Iesu be Basileia Ena Sivarai Ia Harorolaia

Iesu be ena bapatiso murinai, maoromaoro haroro gaukara ia hamatamaia, ia gwau: ‘Dirava ena Basileia be ia kahirakahira.’ Hahediba taudia ese Iesu idia badinaia bona Galilea bona Iudea dekenai idia lao. Iesu be ena noho gabuna Nasareta ai ia giroa lou neganai, ia lao sinagoga dekenai, Isaia ena lokua toretore ia kehoa, bona ia duahia badabada: ‘Iehova ese lau dekenai lauma helaga ia henia, unai amo sivarai namona lau harorolaia.’ Ena anina be dahaka? Ena be taunimanima momo idia ura Iesu ena hoa karadia idia itaia, to lauma helaga ia abia ena badina badana be haroro gaukara ia karaia totona. Bena iena hereva idia kamonai taudia dekenai ia gwau: ‘Inai peroveta hereva be hari dina ia guguru.’

Bena, Iesu be Galilea Gohuna dekenai ia lao, unuseniai Petero, Andrea, Iamesi, bona Ioane ia davaria, idia be haoda taudia. Bona idia ia boiria bona ia gwau: ‘Lau ida umui mai, bona umui be taunimanima haoda henia taudia ai do lau halaoa.’ Karaharaga edia gwarume bisinesi idia rakatania bona Iesu murinai idia raka. Galilea ena gabu ibounai dekenai Iehova ena Basileia idia harorolaia. Sinagoga ai, maketi gabuna bona strit ibounai lalonai idia haroro. Danu hutuma ese idia badinaia. Iesu ena sivarai be gabu ibounai dekenai ia lao, Suria dekenai danu.

Gabeai, Iesu be ena hahediba taudia haida dekenai siahu ia henia gorere idia hanamoa bona demoni idia lulua totona. Haida be Iesu ida siti bona hanua ta ta dekenai idia haroro. Abidadama hahinedia Maria Magadala, Ioana, Susana, bona ma haida ese Iesu bona ena hahediba taudia idia naridia.

Iesu be ena hahediba taudia ia treinia murinai, haroro totona ia siaidia. Galilea dekenai idia haroro, bona momo be hahediba taudia ai idia lao bona idia bapatiso. Momo be hahediba taudia ai idia ura lao dainai, Iesu ia gwau idia be uma gabu ena aniani hegeregerena, gogoa totona ia redi. Ia gwau: ‘Iehova dekenai umui guriguri gaukara taudia ia siaia aniani idia gogoa totona.’ Gabeai ena hahediba taudia 70 ia abia hidi bona rua rua ia siaidia Iudea ibounai dekenai idia haroro totona. Idia ese taunimanima idauidau dekenai Basileia idia hadibaia. Hahediba taudia idia giroa mai neganai, mai moale ida idia vara gaudia be Iesu dekenai idia herevalaia. Diabolo be gau ta ia karaia diba lasi haroro gaukara ia koua totona.

Iesu be guba dekenai ia do daekau lasi neganai, dala ia karaia ena hahediba taudia ese unai mai anina bada gaukarana do idia karaia noho. Idia ia hamaoroa: ‘Tanobada ibounai dekenai sivarai namona do umui harorolaia. Dirava ena Hereva be taunimanima dekenai do umui hadibaia, bona idia umui bapatisoa.’