kamonai murinai, ai diba ia be tanobada do ia hamauria tauna.’