Iesu Idia Arest

Iesu bona aposetolo taudia be Kiderona Kourana idia hanaia bona Olive Ororo dekenai idia lao. Unai be hanuaboi momokani bona hua be ia diari. Getesemane umana ai idia ginidae neganai, Iesu ese idia ia hamaoroa: “Iniseniai umui helai bona gima noho.” Bena Iesu be idia amo ia lao daudau sisina bona ia tui diho. Ia lalohisihisi bada bona Iehova dekenai ia guriguri: “Oiemu ura hegeregerena do ia vara be namo.” Bena Iehova ese aneru ta ia siaia Iesu ia hagoadaia totona. Iesu be aposetolo taudia toi dekenai ia giroa lou neganai, idia be idia mahuta noho. Iesu ia gwau: ‘Umui toreisi! Inai be mahuta negana lasi! Nega ia kahirakahira vadaeni, lau be kara dika taudia edia imana dekenai do idia atoa.’

Bena Iuda be tuari kaia bona au idia dogoatao taudia ida ia ginidae. Ia diba Iesu be edeseniai do idia davaria, badina nega momo unai uma gabu dekenai idia mai. Iuda be tuari taudia ia hamaoroa, idia dekenai Iesu do ia hahedinaraia. Iesu dekenai ia lao bona ia gwau: ‘Rabi e,’ bena ia kisi henia. Iesu ia gwau: ‘Iuda e, oi ese kisi amo egu inai taudia dekenai lau oi henia, a?’

Iesu ia raka lao bona idia ia nanadaia: “Daika umui tahua noho?” Idia gwau: “Iesu, Nasareta tauna.” Bena Iesu ia gwau: “Tauna be lau inai,” bona unai tatau idia hoa bona tano dekenai idia moru. Iesu ese nanadaia lou: “Daika umui tahua noho?” Idia gwau lou: “Iesu, Nasareta tauna.” Iesu ia haere: ‘Umui lau hamaoroa vadaeni, tauna be lau inai. Vadaeni inai taudia umui siaia lao.’

Petero be ia vara gauna ia itaia neganai, tuari kaia ia kokia bona hahelaga tauna badana ena hesiai tauna Malako ena taiana ia utua. To Iesu ese ena taiana ia dogoatao bona ia hanamoa. Bena Petero dekenai ia gwau: ‘Emu tuari kaia oi atoa giroa. Bema tuari kaia ida oi tuari, tuari kaia amo do oi mase.’ Tuari taudia ese Iesu idia dogoatao bona ena imana idia kwatua, bona ena aposetolo taudia idia heau. Dubu biaguna Ana dekenai Iesu idia hakaua lao. Ana ese Iesu ia nanadaia bona gabeai Hahelaga Tauna Badana Kaiapa dekenai ia siaia lao. To aposetolo taudia dekenai dahaka ia vara?