Petero Ia Gwau Iesu Ia Diba Lasi

Iesu be ena aposetolo taudia ida ataiai daiutuna ai ia noho neganai, idia ia hamaoroa: ‘Hari hanuaboi umui ibounai be lau do umui rakatania.’ Petero ia gwau: ‘Lau lasi! Ena be ibounai ese oi do idia rakatania, lau be oi do lau rakatania lasi.’ To Iesu ese Petero ia hamaoroa: ‘Kokoroku ia do tai lasi neganai, nega toi do oi gwau lau oi diba lasi.’

Tuari taudia ese Kaiapa ena ruma dekenai Iesu idia abia lao neganai, aposetolo taudia momo idia heau. To aposetolo rua be hutuma huanai idia lao noho. Idia ta be Petero. Ia be Kaiapa ena ruma ena ariara dekenai ia vareai bona lahi badinai ia helai. Diari ai, hesiai kekeni ta ese Petero ia itaia bona ia gwau: ‘Oi lau diba! Oi be Iesu oi bamoa tauna ta!’

Petero ia gwau: ‘Lasi! Lau diba lasi dahaka oi herevalaia noho!’ Geiti dekenai ia lao. To hesiai kekeni ma ta ese ia itaia bona taunimanima dekenai ia gwau: ‘Inai tauna be Iesu ida ia loaloa!’ Petero ia gwau: ‘Iesu lau diba lasi!’ Bena tau ta ia gwau: ‘Oi danu be idia ta! Emu hereva dalana ese ia hahedinaraia oi be Galilea tauna, Iesu hegeregerena.’ To Petero ia gwau: ‘Ia lau diba lasi!’

Bona maoromaoro kokoroku ia tai. Petero ia itaia Iesu ia giroa bona ia ia itaia. Iesu ena hereva ia laloatao, bona murimuri ia lao bona ia tai bada.

Unai nega ai, Sanhedrin taudia be Kaiapa ena ruma ai Iesu idia hahemaoro henia totona idia hebou. Idia lalotamona Iesu do idia hamasea, unai dainai Iesu ena kerere idia tahua, to kerere ta idia davaria lasi. Dokonai, Kaiapa ese Iesu ia nanadaia: ‘Oi be Dirava ena Natuna, a?’ Iesu ia gwau: ‘Oibe.’ Vadaeni Kaiapa ia gwau: ‘Samania hereva ma haida ita tahua lasi. Iesu be Dirava ena ladana ia hadikaia!’ Kota ia lalotamona, idia gwau: ‘Inai tauna ia mase be namo.’ Iesu ena vairana idia pataia, idia kanudia, ena vairana idia koua, bona idia botaia, idia gwau: ‘Bema oi be peroveta tauna, ai oi hamaoroa daika ese oi ia botaia!’

Daba ia rere neganai, Iesu be Sanhedrin hall dekenai idia abia lao bona idia nanadaia lou: ‘Oi be Dirava ena Natuna, a?’ Iesu ia haere: ‘Umui sibona ese umui gwauraia unai.’ Bena idia gwau Dirava ena ladana ia hadikaia, bona Roma ena gavana Pontio Pilato ena ruma dekenai idia abia lao. Gabeai dahaka ia vara? Mani ita itaia.